ჩვენს ეზოებზე, განსაკუთრებით გაზაფხულზე უნდა ვიზრუნოთ, რომ იქ მთელი წლის მანძილზე ნაირფერი ყვავილები ყვაოდეს და სილამაზის გარდა, ეს ყველაფერი განწყობას გვიმაღლებდეს.
ყვავილნარების კომპოზიციაში მცენარეთა გარეგნული აღნაგობის, მისი ფოთლებისა და ყვავილის ფერთა ჰარმონიული კონტრასტების მიღება შეიძლება მხოლოდ მაშინ, როდესაც ძირითადი ფერის (ყვითელი, წითელი, ლურჯი) ყვავილის გვერდით ირგვება ისეთი გარდამავალი ფერის მცენარე (ნარინჯისფერი, მწვანე, იისფერი), რომლის შექმნაში აღნიშნული ძირითადი ფერი არ იღებს მონაწილეობას. მაგალითად, კარგად ეხამება ერთმანეთს აქტიური ფერის (ყვითელი, ნარინჯისფერი, წითელი) მცენარეულობა. პასიურებს შორის კი (მწვანე, ლურჯი, იისფერი) წითელი _ მწვანეს, ყვითელი _ იისფერს და ლურჯი _ ნარინჯისფერს.
რაბატების, კლუმბების თუ პარტერების მოწყობა იგივე ხელოვნებაა. აქ ერთმანეთს უნდა შევუხამოთ მხატვრული გემოვნება და პრაქტიკული გამოცდილება. მცენარეთა ასორტიმენტი _ ეს მხატვარი მებაღის პალიტრაა, საიდანაც მან უნდა შეარჩიოს და შეაზავოს ფერები, თუ გვინდა, რომ ჩვენი კარმიდამო განსაკუთრებით ლამაზი იყოს.
დავიხსომოთ, რომ როცა ყვავილებს ვთესავთ ან ვრგავთ, თავიდანვე უნდა გავითვალისწინოთ მათი ფერები და ურთიერთშეხამება. სპექტრის ფერების თითოს გამოშვებით შეხამება, მაგალითად წითელი _ ყვითელთან ან ლურჯთან, ნარინჯისფერი _ მწვანესთან ან იისფერთან არასასიამოვნოა. მართალია, დასაშვებია ფერთა ასეთი შეხამება, მაგრამ ის არ მოგცემთ ისეთ ჰარმონიულ თანაფარდობას, რასაც კონტრასტული ფერების შეხამებისას აქვს ადგილი.
სრულიად დაუშვებელია ბაღში სპექტრის მოსაზღვრე ფერების შეხამება, მაგალითად, ნარინჯისფერი _ ყვითელთან, ლურჯი _ მწვანესთან, ან იისფერთან და ა. შ. ფერთა ასეთი არასასიამოვნო თანაფარდობა თუ მაინც და მაინც გექნებათ ყვავილნარში, მაშინ შესარბილებლად შუალედებში დარგეთ ან დათესეთ თეთრი, ლეგა, ვერცხლა ცერასტუმი ან ცინერანიები (ჩვენ ხშირად ფერად ცინიებს რომ ვეძახით).
ყვავილნარებისთვის სასურველია შევარჩიოთ ისეთი მცენარეები, რომლებიც ერთნაირ მოთხოვნას უყენებენ ნიადაგს, ტენს, სინათლეს. დასავლეთ საქართველოს ზონაში, შავი ზღვის რაიონებში განსაკუთრებით, მცენარეები უნდა შევარჩიოთ იმგვარად, რომ მთელი წლის განმავლობაში თუ არა, 7-8 თვის მანძილზე განუწყვეტლივ ყვავილობდნენ. არის ასეთი უამრავი ვარდი, ცინიები, საოცარი კალენდულა, გეორგინები და სხვა. ყვავილისა და ფოთლის ფერებთან ერთად, მხედველობაში უნდა გვქონდეს ყვავილის სიმაღლე და ფორმა, რომლის მიხედვითაც უნდა განვათავსოთ გვერდი-გვერდ.
ყვავილნარის მოწყობისას, ბაღის ცენტრალურ ნაწილში, სურათის ძირითად და მთავარ დეტალებში, კონტურის თვალსაჩინოების განმსაზღვრელად გამოიყენება აქტიური ფერები (წითელი, ნარინჯისფერი და ყვითელი).
ყვავილები დარგეთ ღრუბლიან დღეს, დილით ან საღამოს. თუ საკუთარი ნათესი გაქვთ და იქედან გადაგაქვთ ნერგები, ჯერ კარგად მორწყეთ და მერე გადააყოლეთ მიწის მოზრდილი გუნდა. ერთი სახის ყვავილები ჭადრაკისებური ან კვადრატული ფორმით დარგეთ, მანძილის ზუსტი დაცვით. ძალიან ლამაზი იქნება ხალიჩოვანი ყვავილნარის ცენტრში თუ დარგავთ მოზრდილ ტროპიკულ (აგავა, დაფნა, ფინიკის პალმა, ბანანი, იუკა და სხვა) მცენარეს, რომლის ირგვლივ უფრო დაბალი და ყვავილოვანი მცენარეები უნდა გაანაწილოთ. ყველა ვიწრო ზოლი, ხაზი და ბორდიური ფოთლოვან-ხალიჩოვანებით შეავსეთ, ხოლო ფართო ადგილებზე ხშირყვავილოვანები დარგეთ.
ყვავილნარის მოვლა არც ისე ადვილია. მშრალ ამინდში ყოველ დილა-საღამოს მორწყეთ. წვიმების და ხშირი მორწყვის დროს ყვავილნარის მიწა იტკეპნება, მიწის ზედაპირი იკვრება, რაც ხელს უწყობს ნიადაგიდან ტენის აორთქლებას. ამიტომ ავიღოთ ფანქრის ზომის წვეტიანი ჯოხი ან სპეციალურად ამოვთალოთ და გავაფხვიეროთ მიწა. იყიდება წვრილპირიანი სპეციალური თოხებიც. რეგულარულად ამოვყაროთ ფესვიანად სარეველა მცენარეები. მიწა გავამდიდროთ დამატებითი საკვებით _ სასუქებით, რომ ჩვენი ბაღი მუდამ ალამაზებდეს და ამშვენებდეს სამყაროს, სადაც ვცხოვრობთ.
