ოზურგეთში, წინასაახალწლო ბაზრობა, ისევე, როგორც მთელ საქართველოში, ფასების ზრდით გამოირჩევა _ ყველგან, მაღაზიებსა თუ ბაზარში, ძირითად სასურსათო პროდუქტებზე ფასები მომატებულია და კიდევ უფრო მატულობს.
მაგალითად, გასულ კვირაში, შაქრის ფასი, სხვადასხვა მარკეტში, მეტ-ნაკლებად, 5-10 თეთრის განსხვავებით იყიდებოდა. თუმცა, ამ განსხვავების მიუხედავად, ყველგან მოიმატა იმავე ათი თეთრის ოდენობით.
რაც შეეხება პურის და ზეთის ფასის მატებას, ყველაზე მეტად ამ პროდუქტებს დაეტყო გაძვირება.
“ჩვენი მთავრობა თუ სტატისტიკოსები საერთაშორისო ბაზრების პროგნოზებზე რომ გვესაუბრებიან, ერთხელ თუ წამოცდება ვინმეს, როგორი ხელფასებია იქ, ევროპაში? 60%-ით რომ ზეთი გაძვირდება და პურს რომ შემპარავად წელიწადში ხუთჯერ უმატებენ ფასს, წონას კი თანდათან აკლებენ და ქერქი შერჩებათ მალე ხელში, ესაა ქვეყანა? ასე მგონია, ვიღაც სპეცდამკვირვებლები ჰყავთ და აკვირდებიან, სადამდე გავუძლებთ! ვერ გაუძლებს ხალხი ერთხელაც და ნახავენ. აქამდეც მიკვირს, რამდენს ვიტანთ”, _ გვეუბნება ოზურგეთელი გულიკო ზედგინიძე და ნავაჭრს გვაჩვენებს.
“ერთ კილოგრამ ყველში, ერთ კილოგრამ ორაგულსა და ერთ ბოთლ ზეთში 41 ლარი გადავიხადე და სხვა არაფერი მინდა ამ საახალწლოდ, ასე გამოზოგილი ლუკმის გარდა? ბევრს ესეც არ აქვს, დამიჯერეთ. არ ვიცი, სანამ უნდა ვიყოთ ასე!” _ თქვა ქალბატონმა.
ახლა მეტი მოთხოვნა რძის ნაწარმზე, ხორცსა და თევზზეა. ხორცის ფასი, ჯერჯერობით, არ გაზრდილა _ ერთი კილოგრამი, საშუალოდ, 17-18 ლარი ღირს.
ყველის ფასმა კი, განსაკუთრებით გააკვირვა და გააბრაზა ადგილობრივები _ ერთი კილოგრამი ყველი ოზურგეთში 16 ლარი ღირს. ხოლო უფრო ნაკლებად რომ იყიდო (14 ან 15 ლარად), დილით ადრე, სოფლებიდან ჩამოსულ ადამიანებს უნდა დახვდეთ სამგზავრო ავტობუსებთან.
“ერთი ცალი კვერცხი 60 თეთრი ღირს. კილოგრამ ყველში 15 ან 16 ლარი როგორ მივცე?” _ ამბობს წითელმთის მკვიდრი ბიძინა ვანიძე.
“ამ ფასების შემხედვარე, ვერც გაბრაზებით გახვალ ფონს და ვერც ხუმრობით”, _ ამბობს ბატონი ბიძინა.
ერთი კილოგრამი ნადუღი 5 ლარი ღირს, ერთი ლიტრი რძე _ 2,50 ლარი, ხოლო სოფლის ქათმის ერთი ცალი კვერცხი 60 თეთრი.
შინაური ფრინველის და ცხოველების სექციაში მეტი ხალხმრავლობაა, ვიდრე სხვა დახლებთან თუ მარკეტებში.
შარშანდელთან შედარებით, წელს ოზურგეთის ბაზარში ბევრია ინდაური და შინაური ქათამი. თუმცა, წონით არავინ ყიდის და ამბობენ, რომ შეხედულებით, გარეგნული ნიშნების მიხედვით ყიდიან.
“ინდაურის ფასი შეხედულებითაა. ორი დღეა, მყიდველი გამოჩნდა. შარშან ხალხს არც ინდაურები შემოუყვანია გასაყიდად და ქათმებიც ნაკლებად იყო. წელს ცოტა უკეთესობაა ამ მხრივ და რა დროს აწონვაა. რომ შეხედავ, მიხვდები, რამდენის გადახდა ღირს. მამალს რაც შეეხება, “სახალადეცე” მამლის ფასს, 30 ლარს ქვევით არ იქნება”, _ გვეუბნებიან შინაური ფრინველით მოვაჭრე ქალბატონები.
ზრდასრული ინდაური, საშუალოდ, 65-დან ას ლარამდე ღირს. ცოცხალი გოჭი კვლავ წონის მიხედვით იყიდება, ერთი კილოგრამი 15 ლარად. თუმცა, ამბობენ იმასაც, რომ საახალწლოდ, დიდი ალბათობით, გოჭის ფასი მოიმატებს.
ამ სეზონზე “შეხედულებით ფასი” დაუდგინეს ციტრუსოვნებსაც.
“მანდარინი, ფორთოხალი თუ ლიმონი შეხედულების მიხედვით ფასობს. “ვაშინგტონი” ჯერ ხეზეა, ბატონო!” _ ასეთი დიალოგს ხშირად მოისმენთ დღის განმავლობაში გამყიდველ-მყიდველთა შორის .
“იაფი რა არის? აგერ, საცოდავი ხალხისგან ნაკეთები ჩიჩილაკები, თხილის ჯოხში ფასს არავინ ახდევინებს მაგათ და კი ყიდიან იაფად”, _ გვეუბნება გარემოვაჭრე ნანული დარჩია.
მართლაც, ყველაზე თვალში საცემი ჩიჩილაკების ლოკაციებია, რომელსაც ტროტუარებზე, ქალაქის ცენტრში, ყველაზე მეტად შეხვდებით.
აქ ყველანაირი ზომის ჩიჩილაკს ნახავთ. ფასი ერთი ლარიდან იწყება და ზომების მიხედვით, 25 ლარს აღწევს.
“ამ საახალწლო ბაზრობაზე, იაფად მხოლოდ ჩიჩილაკს, ამ ჩვენს თხილის “ნაძვის ხეს” თუ იშოვი. მაინც ხეირია. ხომ უნდა გქონდეს სათქმელად, რომ რაღაც იაფი ღირს?” _ ირონიულად ხუმრობენ ბაზარში მყოფები.
ბოსტნეულს რაც შეეხება, ორ დღეში ორი ლარით (4 ლარიდან 6,50 ლარამდე) გაძვირდა ბადრიჯანი და ლარნახევრით კი (3,50-კილოგრამიანი) პურის ფქვილი.
საახალწლოდ ერთ-ერთი ყველაზე დიდი მოთხოვნის მქონე პროდუქტი, ნიგოზი, ერთი კილოგრამი 14 ლარიდან 18 ლარამდე ღირს, ხარისხის და ჯიშის მიხედვით. სხვადასხვაა თაფლის ფასიც, რომელსაც, ძირითადად, პატარა ან საშუალო ზომის ქილებში, დაფასოებული სახით ყიდიან და ძნელია, მიხვდე, რომელში რამდენი გრამი არის მოთავსებული.
პატარების მშობლები ბრაზობენ პიროტექნიკის და სხვადასხვა გასართობი სათამაშოს თუ ნაძვის ხის აქსესუარების სიძვირის გამო.
“ყველაფერს თავი დავანებოთ. შეიძლება 10-თეთრიანი გასაბერი ბუშტის ფასი ჯერ 25 და მერე 50 თეთრზე აიყვანო ორ დღეში? ესეც ყველი და პური ხომ არ არის?! გამყიდველმა აქეთ შემომწყრა, ასეთ პატარა ღირებულების ნივთების ფასს რომ გავაორმაგებთ, ამით თუ ვნახავთ ცოტა მოგებას. გადასახდელად ეს ძვირი მაინც არ არისო… ასეთი მიდგომითაც ვაჭრობენ, თურმე”, _ გვითხრა რიტა სალუქვაძემ, რომელიც ორ მცირეწლოვან გოგონასთან ერთად არჩევდა, რა და სად ეყიდა უფრო იაფად.
როგორც ბაზრობაზე გამოკითხულთა უმეტესობა ვარაუდობს, ძირითადი პროდუქტების: ხორცის, ყველის, რძის ფასი დარჩენილ რამდენიმე დღეში, კიდევ უფრო გაიზრდება.
_ ამიტომ ვჩქარობთ, ახლა ვიყიდოთ. გაჭირვებული ადამიანისთვის სამიოდე ლარის დანაზოგი, სამი დღის სამყოფი პურის ფასია, _ ამბობენ ისინი.
[sexy_author_bio]
