“ნატოსა და ევროკავშირის შესახებ საინფორმაციო ცენტრში” ევროკავშირის კლიმატის დიპლომატიის კვირეულის ფარგლებში ჟურნალისტებისთვის საინფორმაციო შეხვედრა გაიმართა.
შეხვედრა ევროკავშირის ელჩმა იანოშ ჰერმანმა გახსნა, რომელმაც სიტყვით გამოსვლისას აღნიშნა, რომ საქართველოში ერთ სულ მოსახლეზე ჰიდროელექტრო რესურსების გავრცელება დაბალია, თუმცა საქართველოს გაუმართლა, რომ განვითარებადი ელექტრორესურსები აქვს.
საქართველოში კლიმატური ცვლილებების გამომწვევ მიზეზებსა და მის შედეგებზე „გურია ნიუსს“ მდგრადი განვითარების ცენტრ „რემისიას“ წარმომადგენელი, მარინა შვანგირაძე ესაუბრა.
როგორც შვანგირაძე ამბობს, საქართველოში კლიმატის ცვლილებას ყველაზე დიდი უარყოფითი გავლენა შავი ზღვის სანაპირო ზონაზე აქვს, რამაც, შესაძლოა, ტურიზმი შეაფერხოს.
„საქართველოში ყველაზე დიდი უარყოფითი გავლენა კლიმატის ცვლილებას შავი ზღვის სანაპირო ზონაზე აქვს იმიტომ, რომ ზღვის დონე არის აწეული და აქედან გამომდინარე ზღვის აქტიურობის პერიოდში უფრო მეტია სანაპირო ზოლის მიტაცება რაც აზიანებს პლიაჟს და ტურიზმს. გარდა ამისა, ბოლო წლებში დადგინდა, რომ წყლის ტემპერატურა ძალიან გათბა, რის გამოც, ჩვენი ზღვა საცურაოდ ისეთი მომხიბვლელი აღარ არის. ასევე ხდება ინფექციური დაავადებების გავრცელება, რამაც შეიძლება მნიშვნელოვნად შეაფერხოს ტურიზმი“,_ამბობს შვანგირაძე.
შვანგირაძე ასევე აღნიშნავს, რომ წყლის დონე ფოთთან უფრო აწეულია, ვიდრე აჭარის სანაპიროზე.
„სანაპირო ყველგან ერთნაირად იწევს, მაგრამ აჭარის სანაპირო ზონა 22 სანტიმეტრით არის აწეული, გასულ საუკუნესთან შედარებით. არის ადგილები, სადაც ზღვის აწევას მიწაც მიყვება. ფოთში მიწა ქვემოთ მიდის, ამიტომ ზღვა უფრო მეტად არის აწეული, ვიდრე აჭარაში; ამიტომ სხვაობა, დაახლოებით, 60 სანტიმეტრს შეადგენს“,_ ამბობს შვანგირაძე.
მისივე თქმით, სანაპირო ზოლის გარდა კლიმატური ცვლილებები სოფლის მეურნეობაზეც აისახება.
„ კლიმატური ცვლილებებს ძალიან დიდი გავლენა აქვს სოფლის მეურნეობაზე. იცვლება ვეგეტაციის პერიოდი. სხვადასხვა კულტურულ მცენარეებს წყლის მოთხოვნა ეცვლება. ერთ-ერთი მნიშვნელოვანი მაგალითი არის დევდორაკის მყინვარი, რომელიც ძალიან გააქტიურდა ბოლო წლებში და ზედიზედ რამდენჯერმე მოხდა მოწყვეტა. ადრეც იყო ეს პრობლემა, მაგრამ 50-100 წელში ერთხელ ხდებოდა. დათბობის გამო მყინვარებმა უფრო დაიწყეს მსხვრევა. ნაწილები, რომლებიც მოდის მყინვარიდან ქმნის დროებით ტბებს; ტბა რომ ძალიან გადაივსება სკდება და მოდის ღვარცოფთან ერთად. თბილისში 2015 წელს ძალიან დიდი ნალექი მოვიდა, დაახლოებით, 300 მმ, რამაც მეწყერი და ვერეს ხეობაში სტიქიური უბედურება გამოიწვია,_ამბობს ის.
შვანგირაძის თქმით, საქართველოში კლიმატურ ცვლილებებს ძირითადად ტრანსპორტი და ხეების ჭრა იწვევს.
„საქართველოში კლიმატური ცვლილებების ძირითადი გამომწვევი მიზეზები ტრანსპორტი და ხეების ჭრაა. ტყე არის შთანთქმის წყარო. ის ნახშირორჟანგს აგროვებს, გაჩეხვის შემდეგ დაწვის შედეგად დაგროვილი ნახშირორჟანგი უკან ბრუნდება. ეს მიმართულება არის საყურადღებო იმ მხრივ, რომ უფრო მეტად არ გაიზარდოს ემისიები. ასევე აუცილებელია ენერგოეფექტური ღონისძიებების გატარება, რადგან შენობებში დიდია ელექტრო ენერგიაზე მოთხოვნა“, _ ამბობს შვანგირაძე.
„საქართველო პარიზის შეთანხმებას 7 ივნისს მიუერთდა და გაეროს კლიმატის ცვლილებების ჩარჩო კონვენციაში წარდგენილი დოკუმენტის თანახმად, საქართველო იღებს ვალდებულებას რომ 2030 წლამდე 15%-ით შეამცირებს სათბურის გაზების ემისიას ჩვეულებრივ სცენართან შედარებით, როცა არანაირი ღონისძიება არ ტარდებოდა კლიმატის ცვლილების შესამცირებლად. თუკი საქართველოს ექნება წვდომა თანამედროვე ტექნოლოგიებთან და ასევე დაფინანსებასთან ამ მიმართულებით, მაშინ ის იღებს ვალდებულებას რომ კიდევ დამატებით 10%-ით შეამციროს სათბურის გაზების ემისია, რაც ქვეყანას საშუალებას მისცემს 1990 წელთან შედარებით 40%-ით შეამციროს სათბურის გაზების ემისია. სათბურის გაზების ემისია, როგორც უკვე მოგახსენეთ, არის იმ გაზების ემისია, რომლებიც მოქმედებენ დედამიწის გარშემო როგორც სათბურის გაზები, სათბურის ეფექტი აქვთ და აკავებენ დედამიწის ენერგიას, არ უშვებენ კოსმოსში და მხოლოდ უშვებენ მზის შუქს. ეს არის გაზები, რომლებიც უარყოფითი ზეგავლენა აქვთ დედამიწაზე ტემპერატურის ზრდაზე. როგორც მოგეხსენებთ, პარიზის შეთანხმებამ აიღო ვალდებულება რომ არ დაუშვას დედამიწაზე ტემპერატურის 2 გრადუსზე მეტად ზრდა,“_ ამბობს გარემოს დაცვის მინისტრის მოადგილე ეკა გრიგალავა.
როგორც ცნობილია, საქართველო კლიმატური ცვლილებების შესახებ პარიზის შეთანხმებას 2017 წლის 7 ივნისს შეუერთდა. აღნიშნული შეთანხმების მიზანი კი, ემისიების შემცირებაა.
