ოზურგეთის მუნიციპალიტეტში (ისევე, როგორც მთელ საქართველოში) წინასაახალწლო პერიოდში, მერიისა და საკრებულოების მიერ, აქტიურად ხდებოდა საახალწლო მილოცვის პიარკამპანია. უფრო მეტიც, აქტიურად შუქდებოდა კადრები, თუ როგორ მზადდებოდა სოციალურად დაუცველ ოჯახებში მცხოვრები პატარების გასახარებლად საჩუქრები.
თუმცა, არაერთი გაჭირვებული ოჯახი, სადაც სამი და ზოგჯერ მეტი არასწრულწლოვანი ცხოვრობს და მშობლები მხოლოდ იმაზე ფიქრობენ, ყოველდღიურად შვილებს პური როგორ მიუტანონ, საახალწლო საჩუქრის გარეშე დარჩნენ.
ერთ-ერთი ასეთია ოზურგეთის მუნიციპალიტეტის სოფელ ჭანიეთის მკვიდრი ცინარიძეების ოჯახი _ მათ სამი მცირეწლოვანი შვილი ჰყავთ.
ოჯახი სოფელში წლების წინ, ლეჩხუმის მაღალმთიანეთიდან ჩამოსახლდა. მშობლები ყველანაირად ცდილობენ, სამ შვილს როგორმე არ მოშივდეთ.
ახალი წლის დღეებში, ცინარიძეების შვილები (უფროსი 14 წლისაა, უმცროსები კი 5 და 7 წლის) დარწმუნებული იყვნენ, რომ მათ საახალწლოდ “თოვლის ბაბუები” გაახარებდნენ. თუმცა, ამჯერად მათი მოლოდინი არ გამართლდა.
_ ჩემს შვილებს, ყველაზე მეტად მერაბ ჭანუყვაძის გამგებლობის დროს არ აკლდა ყურადღება. ჩემს პატარა ფიქრიას, არასდროს დაავიწყდება ბატონი მერაბის მზრუნველობა _ შინიდანაც კი წამოიღო ტელევიზორი და ბავშვს აჩუქა. ეს მისი კეთილი ნება იყო, როცა ნახა, როგორ გარემოში იყვნენ ჩემი შვილები, თორემ მე საოჯახო ავეჯს არავის ვთხოვ.
წელს ბავშვები გულდაწყვეტილები დარჩნენ, რადგან ახალი წლის წინა დღეებში აქტიურად ისმოდა, რომ სოციალურად დაუცველი ოჯახების ბავშვებს, თოვლის ბაბუა საჩუქარს მიუტანდა. რამდენი მანქანა გაივლიდა, გარეთ გარბოდნენ, მერე კი, ერთმანეთს შეჰყურებდნენ, ალბათ, სხვა მანქანით მოდის თოვლის ბაბუაო. სოციალური დახმარება გვაქვს, თუმცა, კი იცით, რამდენია და ვცდილობთ, ვიმყოფინოთ, _ გვეუბნება ოჯახის დიასახლისი ხათუნა ცინარიძე.
ხათუნა და ავთო ცინარიძეები ახერხებენ, საარსებო შემოსავალი ჰქონდეს ოჯახს. ვაჭრობენ ხილ-ბოსტნეულით, რომელსაც სეზონზე ოჯახიდან ამატებენ.
_ ნისიად რომ ბოსტნეულს აიღებ, ცოტა შინიდან დაამატებ სეზონზე და ამით ივაჭრებ, პურის ფულს თუ დენის და გაზის ხარჯის გადახდას ძლივს ჰყოფნის. არავის ვაწუხებთ, უბრალოდ, ბავშვებს ძალიან დაწყდათ გული. მეც არ მეგონა, თუ ისინი არავის გაახსენდებოდა იმ ფონზე, როცა ბევრ უკეთესად მცხოვრებს გადასცეს, _ ამბობს პატარების დედა ხათუნა ცინარიძე.
ის ასევე ამბობს, რომ უმადური არაა _ ხელისუფლება სხვადასხვა დროს, საშენი მასალით დაეხმარა, რასაც საგულდაგულოდ აგროვებენ და არა ერთის მსგავსად, არ გაუყიდიათ. პირიქით, ცდილობენ, რაღაც თავად შეიძინონ და ადრე თუ გვიან სახლის შენება დაიწყონ. თუმცა, ჯერ ბავშვები პატარები არიან და მათზე ზრუნვის გარდა, სხვა საქმეზე, მით უფრო, სახლის დადგმაზე საუბარი ზედმეტია.
საახალწლოდ საჩუქრების გადაცემას და დღესასწაულის მილოცვას, ხელისუფლება ყველა დროში ახერხებდა, მეტ-ნაკლებად (ძირითადად, იგივე ხალხის ბიუჯეტიდან).
ოზურგეთშიც, ისევე, როგორც მთელ საქართველოში, ამ ახალი წლის წინაც აქტიურად ისმოდა და იწერებოდა:
“სოციალურად დაუცველ ოჯახებს ახალი წელი მიულოცეს”, “სოციალურად დაუცველ ბავშვებს საჩუქრები გადასცეს”, “საოჯახო ტიპის სახლში მცხოვრებ ბავშვებს ახალი წელი მიულოცეს”, “ახალშობილები მოინახულეს და დაასაჩუქრეს”, “საგანგებო რეჟიმში მომუშავე სამსახურების თანამშრომლებს ახალი წელი მიულოცეს”.
ძალიან კარგია, რომ ყველა სფეროს მუშაკებს, განსაკუთრებით კი საგანგებო რეჟიმში მომუშავეებს, თუნდაც მცირედით, ყურადღება მიექცევა. თუმცა, ცუდია ის, როცა ამ ყველაფერს, უმეტესად, ღიად დაჰკრავს საპიარო ელფერი.
როცა ცხადდება, რომ სოციალურად დაუცველ ოჯახებს, სადაც მცირეწლოვანი ბავშვებია, საახალწლო საჩუქრებს გადასცემენ და ეს საჩუქარი მერე მხოლოდ რამდენიმეს უწევს, ფასი ეკარგება კეთილ ჟესტს; ზედმეტად მორთულ-მოკაზმულ განცხადებებს და საჩუქრებით დატვირთული ჩინოვნიკების ფოტოების ფრიალი კი უფრო აღიზიანებს საზოგადოებას.
კონკრეტული ადამიანები მიიჩნევენ, თუ ზოგიერთ გაჭირვებულს გადასცემენ საჩუქარს, ღიად უნდა გაკეთდეს განცხადება, რომ გაჭირვებულებსა და სოციალურად დაუცველებს შორის, ყველაზე გაჭირვებულს დაასაჩუქრებენ.
“გურია ნიუსი” ოზურგეთის მუნიციპალიტეტის მერის წარმომადგენელს ჭანიეთში, ზაზა სალუქვაძეს (ის ჭანიეთის მკვიდრია და ადგილობრივი თვითმმართველობის არჩევნების შემდეგ, ახლახან დაინიშნა ამ პოსტზე) ესაუბრა:
_ თქვენ ამ სოფლის მკვიდრი ხართ. კარგად იცნობთ თითოეულ ოჯახს. ცინარიძეების ოჯახის პატარებს რატომ არ გადასცა მუნიციპალიტეტმა საახალწლო საჩუქარი, რასაც ბავშვები სულმოუთქმელად ელოდნენ?
_ კი, ვიცი, რომ გაჭირვებული ოჯახია. მე დამირეკეს და მთხოვეს სამი ოჯახის სია გადამეცა. იქ რომ ჩავედი, ორი კიდევ დაამატეს. თუმცა, არ ვიცი, ვინ დაამატა. ჭანიეთში სულ ხუთ სოციალურად დაუცველ ოჯახს გადაეცა საახალწლო საჩუქარი.
_ ვინ დაგირეკათ, ვინ შემოგთავაზათ ეს კვოტა, როცა თქვენ ყველაზე უკეთ იცით სოფლის ოჯახების გასაჭირი?
_ დეპუტატმა ბექა თოიძემ დამირეკა. რაც მოხერხდა, ეს იყო. ძალიან ვწუხვარ, _ გვითხრა ზაზა სალუქვაძემ.
ჩვენ, ასევე, დავუკავშირდით ბექა თოიძეს, რომელიც ახლა ოზურგეთის საკრებულოს წევრია და იქ სამ სოფელს (ლიხაური, ჭანიეთი, მაკვანეთი) წარმოადგენს.
_ ვწუხვარ, რომ ასე მოხდა. ზოგჯერ ხდება, თუმცა, არ დავტოვებთ უყურადღებოდ. მოგვაწოდეთ ოჯახის უფროსის ვინაობა, რომ უკეთ ვიყოთ ინფორმირებული, _ გვითხრა ბექა თოიძემ.
[sexy_author_bio]
