ოზურგეთში, ბოლო პერიოდის განმავლობაში, ბავშვთა კონტიგენტში დაფიქსირდა ქუნთრუშას შემთხვევები. ოზურგეთის მესამე ბავშვთა ბაღში 1 ჯგუფი გადაყვანილია საიზოლაციო რეჟიმზე, ხოლო მეოთხე ბავშვთა ბაღში ერთი შემთხვევა დაფიქსირდა. ჯერჯერობით აღნიშნული ჯგუფი ფუნქციონირებს, თუმცა ეპიდემიოლოგის რჩევით გამკაცრებულია მონიტორინგი და ზედამხედველობა ყველა იმ სიმპტომზე, რომელიც არის დამახასიათებელი აღნიშნული დაავადებისთვის.
რა არის ქუნთრუშა?
ეს არის ინფექციური დაავადება, რომელიც ძირითადად ბავშვთა ასაკში ვლინდება, თუმცა შანსი რომ მოზრდილსაც დაემართოს, თუ მას ბავშვობის ასაკში არ აქვს გადატინილი დაავადება, რა თქმა უნდა, არსებობს.
ეპიდემიოლოგიური კვლევის შედეგად გამოვლინდა რომ სიმპტომები ბავშვთა ასაკში მშობლებისათვის ბუნდოვანია, რის გამოც არის თეორიული შანსი იმისა, რომ ინფიცირებული ბავშვი გადამდებლობის პერიოდში გამოუშვან საბავშვო ბაღში. მოხდა გასაუბრება ეპიდემიოლოგიური კვლევის პროცესში საბავშვო ბაღების სამედიცინო პერსონალთან, ჯგუფის აღმზრდელებთან, ბაღების მენეჯერებთან. მიეცათ გაფრთხილება, რომ მკაცრად გააკონტროლონ ბაღში, დილის საათებში, ჯგუფებში დაშვებამდე ბავშვის ჯანმრთელობის მდგომარეობა. ნებისმიერი სიმპტომის გამოვლენის შემთხვევაში საქმის კურსში ჩააყენონ მშობელი და არ დაუშვან აღნიშნული ბავშვები ექიმის ცნობის გარეშე.
რა სიმპტომები აქვს ქუნთრუშას?
იმისთვის რომ მშობლებმა და სამედიცინო პერსონალმა იცოდეს თუ რა სიმპტომებია დამახასიათებელი ქუნთრუშასათვის, ჩამოგითვლით ძირითად სიმპტომებს, რაც ამ დაავადებას ახასიათებს. უპირველესად, აღსანიშნავია ის ფაქტი, რომ ეს არ არის ვაქცინაციით მართვადი დაავადება. გეგმიურ ვაქცინაციაში არ შედის ქუნთრუშას საწინააღმდეგო ვაქცინა მისი არ არსებობის გამო. გამომდინარე იქედან, რომ დაავადება ხასიათდება მაღალი კონტაგიოზურობით განსაკუთრებით სიფრთხილეა საჭირო ბავშვთა ასაკში დამახასიათებელი სიმპტომების გამოვლენისთანავე. საჭიროა, აუცილებლად მივიყვანოთ ბავშვი შესაბამის სპეციალისტთან. ეს არის პედიატრი. ეს არის ბავშვთა ინფექციონისტი, ოჯახის ექიმი. ძირითადად, დაავადება იწყება მწვავედ. ძალიან მაღალი ტემპერატურით 40 გრადუსამდე. ამას თან სდევს ნუშურა ჯირკვლების მწვავე ანთება, ე.წ. ანგინა. ასევე დამახიასეთებელია ზემო ლიმფური ჯირკვლების მტკივნეულობა და გადიდება. შემდეგ იწყება გამონაყარის ფაზა. ეს არის წვრილი, უხვი გამონაყარი რომელიც სახის მიდამოებიდან თანდათან ვრცელდება ტანსა და კიდურებზე. დაავადება ჩვეულებრივი მიმდინარეობის პერიოდში გამოირჩევა იმით რომ სხვა ბავშვთა ინფექციებისგან განსხვავებით იოლი კლინიკა აქვს. სამი დღის შემდეგ გამონაყარი ალაგდება და ჩანაცვლდება ე.წ. აქერცვლის ფაზით, როდესაც კანის ზედაპირის ეპიდერმისი იწყებს აქერცვლას. ხშირად ამას სდევს ქავილი და არის საფრთხე, რომ კანის დაზიანების ან ნაკაწრების შემთხვევაში გარედან მოხდეს ინფექციის შეღწევა ორგანიზმში. ჩვეულებრივი ინკუბაციური პერიოდი გრძელდება ორიდან შვიდ დღემდე და დაავადება ალაგდება ძირითადად გართულებების გარეშე, მაგრამ შანსი იმისა, რომ დაავადების დამძიმება მოხდეს, არსებობს. ამ დროს შეიძლება ანთებითი კერები აღმოცენდეს როგორც ცალკეულ ორგანოებში, ასევე ორგანოთა სისტემებში. მიიღოს ინფექციამ გენერალიზებული ფორმა, ე,წ, სეფსისის სახით. სწორედ ამიტომ დაავადების ნიშნების გამოვლენისთანავე მშობელმა არ უნდა მიმართოს სახლის პირობებში თვითმკურნალობას და წაიყვანოს ბავშვი სპეციალისტთან.
როგორ ვრცელდება ქუნთრუშა?
გადამდებლობა არის ძირითადად ჰაერწვეთოვანი მექანიზმით, ანუ ახლო დისტანციიდან ლაპარაკის, ხველების, დაცემინების შემთხვევაში. გარდა ამისა, ეს შეიძლება იყოს დაბინძურებული საგნების ზედაპირი. განსაკუთრებული მნიშვნელობა აქვს ბავშვთა ასაკში, როდესაც ისინი იმყოფებიან ბავშვთა ბაღებში, ბაგებში ან სკოლების დაწყებით კლასებში, ბავშვებს ძალიან ხშრად აქვთ კონტაქტი დაბინძურებულ ზედაპირთან. ეს შეიძლება იყოს საერთო მაგიდის ზედაპირი, სათამაშოები. ამიტომ ჩვენი ეპიდემიოლოგიური კვლევის პროცესში განსაკუთრებული ხაზი გაესვა იმას, რომ ბავშვთა ბაღებისა და ბაგების პერსონალმა ყოველდღიურად დაამუშავოს სათამაშოები და ოთახის სივრცე, მაგიდის ზედაპირები, სტანდარტის შესაბამისად მოხდეს მისი რეცხვა და დეზინფექცია. ასეთ შემთხვევაში ჩვენ თავიდან ავიცილებთ დაავადების შემთხვევაში მათი გავრცელების საფრთხეს, ლოკალური ეპიდაფეთქებების და ზოგადად, ეპიდემიოლოგიური ფონის დამძიმების საფრთხეს. სხვა შემთხვევაში დაავადება გადატანის შემდეგ ტოვებს მყარ იმუნიტეტს. ერთხელ გადატანის შემდეგ ადამიანს ქუნთრუშა მეორედ აღარ ემართება. განსაკუთრებული ყურადღებაა საჭირო სწორედ მცირეწლოვან ბავშვთა დასაცავად.
კიდევ ერთხელ ვთხოვთ მშობლებს, განსაკუთრებული ყურადღება გამოიჩინონ, რადგან ჩვენს რეალობაში უკვე დაფიქსირდა ქუნთრუშას შემთხვევები. ის არ არის სეზონური ინფექცია, თუმცა სტატისტიკა აჩვენებს, რომ შემოდგომის და ზამთრის პერიოდში მისი რაოდენობა მატულობს. კიდევ ერთხელ ვიმეორებ, რომ ყურადღებაა გასამახვილებელი ბავშვთა ასაკში აღნიშნული დიაგნოზის დროულად დიაგნოსტიკისთვის.
ავტორი: ეპიდემიოლოგი ელზა სიმონიშვილი
