ინფექციური ერითემა, ანუ იგივე ,,მეხუთე დაავადება“ , ისევე, როგორც ,,მეექვსე დაავადება არის ვირუსებით გამოწვეული ინფექციური დაავადებები,_ ამის შესახებ ოზურგეთის საზოგადოებრივი ჯანდაცვის ცენტრის ეპიდემიოლოგმა ელზა სიმონიშვილმა “გურია ნიუსთან” საუბრისას განაცხადა.
როგორც ეპიდემილოგი ამბობს, ამ ორი ვირუსული დაავადებიდან , განსაკუთრებით საყურადღებო გახლავთ ,,მეხუთე დაავადება,“ რადგან ბავშვთა და მოზარდთა კოლექტივებში არსებობს მისი გავრცელების უფრო მეტი ალბათობა.
“დაავადება გადამდებია, ჰაერწვეთოვანი გზით. მისი გავრცელების სიხშირე სხვა ინფექციებთან, მაგ. წითელასთან შედარებით, გაცილებით დაბალია, თუმცა, მჭიდრო კონტაქტისას, დახურულ გაუნიავებელ შენობასა და სათავსში, სადაც რამდენიმე საათის განმავლობაში უწევთ დაყოვნება მოზარდებს, გადადების ალბათობა რათქმაუნდა, იზრდება”,_ ამბობს სიმონიშვილი.
რაც შეეხება აღნიშნული დაავადების სიმპტომებს, სიმონიშვილის თქმით, სიმპტომი მწვავე რესპირატორული ინფექციის მსგავსია, მაგრამ არის შემთხვევები, როცა უსიმპტომოდ მიმდინარეობს.
“ვიდრე დაავადების ძირითადი კლინიკური სურათი გამოვლინდება, სიმპტომი არის მწვავე რესპირატორული ინფექციის მსგავსი. ხშირად დაავადება მიმდინარეობს უსიმპტომოდ, ან ძალიან სუსტი სიმპტომებით. მეხუთე დაავადების გამოვლინების პირველი და მთავარი, სადიაგნოსტიკო ნიშანია შეწითლებული ლოყები. დაავადება ითარგმნება, როგორც „სილაგაწნული ლოყა”.(დამახასიათებელი სიწითლის გამო). ის ძალიან გავს – ჭინჭრის ციებას, მეორე-მესამე დღიდან დაავადება ვრცელდება ზედა კიდურებზე, უკვე დუნდულებსა და ბარძაყებზე გამონაყრის სახით. მთავარი განმასხვავებელი ნიშანი, რასაც ყურადღება უნდა მივაქციოთ, არის ის, რომ მეხუთე დაავადებას, ალერგიისგან განსხვავებით, ქავილი არ ახლავს თან. ზოგჯერ შესაძლებელია, გამონაყარი გაქრეს და შემდეგ ისევ განვითარდეს, რასაც ხელს უწყობს მზის გამოსხივება და ტემპერატურის ცვლილებები. მოზრდილ ასაკში ადამიანებმა ყოველგვარი გამონაყრის გარეშე შეიძლება, გადაიტანონ ეს ვირუსი. ამ შემთხვევაში კლინიკურად ეს გამოვლინდება ვირუსული ართრიტების, ანუ სახსრების ანთების სახით”,_ ამბობს ეპიდემიოლოგი.
როგორც ელზა სიმონიშვილი აღნიშნავს, დიაგნოსტირების შემდეგ, დაავადების მიმდინარეობისას პაციენტი არ უნდა ჩახურდეს, საზიანოა მისი ჩახუთულ გარემოში ყოფნა.
გარდა ამისა, მშობლებმა უნდა გაითვალისწინონ, რომ ცხელი წყლის აბაზანა პროვოცირებს დაავადებაზე და უფრო მეტად გააწითლებს პაციენტს.
ეპიდემილოგის თქმითვე, სიწითლეს ხელს უწყობს მზის სხივების გამოსხივებაც, ამიტომ, პაციენტი ულტრაისფერ სხივებს გარკვეული პერიოდით უნდა მოერიდნონ.
“აქვე უნდა გავამახვილოთ ყურადღება, რომ როგორც წესი, ბავშვის ზოგადი მდგომარეობა უმჯობესდება გამონაყრის გაჩენის შემდეგ. ასევე უნდა ვიცოდეთ,რომ გამონაყრის გაჩენის შემდეგ მეხუთე ვირუსს გადამდებობა ეკარგება.
ორსულობის დროს ინფექციური ერითემა შესაძლებელია, საშიში აღმოჩნდეს ნაყოფისთვის – შექმნას პრობლემები ნაყოფის შეშუპების სახით და ასევე, გამოიწვიოს მკვდარშობადობა, ნაადრევი აბორტი.
თუ ორსულს უწევს კონტაქტი მეხუთე დაავადების მქონე ადამიანთან, აუცილებლად ხშირად უნდა მიმართოს გინეკოლოგს და ჩაიტაროს გამოკვლევები”,_ ამბობს ეპიდემიოლოგი.
რაც შეეხება ე.წ. ,,მეექვსე დაავადებას“, იგივე როზეოლას, ელზა სიმონიშვილის თქმით, ეს უფრო მეტად მცირე ასაკის ბავშვთა დაავადებაა.
“მას უეცარ ეგზანთემას უწოდებენ. გამონაყარი ამ დაავადების დროს უეცრად ვლინდება, ,,მეექვსე დაავადების“ გამომწვევია – მე-6 ტიპის ჰერპესის ვირუსი. დაავადება ჩვეულებრივ დაახლოებით ექვსი დღე მიმდინარეობს. მოზრდილებში იწვევს ქრონიკული დაღლილობის სინდრომს. გადატანილი დაავადების შემდეგ ყალიბდება მყარი იმუნიტეტი.
ბავშვისთვის დამახასიათებელია მაღალი ტემპერატურა (ზოგჯერ 39.5-ზე მეტი) რასაც შეიძლება თან დაერთოს ცხვირიდან გამონადენი, შეშუპებული ქუთუთოები, კისრის ლიმფური კვანძების გადიდება,უმადობა, გაღიზიანებადობა და თხიერი განავალი. ბავშვს ცხელება დაახლოებით 3-5 დღე აღენიშნება, შემდეგ კი ტემპერატურა იკლებს და თავს იჩენს გამონაყარი, რომელიც ძირითადად ლოკალიზებულია კისერზე, სახეზე, ზედა და ქვემო კიდურებზე. იგი რამდენიმე საათიდან რამდენიმე დღემდე გრძელდება”, _ ამბობს სიმონიშვილი.
რაც შეეხება ინფექციის გავრცელების გზებს, ეპიდემიოლოგი ამბობს, რომ ეს ინფექციაც ვრცელდება ლაპარაკის, ხველების, ცემინების დროს, თუმცა გადამდებია მხოლოდ ცხელების ფაზაში და არა მაშინ, როცა კანზე უკვე გამონაყარი ვლინდება. დაავადების გადატანის შემდეგ იმუნიტეტი მთელი ცხოვრების მანძილზე ნარჩუნდება
“აღნიშნული ვირუსული დაავადებების თავიდან ასაცილებლად განსაკუთრებული ყურადღება მართებთ მშობლებსა და საბავშვო დაწესებულებების ხელმძღვანელებს, რათა არ მოხდეს დაავადებების (განსაკუთრებით ,,მეხუთე დაავადების“ ) მასიური გავრცელება ბავშვთა დაწესებულებებში, რადგან მეხუთე დაავადების აფეთქების პერიოდი უფრო გაზაფხული და შემოდგომაა.
ამიტომ გთხოვთ, დამახასიათებელი სიმპტომების დაფიქსირებისას მიმართოთ შესაბამის სპეციალისტს (ოჯახის ექიმსა და ინფექციონისტს), თავი შეიკავოთ ბავშვთა დაწესებულებებში მოავადე ბავშვების მიყვანისგან. ეს ძირითადად ეხება სხვადასხვა სკოლისგარეშე აქტივობებს, სადაც ნაკლებად ხდება ბავშვთა და მოზარდთა ჯანმრთელობის შეფასება სამედიცინო პერსონალის არარსებობის გამო, რაზედაც აღნიშნულ დაწესებულებებში მენეჯერებმა უნდა გააფრთხილონ ბავშვებთან მომუშავე პერსონალი!
ხოლო დანარჩენ ბავშვთა დაწესებულებებსა და ზოგადსაგანმანათლებლო სკოლებში, ვთხოვთ სკოლების სამედიცინო პერსონალს, რომ სისტემატიურად, რუტინულად განახორციელონ ყოველდღიური მონიტორინი ბავშვთა და მოზარდთა ჯანმრთელობის მდგომარეობის შესაფასებლად, ბავშვთა შორის ვირუსული ინფექციების გავრცელების თავიდან ასაცილებლად!”_ განაცხადა სიმონიშვილმა.
