25 ნოემბერი ქალთა მიმართ ძალადობის წინააღმდეგ ბრძოლის დღეა. სამწუხაროდ, გლობალურად კვლავ მილიონობით ქალი რჩება, რომელსაც სხვადასხვა ფორმის ძალადობასთან გამკლვება ყოველდღიურად უწევს.
მსოფლიოში ყოველ ათ წუთში ერთ ქალს კლავენ – ასეთია გაეროს მიერ გამოქვეყნებული უმძიმესი სტატისტიკა, რომელიც კიდევ ერთხელ ნათლად აჩვენებს, რომ რომ ქალებისა და გოგოების მიმართ ძალადობა ადამიანის უფლებების დარღვევის ერთ-ერთ ყველაზე გავრცელებული ფორმაა მსოფლიოში. ქალზე ძალადობის მაჩვენებლები საქართველოშიც შემაშფოთებელია. 2023 წელს შინაგან საქმეთა სამინისტრომ ოჯახში ძალადობის ფაქტების გამო 6 534 შემაკავებელი ორდერი გამოსცა, ამავე პერიოდში, შსს-მა ოჯახში ძალადობის 11 ათასამდე შემთხვევა აღრიცხა, საიდანაც 2400-მდე ფიზიკურ, ხოლო 8 ათასზე მეტი ფსიქოლოგიურ ძალადობას უკავშირდებოდა.
ბიზნესფედერაცია “ქალები მომავლისთვის” მიიჩნევს, რომ საქართველოში არაერთი წინგაგდმული ნაბიჯის მიუხედავად, ქალთა მიმართ ძალადობა სერიოზულ პრობლემად რჩება. საჭიროა, კანონმდებლობის დახვეწა და მისი სათანადო აღსრულება, ასევე ძალადობის პრევენციაზე ზრუნვა. ბიზნესფედერაციას მიაჩნია, რომ ერთ-ერთი ყველაზე ეფექტური მეთოდი ძალადობისგან თავის დასაცავად ქალთა სოციალური და ეკონომიკური გაძლიერება, მათთვის განათლების მიცემა და ფინანსური დამოუკიდებლობაა. ამის რესურსი და პოტენციალი კი ქვეყანას ნამდვილად აქვს, რადგან ოფიციალური სტატისტიკის მიხედვით, საქართველოში მილიონამდე ქალი შრომის ბაზრის გარეთ რჩება – ისინი არათუ არ მუშაობენ, არამედ არც ეძებენ სამსახურს. სწორედ მსგავსი ქალები არიან ყველაზე მოწყვლადები ძალადობის მიმართ, ამიტომ საჭიროა აქტიური მუშაობა ეკონომიკაში მათი ჩართულობის უზრუნველსაყოფად, რაც ორმაგი სარგებლის მომტანი შეიძლება გახდეს: ერთი მხრივ, თავიდან ავირიდოთ ძალადობა, რადგანაც ფინანსურად დამოუკიდებელი ქალები უფრო მარტივად ახერხებენ თავდაცვას და მეორე მხრივ, შევქმნათ ეკონომიკური სარგებელი.
“ქალები მომავლისთვის” წლებია ამ მიმართულებით მუშაობს, სწორედ ქალთა ეკონომიკური გააქტიურება და გაძლიერება არის ერთ-ერთი მთავარი პრიორიტეტი ბიზნესასოციაციისთვის. ეკონომიკური ფორუმებით, გრანტებით, სხვადასხვა პროგრამებით ვაძლიერებთ ქალ მეწარმეებს და ქალთა სხვა მოწყვლად ჯგუფებს. გვჯერა, რომ ჩვენი წვლილი შეგვაქვს ქალთა უფლებების დაცვისა და მათი გაძლიერების საქმეში და ვფიქრობთ, რომ ამ საკითხების წინ წამოწევა და მათ გადაჭრაზე მსჯელობა თანამედროვე მსოფლიოსა და საქართველოს ერთ-ერთ უმთავრეს პრიორიტეტად უნდა იქცეს.
