“ყველა პაციენტი იტესტება”- ვითარება ჩოხატაურის საავადმყოფოში

ჩოხატაურში ეპიდვითარება თითქოს დასტაბილურდა, ინფიცირების ყოველდღიური შემთხვევები  იკლებს, მაგრამ ჯანდაცვის ექსპერტები ამბობენ, რომ დამშვიდების საფუძველი არ არსებობს.

რა ვითარებაა ჩოხატაურში მდებარე საავადმყოფოში  „ჯანმრთელობის სახლი გურიაში“, როგორია მოსახლეობის მიმართვიანობა ტესტების გასაკეთებლად_ ამის გასარკვევად კლინიკის დირექტორს, თემურ კოროშინაძეს დავუკავშირდით.

კოროშინაძის თქმით, სამედიცინო დაწესებულება ამ ეტაპზე კოვიდკლინიკად არ არის გადაკეთებული და იქ მხოლოდ სწრაფი ტესტის ჩატარებაა შესაძლებელი კოვიდ-19-ზე.

„ჯანმრთელობის სახლი გურიაში ამ ეტაპზე კოვიდკლინიკად არ გადაკეთებულა. სტაციონარში შემოსული ყველა პაციენტი იტესტება. პაციენტები, რომლებიც მოგვმართავენ  ოჯახის ექიმის რეკომენდაციით ან თვითდინებით, ისინიც იტესტებიან. ტესტირება უფასოა.

არის დღეები, როცა მომართვიანობა მაღალია, არის დღეები, როცა მომართვიანობა იკლებს. თუ სტაციონარში პაციენტების დიდი რაოდენობა შემოვიდა, შესაბამისად მეტი ტესტი ტარდება და სხვა შემთხვევაში დამოკიდებული ვართ თუ რა რაოდენობა მოგვმართავს  მოქალაქეების“,_ გვითხრა თემურ კოროშინაძემ.

ცნობისთვის,

„ანტიგენის ტესტირებას ექვემდებარება როგორც სიმპტომებიანი, ასევე უსიმპტომო პაციენტები, ანუ ტესტი  ჩაუტარდება ნებისმიერ მოქალაქეს, რომელიც მოგვმართავს, ექიმის მიმართვის არქონის, ან სიმპტომების არქონის გამო არავის არ ეთქმება უარი.

ანტიგენის ტესტირებას დაექვემდებარა ტაქსის მძღოლები.

 ანტიგენის ტესტირებას დაექვემდებარა ღია და დახურული ტიპის ბაზრობების მოვაჭრეები.

რელიგიის მსახურები – ტესტირებას დაქვემდებარებულ ჯგუფებს განეკუთვნება არა მხოლოდ მოძღვარი, არამედ სტიქაროსნები, მედავითნეები, მგალობლები, მესანთლეები, რომლებსაც უშუალო კონტაქტი აქვთ მრევლთან.”