გასულმა წელმა ჩოხატაურს თავი არა ერთი სტიქიით დაამახსოვრა, რომელმაც მუნიციპალიტეტს საკმაოდ დიდი ზარალი მიაყენა და ძნელი გამოწვევების წინაშე დააყენა. ყურადღებას იქცევდა ინფრასტრუქტურული სამუშაოებიც, რომელთა შორის პრემიერ-მინისტრის მიერ ინიცირებული პროექტის _ “განახლებული რეგიონების” ფარგლებში მიმდინარე სამუშაოები კრიტიკის ობიექტად იქცა.
რა გაკეთდა გასულ წელს ჩოხატაურში და რა გამოწვევების წინაშე დგას მუნიციპალიტეტი, რისი გაკეთება იგეგმება წელს _ ამ საკითხების შესახებ “გურია ნიუსი” ჩოხატაურის მუნიციპალიტეტის მერს, დავით შარაშიძეს ესაუბრა.
ჩოხატაურის მერის შეფასებით, 2023 წელი მუნიციპალიტეტისთვის საკმაოდ ნაყოფიერი აღმოჩნდა და უპრეცედენტო რაოდენობის ინფრასტრუქტურული სამუშაოები გახორციელდა.
“2023 წელი საკმაოდ ნაყოფიერი გამოდგა _ დაგეგმილი ინფრასტრუქტურული პროექტები 100%-ით შესრულებულია, გარდა ამისა, დაუგეგმავი პროექტებიც შევასრულეთ , _ ამბობს შარაშიძე და განმარტავს, _ ანუ მუნიციპალიტეტს ინფრასტრუქტურული სამუშაოებისთვის რამდენი თანხაც ჰქონდა გამოყოფილი ბიუჯეტიდან, იმ თანხაზე მეტი ღირებულების პროექტები გახორციელდა და დაფინანსდა.
ჩოხატაურის მერის თქმით, ასეთი მასშტაბის პროექტები არც ერთ წელს არ გახორციელებულა:
“ჯამში, რეგიონებში გასახორციელებელი პროექტების ფონდიდან შემოსულობები განისაზღვრა რვა მილიონ ოცდახუთი ათასი ლარით, რაც უპრეცედენტო ციფრია ჩოხატაურის მუნიციპალიტეტისთვის _ ასეთი მასშტაბის ინფრასტრუქტურული პროექტები არც ერთ წელს არ გახორციელებულა”, _ ამბობს ჩოხატაურის მერი.
რაც შეეხება სტიქიისგან გამოწვეულ ზარალს, 2023 წელს სტიქიის შედეგების სალიკვიდაციო ღონისძიებების ფარგლებში მუნიციპალიტეტში ხუთ მილიონამდე ლარი შევიდა, რაც, შარაშიძის თქმით, ასევე, უპრეცედენტო ციფრია:
“ჩვენ დაახლოებით 350 ოჯახი უზრუნველვყავით შესაბამისი თუნუქის და ხეობის მასალით, 45 სოციალურად დაუცველი და შეჭირვებული ოჯახის სახლი გადაიხურა”, _ ამბობს შარაშიძე.
რაც შეეხება პრემიერის მიერ ინიცირებულ პროექტს _ “განახლებულ რეგიონებს, როგორც შარაშიძემ გვითხრა, გათვალისწინებული სამუშაოები თითქმის დასრულებულია და ამჟამად პროგრამის მესამე ეტაპი მიმდინარეობს.
“პრემიერ-მინისტრის ინიცირებული პროგრამა “განახლებული რეგიონები” ჩოხატაურში თითქმის უკვე დასრულებულია. ამ პროექტმა მთლიანად შეცვალა ჩვენი ჩოხატაურის იერსახე _ მთლიანად გამოიცვალა ცენტრალური მოედანი, ღობეები და ჭიშკრები, ბორდიურები, ფილები, სრულად რეაბილიტირდა ანა კალანდაძის და ნოდარ დუმბაძის სკვერები. პროგრამას დაემატა მესამე ეტაპი და ახალი პროექტები. კერძოდ, მესამე ეტაპზე ჩაისვა 9 აპრილის სკვერის რეაბილიტაცია. ცნობისთვის, ამ პროექტში რაც იყო უკვე დაფინანსებული, არ შედიოდა 9 აპრილის სკვერის რეაბილიტაცია და სხვა სამუშაოები, რასაც ამ წუთებში ახორციელებენ. ამიტომ შემიძლია ვთქვა, რომ ამ პროექტის მესამე ეტაპი დაიწყო, რომლის დასრულების შემდეგ უფრო მეტად გალამაზდება ჩვენი ჩოხატაური. ეს იყო ყველაზე მასშტაბური პროექტი, რაც ჩოხატაურში აქამდე გახორციელებულა და ჩვენი ჩოხატაურელებისთვის მიცემული კიდევ ერთი პირობა შესრულებულია”, _ თქვა შარაშიძემ.
ჩოხატაურის მერმა ჩვენთან საუბრისას აღნიშნა, რომ მართალია, 2023 წელს არა ერთ სოფელში მოეწყო საგზაო ინფრასტრუქტურა, მაგრამ 2024 წელს წინ კიდევ უფრო მეტი გამოწვევებია:
“ჩვენ ჩოხატაურში ისეთ ადგილებში შევედით საგზაო ინფრასტრუქტურით, ბეტონის, ასფალტის საფარით, სადაც პრაქტიკულად არ არსებობდა გზა. ჩვენს მოქალაქეებს ვპირდებით, რომ 2024 წელს საგზაო ინფრასტრუქტურის მოსაწყობი კიდევ უფრო მეტი პროექტი იქნება. ძალიან ბევრი საქმე გავაკეთეთ 2023 წელში, მაგრამ 2024 წელს, წინ კიდევ უფრო მეტი გამოწვევა და ბევრი საქმეები გველოდება”, _ აღნიშნა ჩოხატაურის მერმა.
როგორც დავით შარაშიძე აკონკრეტებს, წელს უნდა მოწესრიგდეს ზოტის ცენტრალური გზა, ასევე, საჭამიასერი-ზემოხეთის დამაკავშირებელი გზა, ხოლო ბახმაროს გზაზე მეორე საფარი უნდა დაიგოს:
“წელს მუნიციპალიტეტისთვის მნიშვნელოვანი გამოწვევა არის ზოტის ცენტრალური გზა; ასევე, განსაკუთრებით მინდა აღვნიშნო, რომ ძალიან მნიშვნელოვანია საჭამიასერი-ზემოხეთის შემაერთებელი ცენტრალური 4-კილომეტრიანი გზა, რომელიც საკმაოდ ფართო და მნიშვნელოვანია. ბევრი ადამიანი სარგებლობს ამ გზით და წელს მისი რეაბილიტაცია დაიწყება. ასევე, თითქმის ყველა სოფლებში შევდივართ ახალი საგზაო ინფრასტრუქტურით. აქვე დავამატებ, რომ 2023 წელს დასრულდა საგზაო დეპარტამენტის პროექტის _ ვან ზომლეთი-ამაღლების ცენტრალური გზის მონაკვეთის სამუშაოები. ასევე, ასფალტის პირველი საფარის დაგება დასრულდა მთლიანად ბახმაროს გზაზე, რომელსაც, ასევ,ე საგზაო დეპარტამენტი ახორცილებს და 16-მილიონიანი პროექტია. როგორც კი თოვლი გადნება და ამინდები ხელს შეგვიწყობს, ასფალტის მეორე საფარის დაგებასაც დავიწყებთ და ეს პროექტიც წარმატებით დასრულდება”, _ თქვა დავით შარაშიძემ.
ავტორი
