ფინანსური პოლიციის და ხელისუფლების ყოფილი მაღალჩინოსნები, ბიზნესპარტნიორები, ჯამში, დაახლოებით, 10-მდე ადამიანის დაკითხვას მთავარი პროკურატურისგან ქონებაჩამორთმეული რამაზ ახვლედიანი ისევ უშედეგოდ ითხოვს. ლისის ტბის საქმეზე დაწყებული სისხლის სამართლის გამოძიების შედეგები, კი ამ დრომდე არ დადებულა, საგამოძიებო უწყება არც დასაკითხ პირთა და არც გამოძიების შედეგების შესახებ ინფორმაციას ისევ არ ამხელს.
შეგახსენებთ, რომ „გურია ნიუსმა“ აღნიშნულ საქმესთან დაკავშირებით ჟურნალისტური გამოძიება რამდენიმე თვის წინ დაიწყო. ჩვენს მიერ მოპოვებული და გამოქვეყნებული დოკუმენტაციიდან ირკვევა, რომ 2006 წელს, რამაზ ახვლედიანს საკუთრებაში არსებული ლისის ტბის მიმდებარე ტერიტორია, ფინანსური პოლიციის ყოფილი უფროსის კაბინეტში იძულებით, ზეწოლით დაათმობინეს, თუმცა, ეს გარემოება სასამართლომ არ გაითვალისწინა და მტკიცებულებად არ მიიღო წერილი, რომელიც მას, როგორც თვითონ ამბობს, იძულებით პრეზიდენტის სახელზე დააწერინეს. წერილის მიხედვით, ახვლედიანი თმობდა საკუთრებაში არსებულ, უკვე გამოსყიდულ ქონებას, სანაცვლოდ კი, მას კომპენსაცია უნდა მიეღო. თუმცა, დღემდე არც კომპენსაცია მიუღია და ქონებაც ვერ დაიბრუნა.
ბიზნესმენის განცხადებიდან მე-6 დღეს, 2006 წლის 10 ნოემბერს, ყოფილმა პრეზიდენტმა, მიხეილ სააკაშვილმა გამოსცა ახალი განკარგულება და 1999 წელს რამაზ ახვლედიანის მიერ შეძენილი და 2006 წელს კი, პრეზიდენტის განკარგულებითვე გადაცემული ქონება ჩამოართვა. მოგვიანებით კი, იგივე ქონება, რომელიც მაშინ ეკონომიკის სამინისტროს ბალანსზეც კი არ აუყვანია, რამაზ ახვლედიანის ბიზნესპარტნიორს, მამუკა ხაზარაძეს გადასცა, რომლის კომპანიაც ლისის ტბის ამ ნაწილს დღემდე ფლობს.
2012 წელს, ხელისუფლების შეცვლის შემდეგ ბიზნესმენმა რამაზ ახვლედიანმა გამოძიების მოთხოვნით მთავარ პროკურატურას მიმართა, თუმცა საქმე ამ დრომდე ძიებაშია და ახვლედიანი დაზარალებულადაც კი არ არის ცნობილი.
როგორც „გურია ნიუსმა“ გაარკვია, ახვლედიანი და მისი უფლებების დამცველი ადვოკატი არჩილ კაიკაციშვილი ცოტა ხნის წინ მთავარი პროკურატურის გამომძიებელს შეხვდნენ, თუმცა, როგორც კაიკაციშვილი ჩვენთან საუბრისას აღნიშნავს, გამოძიების შედეგებით უკმაყოფილოა.
„ლისის ტბის“ საქმეზე რამდენიმე კვირის წინ შევხვდით მთავარი პროკურატურის გამომძიებელს. თუმცა, მისივე მონათხორბიდან გამომდინარე, შეგვიძლია ვთქვათ, რომ გამოძიება წინ არ წასულა. ჯერჯერობით ისევ არ დაუკითხავთ მოწმეები რომელთა დაკითხვასაც ბატონი რამაზ ახვლედიანი ითხოვს. კერძოდ, მისი ბიზნესპარტნიორი მამუკა ხაზარაძე და ის პირები, რომლებიც ინფორმირებულები იყვნენ და არიან, თუ როგორ ჩამოართვეს იიძულებით ლისის ტბა ახვლედიანს.
მამუკა ხაზარაძის დაკითხვა ემსახურება მნიშვნელოვან იურიდიულ ინტერესს, ვინაიდან რამაზ ახვლედიანის მიმართ ქონების დათმობის შემდეგ, პრეზიდენტის განკარგულებით, იგივე საპროექტო პირობებით, დათმობილი ქონების მესაკუთრე გახდა ხაზარაძე და მისი კომპანიები. შესაბამისად, მისი დაკითხვა საქმის ყოველმხრივ შესწავლისა და გამოძიებისთვის, არის არსებითად მნიშვნელოვანი.
ასევე, დაიკითხოს ირაკლი კილაურიძე, რომელიც წარმოადგენდა კომპანია „ჯიარდისის“ გენერალურ დირექტორს. აღნიშნული პიროვნება სრულად ფლობდა ინფორმაციას, ქონების რ. ახვლედიანის მხრიდან დათმობის თუ შემდგომი განკარგვის პროცესის თაობაზე, ვინაიდან მ. ხაზარაძესა და რ.ახვლედიანს შორის გამართული თითქმის ყველა საქმიანი მოლაპარაკების მონაწილე და მ. ხაზარაძის ნდობით აღჭურვილი პირი გახლდათ ირაკლი კილაურიძე.
საქმეში იკვეთება შპს „ლისი ლეიქ დეველოპმენტისა“ და შპს „ფროფერთი დეველოპმენტ ჰოლდინგის“პარტიონრების მხრიდან შესაძლო არაკეთილსინდისიერება, განსაკუთრებით, მამუკა ხაზარაძის მხრიდან, რომელიც რამაზ ახვლედიანის მოქმედი და ყოფილი პარტნიორია და მათ დაგეგმილი ჰქონდათ ერთად გაეუმჯობესებინათ ლისის ტბისა და მიმდებარე ტერიტორიის მდგომარეობა.
საქმის მასალებიდან დგინდება, რომ ქონების ჩამორთმევის საკითხი მტკივნეული აღმოჩნდა მხოლოდ რამაზ ახვლედიანისათვის, მამუკა ხაზარაძე კი, დღემდე სადავო ქონების თაობაზე დუმს“, _ ამბობს კაიკაციშვილი.
ანალოგიური პოზიცია აქვს რამაზ ახვლედიანის უფლებების დამცველ მეორე ადვოკატს მზევინარ ანსიანსაც. როგორც ანსიანმა „გურია ნიუსს“ განუცხადა, პროკურატურამ ამ 5 წლის განმავლობაში ვერ მოახერხა მოწმეების დაკითხვა და იმის დადგენა, არის თუ არა რამაზ ახვლედიანი დაზარალებული. ანსიანი განმარტავს, რომ პროკურატურას გამოძიების პროცესში არანაირი ვადები არ აქვს და შესაძლოა, ეს გამოძიება კიდევ წლები გაგრძელდეს.
„პროცესი გაჭიანურებულია და გამოძიებას ხელჩასაჭიდი შედეგი არ აქვს. როგორც იცით, მთავარ პროკურატურას ხელისუფლების შეცვლისთანავე მივმართეთ, 2012 წლის დეკემბერში. იმის მერე მიმდინარეობს ეს გამოძიება, მაგრამ სწრაფად და ეფექტურად ნამდვილად არა. დროში გაჭიმულია პროცესი. პროკურატურას გამოძიების პროცესში არანაირი ვადები არ აქვს და, შესაძლოა, ეს გამოძიება კიდევ წლები გაგრძელდეს.
როგორც პროკურატურაში აცხადებენ, ამ ეტაპისთვის ისევ მიმდინარეობს საგამოძიებო მოქმედებები, დოკუმენტების გამოთხოვა–დამუშავება, რის გამოც, ჯერჯერობით არ დაკითხულან სხვა მოწმეები. ასე იყო რამდენიმე თვის. ბოლო ინფორმაცია რაც მაქვს ის არის, რომ დაკითხულია ნოტარიუსი ციური ბერიძე, რომელმაც რამაზ ახვლედიანის ქონების დათმობაზე იძულებით დაწერილი განცხადება დაამოწმა. ამის შემდეგ პროკურატურა წინ არ წასულა და არც სხვა მოწმეები დაუკითხავს.
ვერავინ გეტყვით, იმას თუ რა ვადებში შეიძლება დასრულდეს გამოძიება, ან როდის შეიძლება დაზარალებულად ცნონ რამაზ ახვლედიანი, თუმცა, ახვლედიანის მიმართ რომ დაირღვა უფლებები და ის იყო ძალადობის და უკანონობის მსხვერპლი, ამაზე ორი აზრი არ არსებობს“, _ აღნიშნავს ანსიანი.
ლისის ტბის და რამაზ ახვლედიანის საქმესთან დაკავშირებით მთავარი პროკურატურა ჯერჯერობით დუმილს ამჯობინებს, როგორც „გურია ნიუსს“ პროკურატურიდან აცნობეს, მიმდინარეობს საგამოძიებო მოქმედებები, თუმცა იმის გამო, რომ მედიასაშულება პროცესის მონაწილე მხარე არ არის, დეტალების გამხელისგან თავს იკავებენ.
რას ითხოვს დაზარალებული ბიზნესმენი, ვის ინტერესებზე საუბრობს საკუთარი ქონების იძულებით დათმობის საქმეში და რა გარიგებაზე შეიძლება წავიდეს ის სახელმწიფოსთან, _ ამ და სხვა საკითხებზე „გურია ნიუსი“ რამაზ ახვლედიანს ინტერვიუს ხვალ შემოგთვააზებთ.
ამავე თემაზე:
შუაღამისას „საკუთარი ნებით დათმობილი” ქონება, ანუ როგორ დაკარგა ბიზნესმენმა „ლისის ტბა“ – ნაწილი I
მაღალჩინოსნები და ბიზნესმენები დასაკითხ პირთა სიაში _ რა ეტაპზეა ლისის ტბის საქმის გამოძიება
უპასუხო კითხვები ლისის ტბის საქმეში
ლისის ტბის ყოფილი მეპატრონე ბიზნეს-პარტნიორის დაკითხავს ითხოვს
როგორ აღმოჩნდა ყოფილი მფლობელისთვის წართმეული ლისის ტბა მამუკა ხაზარაძის საკუთრებაში
ლისის ტბის საქმეზე პროკურატურამ მნიშვნელოვანი მოწმე დაკითხა
რა ახალი მტკიცებულებები დაურთო სასამართლომ ლისის ტბის წართმევის საქმეს
რა ახალი მტკიცებულებები დაურთო სასამართლომ ლისის ტბის წართმევის საქმეს
