ყავის კაფსულები ყველა გემოვნებისთვის: როგორ შევარჩიოთ ისინი?

აპარატი

ყავის დასამზადებლად რამდენიმე სახის აპარატი არსებობს, რომელთაგანაც ყველაზე ხშირად ევროპული და ამერიკული ფორმატის აპარატები გვხვდება. კაფსულები კი არაა უნივერსალური პროდუქტი და ისინი თითოეული აპარატისთვის შესაბამისად უნდა შევიძინოთ. მოკლედ, პირველ რიგში, სანამ გემოსა და ინტენსივობაზე გადავალთ, აუცილებელია დავრწმუნდეთ, რომ ჩვენი პოტენციური რჩეული თავსებადია ჩვენ აპარატთან.

წარმოშობა

ყავის მარცვლების ძირითადი მწარმოებლები „ყავის სარტყელში“ შემავალი ქვეყნებია და ყველა რეგიონის პროდუქტი განსხვავდება როგორც გემოთი, ასევე დამუშავების მეთოდითა და სპეციფიკური არომატებით. მაგალითად, ცენტრალურ ამერიკასა და აფრიკაში ყავა შედარებით მაღალი მჟავიანობით გამოირჩევა, სამხრეთ ამერიკაში კი შედარებით დაბალ მჟავიანობას შევხვდებით.

აფრიკულ ყავის მარცვლებს ინტენსიური გემო აქვს და ციტრუსის ან კენკრის არომატით გამოირჩევა. სამხრეთ და ცენტრალურ ამერიკაში დაკრეფილ ყავის მარცვლებს შედარებით დაბალი ინტენსივობა აქვთ და ორივე რეგიონში შოკოლადი ერთ-ერთი მთავარი არომატია. განსხვავება ისაა, რომ სამხრეთში უპირატესობას კარამელსა და თაფლს ანიჭებენ, ცენტრალური ამერიკის მკვიდრთათვის კი მათ თხილეული და ხილის ტკბილი არომატი ანაცვლებს.

კოფეინის შემცველობა

ჩვენი უმეტესობა ყავას დილიდან ენერგიით დასამუხტად სვამს. სასმელს კი ამ „გამომაცოცხლებელ“ ეფექტს სწორედ კოფეინი აძლევს, მასტიმულირებელი ნივთიერება, რომელიც განსაზღვრავს, თუ რამდენად მძლავრია ჩვენი ყავა. კაფსულის სიმძლავრე ციფრებით აღინიშნება: „01“ ნიშნის მქონე კაფსულები ნაკლებად ინტენსიურია, ციფრის ზრდასთან ერთად კი სიმძლავრეც იმატებს. თუ კოფეინის მიმართ მომატებული მგრძნობელობა გაქვთ, ან ყავის დაგემოვნება საღამოობითაც გიყვართ, არც ესაა პრობლემა – ცხადია, უკოფეინო ყავის კაფსულების შეძენაც ძალიან მარტივად შეგიძლიათ.

მოხალვის მეთოდი

მოხალვის მეთოდი და ხანგრძლივობა ყავის გემოზე, ინტენსივობასა და კოფეინის შემცველობაზე უდიდეს გავლენას ახდენს. აქედან გამომდინარე, ბუნებრივია, რომ ის ყავის კაფსულის არჩევისას ერთ-ერთი უმნიშნველოვანესი ფაქტორია. რაც უფრო დიდხანს გრძელდება მოხალვის პროცესი, მით უფრო დახვეწილი და არომატული ხდება ყავის გემო. ხანმოკლე მოხალვის პროცესით მიღებულ მარცვლებს ღიას, ხოლო ხანგრძლივის – მუქს უწოდებენ. ღია მოხალვის მარცვლებს შედარებით ნაკლები სიმწარე და მეტი მჟავიანობა აქვს. ეს მაჩვენებლები მოხალვის ხანგრძლივობის მიხედვით იცვლება – რაც უფრო მუქი მოხალვისაა ყავა, მით უფრო იმატებს მისი სიმწარე და იკლებს მისი კოფეინის შემცველობა და მჟავიანობა.

შეჯამება

კაფსულების საშუალებით ყავის დამზადება ძალიან მარტივად, სულ რამდენიმე წამში შეგვიძლია, მაგრამ, როგორც ვნახეთ, ამ სასმლის სამყარო ძალიან მრავალფეროვანია და არჩევანის გაკეთება სულაც არაა ისეთი იოლი, როგორც თვითონ მოდუღების პროცესი. თუ უკვე არ გაქვთ ნაპოვნი თქვენი ფავორიტი კაფსულა, საუკეთესო რჩევა, რომელიც შეგვიძლია მოგცეთ, ექსპერიმენტების ჩატარებაა. გასინჯეთ სხვადასხვა ინტენსივობის, არომატის, კოფეინის შემცველობისა და სიმძლავრის კაფსულები (ოღონდ, დარწმუნდით, რომ ისინი თქვენ აპარატთანაც თავსებადია!), სანამ არ მიაგნებთ იმ იდეალურ გემოს, რომელიც თქვენი ყოველი დილის ერთგული თანამგზავრი გახდება. იმედია, ჩვენი ბლოგი ამ რთული არჩევანის გაკეთებაში დაგეხმარებათ.