2022 წლის დასაწყისიდან არაერთხელ გაიზარდა პურის ფასი, ისევე, როგორც ეს წინა წლებში ხდებოდა.
როგორც ჩვენი მოქალაქეები ამბობენ, საშუალოდ, გასულ წელთან შედარებით, 40-50 თეთრით გაიზარდა ერთი ცალი პურის ფასი, როგორი წონისა და დასახელებისაც უნდა იყოს ის.
პურის ფასის ზრდას, ბოლო წლებში უკავშირებენ როგორც პანდემიას, ისე პურის მოსაზელად და მზა მდგომარეობამდე მიყვანაში აუცილებელი კომპონენტების: ფქვილის, ზეთის, საფუარის, მარილის გაძვირებას.
ორიოდე კვირის წინ, პურის მცხობელთა ასოციაციის ხელმძღვანელმა მალხაზ დოლიძემ საჯაროდ განაცხადა, რომ 22 სექტემბრიდან პურის ფასი დაიკლებდა. კერძოდ, “იფქლი დიღომი” სულ ცოტა, ოთხი სახეობის პურზე, ფასს ათი თეთრით შეამცირებდა; ასევე გააიაფებდა პურს “თემქა პური”.
პურის ფასი შემცირებას, მთელი საქართველოს მასშტაბით ელოდა და ელის ხალხი. განსაკუთრებით კი სოციუმის ის ფენა, ვისაც ეკონომიკურად ძალიან უჭირს. ასეთთა რაოდენობა კი მოსახლეობის უმეტესობაა.
ბოლო დღეების განმავლობაში, “გურია ნიუსი”, მაღალი საზოგადოებრივი ინტერესიდან გამომდინარე და ამავე დროს, უამრავი საყვედურის მოსმენის ფონზე, დილიდან, ოზურგეთის არა ერთ პურის მაღაზიას ესტუმრა. ასევე, ვეწვიეთ ქალაქის შიდა უბნებში თუ ქუჩების პირას მდებარე საცხობებს.
_ რა პურის გაიაფებაზე საუბრობთ? არ ყიდულობთ პურს? კითხვებს რომ სვამთ, ატყობთ, გაიაფდა თუ არა? კი, ბატონო, პური გაიაფდა ტელევიზორში! პურის ფასით სპეკულირებაც დაიწყეს! აღარ რცხვენიათ… ხალხი ტყუილითაც იკვებება, პურის გარდა… თან მშვენივრად, _ გვითხრა გურიის ქუჩაზე მდებარე პურის მაღაზიაში სწორედ პურის საყიდლად მისულმა ქალბატონმა.
_ ნელი მქვია. რამდენი ნელი, ეკატერინე და ოჯახის დედაა უკმაყოფილო, გაიარეთ და მიხვდებით, _ გვითხრა ერთ-ერთმა ქალბატონმა.
_ სად დაიკლო პურმა ფასი? ახლა იმასაც ამბობენ, რომ თბილისში გაიაფებულა, თურმე. სტუდენტები მყავს შვილები. ნათესავები არ გყავთ თბილისში? ტელეფონი ხომ ყველას გვაქვს _ ჰკითხეთ, აბა, ვინმეს! ასეთი ტყუილი საქვეყნოდ როგორ უნდა იკადრო?! მაგრამ ახლა ტყუილებს განსაკუთრებული გასაქანი აქვს. პური კი არაა, ტყუილია საარსებო საშუალება, _ გვითხრა ნატო ქადეიშვილმა ოზურგეთის ბაზარში.
ოზურგეთში, არც ერთ მაღაზიაში თუ თონე-საცხობში პურის ფასი არ შეცვლილა. ყველგან ერთი და იგივე სურათია _ რაც ღირდა ერთი თვის წინ, იგივე ღირს ახლა.
გაბრაზებული მოქალაქეები , “გურია ნიუსთან” საუბარში კატეგორიულად ითხოვენ, ხალხისთვის ხელმისაწვდომი იყოს პურის, შაქრის და ზეთის ფასი!
_ “ტყავში ვძვრებით”, რომ ეს სამი სახის პროდუქტი მაინც როგორმე ვიყიდოთ, ამოგვხდა სული! ყველის ფასი რომ უკვირთ, ყველი ჩემია, ძლივს რომ ვახერხებ პირუტყვის გამოკვებას და მერე რძის ნაწარმის საკუთარი ოჯახისა და შვილების მიკლების ხარჯზე გაყიდვას, _ გვითხრა პურის საყიდლად გამოსულმა ქალბატონმა.
ოზურგეთში, პურის ფქვილის საცალო გაყიდვის მაღაზიებში უცვლელი სიტუაციაა. უმაღლესი ხარისხის ერთი ტომარა 50-კილოგრამიანი პურის ფქვილი 100-110 ლარი ღირს.
საცალო გაყიდვის მაღაზიებში არის ისეთი შემთხვევებიც, როცა შედარებით დაბალი ფასის მქონე პურის ფქვილი იყიდეს მოქალაქეებმა და მალე უკანვე დააბრუნეს, რადგან მოზელს და გამოცხობის შემდეგ, უხარისხო პროდუქტი მიიღეს.
შპს “ვასაძის პური” ოზურგეთში, რომელსაც ბევრი მომხმარებელი ჰყავს, მრავალი სახეობის პურს აწვდის მყიდველს.
“გურია ნიუსის” კითხვაზე, არის თუ არა პურის გაიაფებაზე საუბარი, რაც, ჯერჯერობით, ოზურგეთში არ მომხდარა, დირექტორმა ირაკლი სირაძემ გვითხრა, რომ ჯერ მსგავსი არაფერი შეუტყობინებიათ:
_ როგორც კი კლების ტენდენცია წავა, მაშინვე დავწევთ ფასს. ჯერჯერობით კი, მსგავსი არაფერი ხდება, _ გვითხრა მან.
როცა ფქვილის მწარმოებელთა ასოციაციის ხელმძღვანელი მალხაზ დოლიძე პურის ფასის კლებაზე საუბრობს, შემდეგ კი რეალურად არაფერი ხდება, მოქალაქეთა უკმაყოფილება, ბუნებრივია, მატულობს.
ამჯერად მოქალაქეები, როცა წუხან უპირველესი საკვები პროდუქტის ფასის ზრდაზე, ამბობენ იმასაც, რომ ფასის კლება კი არა, მატება არ მოხდეს, როგორც ეს გასულ წელს იყო.
მკითხველებს კვლავ შევახსენებთ მალხაზ დოლიძის კომენტარს, რომელიც მან ცნობილი გამოსვლისას განაცხადა:
“ახალ წლამდე ფასების მატებაზე ლაპარაკი ზედმეტია. იმედი მაქვს, რომ ახლო მომავალში კიდევ უფრო დასტაბილურდება ბაზარი. ალბათ, სხვა მწარმოებლებიც მიბაძავენ “იფქლი დიღომსა” და “თემქა პურს”. კონკურენცია და საბაზრო ეკონომიკა ისეთია, ძალაუნებურად, ყველას აფიქრებინებს, რომ ბაზარზე შემორჩეს და თავის პროდუქციას რეალიზაცია გაუკეთოს”, _ თქვა დოლიძემ.
დღეისთვის, ოზურგეთში, ასევე, ძალიან გაძვირდა სიმინდი, სიმინდის ფქვილი და ღერღილი.
ერთი კილოგრამი სიმინდის ღერღილი უკვე 5,50 ლარი ღირს, ერთი კილოგრამი სიმინდის ფქვილი _ ოთხი ლარი. ხოლო ერთი კილოგრამი სიმინდის ფასი 3-3,50 ლარს შორის მერყეობს.
ზოგადად კი, ინფლაციის დონე, სტატისტიკის ეროვნულ სამსახურის მონაცემებით, წინა წელთან შედარებით, საკმაოდ გაუარესებულია _ აუცილებელი მოხმარების პროდუქტებიდან სიმინდი 85%-ით გაძვირდა, ხორბლის ფქვილი _ 41%-ით, ზეთი არ გაძვირებულა წინა წლის შემდეგ, თუმცა, 43%-თ არის გაზრდილი მარგარინის ფასი. ძალიან გაძვირდა, ასევე, მწვანე ლობიო, რომლის ფასი 40.5%-ით არის მომატებული, რასაც ხალხი უამინდობას, ხანგრძლივ წვიმებს, შემდეგ კი გვალვებს უკავშირებს.
ავტორი
