პროდუქტზე, კონკრეტულად კი პურის ფქვილზე ფასის ზრდის შესახებ, უკვე ყოველდღიურად საუბრობენ ოზურგეთის ყველა სავაჭრო სივრცეში.
_15 დღეა, პურის ფქვილი არ გამიყიდია. ვეღარ ყიდულობს ხალხი. ნახეთ, “გულისტანის” ფასი _ 37 ლარია 25 კილოგრამიანი ტომარა. შესაბამისად, ორმაგია 50 კილოგრამიანი ტომრiს ფასი. მეტი არაფერი არ უნდა იყიდოს ხალხმა? ვერც ყიდულობენ, _ გვეუბნებიან რიგითი გამყიდველები, რომლებიც, ძირითადად, სხვა პროდუქტთან ერთად, პურის ფქვილით ვაჭრობენ.
_ გამოდით, ყველამ ნახეთ, რა ხდება, რა ვქნათ ამ პანდემიის დროს, ყველაზე ძალიან პურის ფქვილის ფასი უნდა იყოს დარეგულირებული. გაზაფხულზე ასე შეგვპირდა მთავრობა, თუმცა, უკვე დაგვახრჩეს და ესაა. 75 ლარს რომ ერთ ტომარა ფქვილში გადაიხდი და 20 დღეც არ კმარა ოჯახში, სხვა რა უნდა ქნას გლეხმა? სასწრაფოდ მოგვხედოს მთავრობამ და თავისი პირობა შეასრულოს, რაც გაზაფხულზე დადო, _ ამბობენ რიგითი მოქალაქეები.
“გურია ნიუსი” არა ერთ საცხობს და სასურსათო მაღაზიას თუ სავაჭრო ობიექტს ეწვია.
ბევრად განსხვავებული, ყველაზე მაღალი ფასი “გულისტანს” აქვს _ ერთი 25 კილოგრამიანი ტომარა პურის ფქვილი 37,50 ლარი ღირს.
საცხობებში სადაც, თონის პურს (სხვა დასახელებისაც) აცხობენ, გვეუბნებიან, რომ ცდილობენ, საბითუმო ფასებში შეიძინონ.
_ ჩვენ “პურადს” ვყიდულობთ. ფოთიდან შემოდის. 65 ლარი ღირს ერთი 50-კილოგრამიანი ტომარა. სოფელ მერიაშია მათი საწყობი და იქ მივდივართ, _ გვითხრა აღმაშენებლის ქუჩაზე მდებარე საცხობის მეპატრონემ.
აქვე სხვა საცხობში გვითხრეს, რომ ახერხებენ, “კარმენის” დასახელების 50-კილოგრამიანი ტომარა ფქვილი იყიდონ 57 ლარად, საბითუმო ფასში.
_ თუმცა, ადგილზე უნდა მიხვიდე, უნდა ეძებო. ჩვენც ვწვალობთ, _ გვითხრეს აქ.
ცოტა ხნით ადრე, როცა “გურია ნიუსი” ფასების სწრაფ ზრდაზე წერდა, “გულისტანის” ქარხნის მენეჯერმა მარინა ჩხაიძემ გვითხრა, რომ გაზაფხულზე, მთავრობის მითითებით, ცხრა დასახელების პროდუქტი, მათ შორის ფქვილი არ უნდა გაძვირებულიყო:
_ თუმცა, საუბარი იყო, ნაწილობრივ სუბსიდირებაზე მთავრობის მხრიდან, რაც კონკრეტულად “გულისტანის” მიმართ არ მოხდა. ფასების ზრდაც ამან გამოიწვია, _ გვითხრა მაშინ ქალბატონმა მარინამ.
_ სუბსიდირება რა შუაშია, როცა შედარებით ნაკლებ ფასად აწვდიან პურის ფქვილს ლანჩხუთსა და ჩოხატაურს? ჩვენ ვიცნობთ იქაურ დისტრიბუტორებს. 3-4 ლარით ნაკლებად მიაქვთ, ვიდრე ოზურგეთელებს. რატომ? გვსჯის “გულისტანი” იმისთვის, რომ ოზურგეთში აქვს ქარხანა გახსნილი? პირიქით არ უნდა იყოს? _ აცხადებენ ოზურგეთელი დისტრიბუტორები, რომლებიც ვინაობის დასახელებისგან თავს იკავებენ.
_ იციან, როგორი ეკონომიკური სიდუხჭირეა და ხალხს ახრჩობენ. ამასაც დავკარგავთ მაგათი გადამკიდე, _ გვეუბნებიან ისინი.
“გურია ნიუსი” დაინტერესდა, რამდენად შეესაბამება სინამდვილეს რეგიონის სხვადასხვა მუნიციპალიტეტში ფასთა სხვაობის შესახებ გავრცელებული ინფორმაცია და ჩოხატაურსა და ლანჩხუთში ვიკითხეთ, როგორც სხვა ფირმის, ასევე, “გულისტანის” ფქვილის ფასი.
_ “გულისტანის” 25კგ-იანი ტომარა ღირს 37 ლარი, 50-იანი კი _ 74 ლარი. სხვა ფირმებს რაც შეეხება, “პურადი” 38 ლარი ღირს 25კგ-იანი. 1 ლარია სხვაობა. ძალიან ცუდ დღეშია ხალხი. რა უნდა ქნან?” _ გვითხრა გამყიდველმა ირმა ყაჭეიშვილმა.
რაც შეეხება იქვე გვერდზე განთავსებულ სავაჭრო ობიექტს, გამყიდველი მაყვალა შავაძე გვეუბნება, რომ პურის ფქვილის ფასთან ერთად, ზეთიც გაძვირდა:
“ექსტრა” 25-კილოგრამიანი 35 ლარია, “გულისტანი” _ 37. სხვა დასახელების ფქვილი არ მაქვს. ადრე “ექსტრა” ბევრად ძვირი იყო “გულისტანზე”. ორშაბათს ქარხანაში 35 ლარი ღირდა. მეც ხომ უნდა დამრჩეს რაიმე მოგება. 2 ლარი როგორ არ უნდა დაამატო 35-ლარიან ტომარას? საწვავს ფული უნდა, მოტანას ფული უნდა, იქ ადგილზე უნდა გააკონტროლონ, თორემ მე ანგარიშფაქტურაში მიწერია, რაც მაქვს გადახდილი. 2 ლარს ვამატებ, აბა, ტყუილად ხომ არ ვიჯდები აქ? ყველაზე დაბალფასიან ზეთს 5 ლარად ვყიდდი და გუშინ რომ მოიტანეს, 5.50 ღირდა დისტრიბუტორთან. მერე დავრეკე ბათუმში, დამაინტერესა, შეიძლება ადგილზე მოტანილი ძვირი იყოს-მეთქი. ხოფას ბაზრობაზე 4.50 ღირს, ყველაზე დაბალფასიან ზეთზეა საუბარი. ფასები ყველგან აწეულია”, _ ამბობს გამყიდველი მაყვალა შავაძე.
თითქმის, იგივე გვითხრეს ლანჩხუთშიც _ პურის ფქვილის ფასები ანალოგიურია. ხოლო პურის ფქვილის შემდეგ, მოსახლეობა დიდ უკმაყოფილებას გამოთქვამს ზეთის ფასის სწრაფად ზრდის გამო.
_ გაზაფხულზე რომ თქვა პრემიერმა, ცხრა დასახელების პროდუქტზე ფასი არ მოიმატებსო, ახლა რა ხდება? პანდემია გაქრა? თუ პირიქით, კორონავირუსი ახლა გვიტევს თუ გვიტევს! გაახსენეთ ნათქვამი, _ გვეუბნებიან რიგითი მოქალაქეები.
“გურია ნიუსი” წისქვილკომბინატ “გულისტანის” მენეჯერს, მარინა ჩხაიძეს ესაუბრა:
_ ჩვენთან, ოფისში გამოკრულია ფასები. ყველასთვის ერთნაირია. არაა ეს ინფორმაცია სწორი. თუ ჩოხატაურში ან ლანჩხუთში წინა კვირაში წაიღეს, უფრო იაფი იქნებოდა. ორშაბათს გაძვირდა და უფრო მაღალი ფასი აქვს. რაც შეეხება გაძვირებას, ფასების ზრდა გამოიწვია იმან, რომ რუსეთმა ჯერ გააძვირა ხორბალი, შემდეგ კი გაყიდვები შეზღუდა. ასევე, აწეულია დოლარის კურსი. ესაა მიზეზი, _ გვითხრა მარინა ჩხაიძემ.
კითხვაზე, ასეთი ლოგიკით გაძვირება მომდევნო ორშაბათსაც თუ მოხდება, მან პასუხის ნაცვლად კითხვა აქეთ დაგვისვა:
_ დოლარის ფასი აიწევს ორშაბათიდან?
_ არ ვიცით, მაგრამ თუ აიწია, გააძვირებთ უფრო დაბალ ფასში ნაყიდ პურის ფქვილს?
_ როგორც თქვენ არ იცით, ისე არ ვიცი მე. ამას უფროსები წყვეტენ, _ გვითხრა მარინა ჩხაიძემ, რომელმაც მოგვაწოდა ფასების სია, ხარისხის და წონის მიხედვით.
