ჩოხატაურის მუნიციპალიტეტის სოფელი ქვაბღა გასულ წელს მომხდარმა სტიქიებმა საკმაოდ დააზიანა. როგორც უკვე ვწერდით, მიწა დაბზარულია, დაზიანებულია როგორც ავტომობილების გადასაადგილებელი გზა, ასევე იქ მცხოვრებლების საკარმიდამო ნაკვეთები. მოსახლეობას ყველა გაწვიმების ეშინია.
გარემოს ეროვნულმა სააგენტომ საინფორმაციო ბიულეტენი „საქართველოში 2023 წელს სტიქიური გეოლოგიური პროცესების განვითარების შედეგები და პროგნოზი 2024 წლისთვის“ მოამზადა, სადაც საუბარი ქვაბღაში შექმნილი მდგომარეობის შესახებაც არის.
“2023 წლის გაზაფხულზე ჩამოყალიბებულმა მეწყრულმა პროცესებმა სერიოზული პრობლემები წარმოშვა. ფერდობი დასახლებულ უბნებში მთლიანად სახეცვლილია მეწყრული რელიეფის მიკროფორმებით, თანაც დანაწევრებულია ეროზიული ჩაჭრებით და მცირეწყლიანი ხევებით, მეწყრული პროცესის მკვეთრი გააქტიურების შედეგად სრულად დაზიანდა სოფელ ზოტში მიმავალი საავტომობილო გზის 70 მ-იანი მონაკვეთი, სადაც გზის ქვემოთ, ფერდობზე წარმოიშვა მეწყრული მოწყვეტის ორი კერა. გაჩნდა მძლავრი ნაპრალები და 0.5-1მ სიმაღლის მოწყვეტის საფეხურები. 12-15 მ-იან ზოლში, 0,5 მ სიმაღლეზე მთლიანად ჩაბარდა გზის პროფილი, რომელიც ამჟამად შემოტანილი ბალასტითაა მოწესრიგებული დროებით სარგებლობისთვის.
უშუალოდ გზის დაზიანებულ მონაკვეთში, ფერდობის ორ უბანზე გაჩნდა მოწყვეტის ფლატე, რომელთა სიმაღლე 10 მ-მდეა. ჩამოშლილი მასალა ნაწილობრივ მდინარემ გარეცხა, დანარჩენი კი მის ნაპირას არის დადაგროვილი მოგლეჯილ დიდმერქნიან ხეებთან ერთად. ფერდობის დაზიანებულ ზოლში გაჩენილია მრავალი მეწყრული ნაპრალი დიგანით 15-20 სმ, რომლებიც ერთმანეთის პარალელურია და გზის ზედა მხარესაც ვრცელდება. ნაპრალთა ქსელი საკმაოდ ხშირია, რაც ფერდობის მდგრადობის მკვეთრ დაქვეითებაზე მიუთითებს.
ფერდობის მდგრადობის კიდევ უფრო გაუარესების თავიდან ასაცილებლად, ამ ეტაპზე რეკომენდებულია მთლიანად შეიზღუდოს მძიმეწონიანი სატვირთო მანქანების გადაადგილება. საჭიროა მოეწყოს საგზაო ნიშნები ორივე მხრიდან, დაზიანებული მონაკვეთისა და გზის სავალი ზოლის შევიწროების მითითებით. მაქსიმალურად უნდა იქნას არიდებული ზედაპირული ნაკადების დაზიანებულ უბნებზე გადასვლა, მეწყრულ გრუნტში ინფალტრირების მინიმუმამდე დასაყვანად. საჭიროა ჩატარდეს ტერიტორიის (უბნის) დეტალური საინჟინრო-გეოლოგიური კვლევა, რის შედეგებზე დაყრდნობით მომზადებული პროექტი უნდა დაედოს საფუძვლად მეწყერსაწინააღმდეგო ღონისძიებების დასახვა-გახორციელებას”,_ ნათქვამია გარემოს ეროვნული სააგენტოს მიერ მომზადებულ გეოლოგიურ ბიულეტენში.
უფრო ვრცლად, გურიაში არსებული მდგომარეობის შესახებ, “გურია ნიუსი” მალე გიამბობთ.
