რუსეთის და მისი პრეზიდენტის აგრესია მთელ მსოფლიოს, მათ შორის მოსახლეობის უღარიბეს ფენებს ურტყამს, – ამის შესახებ გერმანიის საგარეო საქმეთა მინისტრმა ანნალენა ბურბოკმა, ნიუ-იორკში სასურსათო კრიზისთან დაკავშირებით შეხვედრის წინ განაცხადა.
მისი თქმით, რუსეთის დამპყრობლურმა ომმა უკრაინაში მილიონობით ადამიანს აურაცხელი ტანჯვა მოუტანა და ასევე უზარმაზარ ზიანს აყენებს უკრაინის საზღვრებს გარეთ.
ბურბოკმა ხაზგასმით აღნიშნა, რომ არა მხოლოდ უკრაინა, არამედ მთელი მსოფლიო განიცდის რუსეთის ფედერაციის აგრესიას.
დიპლომატის თქმით, დაუთესავი უკრაინის მინდვრები და განადგურებული მარცვლები, დაბომბილი სატრანსპორტო მარშრუტები და გადაკეტილი პორტები არის მიზეზი იმისა, რომ მსოფლიო ბაზარს სასწრაფოდ ვერ მიეწოდება მარცვლეული.
„რუსეთის ომის შედეგად ხორბლის, სიმინდისა და ზეთის ფასები მთელ მსოფლიოში გაიზარდა. პრეზიდენტი პუტინი, მსოფლიოში ყველაზე ღარიბებს ურტყამს. ეს ეხება იმ ბავშვებს, ქალებს და მამაკაცებს, რომლებიც უკვე განიცდიან გვალვას, კლიმატის კრიზისს და COVID-19 პანდემიის ეკონომიკურ გავლენას და დახმარება სჭირდებათ. რუსეთი არა მხოლოდ ცინიკურად არის განწყობილი შიმშილის კრიზისის მიმართ გლობალურ სამხრეთში, ის იყენებს შიმშილს, როგორც იარაღს ერთგულების მოთხოვნით,“ – თქვა გერმანიის საგარეო საქმეთა მინისტრმა
მან აღნიშნა, რომ დასავლეთი ამას თავისი სოლიდარობით ეწინააღმდეგება. ის ეხმარება იქ, სადაც დახმარებაა საჭირო და არა იმიტომ, რომ ეს არის პოლიტიკურ დღის წესრიგში.
ამით დასავლეთი მხარს უჭერს საერთაშორისო წესრიგს, რომელსაც რუსეთი სასტიკად უტევს. ამით ის იცავს ადამიანის სიცოცხლეს, რასაც რუსეთი ნებით რისკავს.
გერმანიამ, როგორც G7-ის თავმჯდომარემ, სასურსათო უსაფრთხოების საკითხი ერთობლივი მუშაობის საფუძვლად აქცია, ხაზგასმით აღნიშნა ბურბოკმა. მან თქვა, რომ ჯგუფი შეთანხმდა კონკრეტულ ვალდებულებებზე სასურსათო კრიზისის შესამსუბუქებლად.
„გლობალური საზოგადოებისა და G7-ის წრეში ჩვენ გავაკეთებთ ყველაფერს, რაც ახლა მნიშვნელოვანია. მოკლევადიან პერსპექტივაში, მხარს ვუჭერთ უკრაინას და გავუწევთ ჰუმანიტარულ დახმარებას მთელ მსოფლიოში. მაგრამ, ასევე გრძელვადიან პერსპექტივაში კლიმატის კრიზისისა და გვალვის წინააღმდეგ ბრძოლის გზით, ხოლო მდგრადი განვითარების მხარდაჭერით მსოფლიოს უღარიბეს ნაწილებში“, – თქვა ბურბოკმა.
ცნობისთვის, ნიუ-იორკში, გაეროში, სახელმწიფო მდივნის, ენტონი ბლინკენის მოწვევით, 35-მდე სახელმწიფო ერთმანეთს ხვდება, მათ შორის ისინი, ვისი მოსახლეობაც ყველაზე მეტად დაზარალდა უკრაინის პორტების ბლოკადის გამო.
ავტორი
