გარემოს დაცვა ჩვენი ქვეყნის და საზოგადოების განვითარებისთვის ერთ-ერთი უმნიშვნელოვანესი ასპექტია. ის ყველა იმ ღონისძიებას გულისხმობს, რომელიც მიზნად ისახავს ადამიანის და ბუნების სასიცოცხლო საფუძვლების მთლიანობაში შენარჩუნებას და გარემოზე ადამიანის უარყოფითი ზემოქმედების თავიდან აცილებასა თუ შემსუბუქებას (შერბილებას).
ადამიანი, ცხოველებისა და მცენარეებისაგან განსხვავებით, არ არის შეგუებული რომელიმე გარკვეულ გარემოს. იგი მას ტექნიკის დახმარებით, თავისი მოთხოვნილებების მიხედვით აფორმირებს. მას შეუძლია ბუნებრივად მოცემული საცხოვრებელი პირობები შეცვალოს, რითაც ხშირად არღვევს ეკოლოგიურ ბალანსს.
რა პრობლემები არსებობს საქართველოში გარემოს დაცვითი ეკონომიკის კუთხით და რა ღონისძიებების გატარებაა საჭირო მდგომარეობის გასაუმჯობესებლად _ ამ საკითხზე „გურია ნიუსს“ ეკონომიკის დოქტორი, გარემოსდაცვითი ეკონომიკის მკვლევარი, დავით დარსაველიძე ესაუბრა.
გარემოსდაცვითი ეკონომიკის არასათანადო გააზრება და გარემოსდაცვითი საკითხების ეკონომიკური განზომლების არასათანადო შესწავლა _ ეს ის საკითხებია, რასაც დავით დარსაველიძე გარემოს დაცვაში არსებულ პრობლემებად ასახელებს.
„საქართველოში, ისევე, როგორც მთელ მსოფლიოში, გარემოს დაცვითი პრობლემა არაერთია და მათი სიღრმისეულად გააზრება და გადაწყვეტილების მიღების პროცესში ჩართვა მნიშვნელოვან გამოწვევად რჩება. სამწუხაროდ, დღეს, ჯერ კიდევ ხშირად გვესმის, რომ გარემოს დაცვა ძვირადღირებულია და დამატებით ეკონომიკურ დანახარჯებთანაა დაკავშირებული, ეკონომიკის განვითარებას შეიძლება ხელი შეუშალოს. რაც, ვფიქრობ, უმეტეს შემთხვევაში, სწორედ გარემოსდაცვითი ეკონომიკის არასათანადო გააზრებაში მდგომარეობს. ნაკლებად ხდება იმ სარგებლის შეფასება, რაც ეკოსისტემურ სერვისებს შეუძლია უზრუნველყოს. საუბარია ეკონომიკურ ფუნქციებზე: უზრუნველყოფის (საკვებით, წყლით, ჟანგბადით, ნედლეულით) მარეგულირებელი (ნიადგადაცვის, წყალმარეგულირებელი, ბუნებრივი კატასტროფებისგან დაცვის, კლიმატის ცვლილებით), კულტურული (ტურიზმის განვითარების შესაძლებლობა) და დამხმარე სერვისები (გენეტიკური მრავალფეროვნება, ბიომრავალფეროვნება, სხვა). გარემოსდაცვითი საკითხების ეკონომიკური განზომლების შესწავლა, ფაქტია, დღემდე არასაკმარისად ხდება მთელს მსოფლიოში“, _ ამბობს ბატონი დავითი.
მისივე თქმით, ადამიანებმა ეკოსისტემური სერვისები საცხოვრებელი გარემოს დაზიანების გარეშე უნდა გამოიყენონ.
„აუცილებელია მეტი ყურადღება მიექცეს, თუ რა ეკოსისტემურ სერვისებს ვიყენებთ და რა ფორმით, რამდენად მდგრადად ხდება ეს ყველაფერი. თუ ვიღებთ მოკლევადიან სარგებელს, ან მხოლოდ საზოგადოების ნაწილი იღებს მას და ვაუარესებთ საცხოვრის გარემოს ისე, რომ შეუქცევად, უარყოფით პროცესს ვიღებთ (ბუნებრივი გარემოს დეგრადაცია, დაბინძურება, ბუნებრივი კატასროფების აქტივაცია, სხვა) ცალსახად უარი უნდა ითქვას მსგავს ქმედებაზე“.
დავით დარსაველიძე ხაზგასმით აღნიშნავს, რომ ბუნებრივი რესურსების გამოყენება ეკოსისტემური წონასწორობის დაურღვევლად უნდა მოხდეს, რის მისაღწევადაც შემდეგი ღონისძიებების გატარებაა საჭირო:
„საჭიროა გარემოსდაცვითი საკანონმდებლო გარემოს სრულყოფა. უკანასკნელ წლებში, ამ მხრივ, გარკვეული სასიკეთო ნაბიჯები უკვე გადაიდგა;
აუცილებელია, ასევე, გაძლიერდეს აღნიშნული საკანონმდებლო ნორმების აღსრულების მექანიზმები. ვფიქრობ, ამ კუთხით უფრო მეტი ძალისხმევა და რესურსების გამოყოფაა საჭირო;
უნდა მოხდეს გარემოსდაცვით ცნობიერების ამაღლება. მეტი ინფორმაცია უნდა მიეწოდოს მხარეებს (მოსახლეობას, კერძო სექტორს, საჯარო ინსტიტუციებს, სხვა მხარეებს) რესურსდამზოგავი და გარემოსდაცვის თვალსაზრისით სუფთა ტექნოლოგიების შესახებ;
საჭიროა, მოვიზიდოთ ისეთი ეკონომიკური სუბიექტები, რომელთაც გააზრებული აქვთ გარემოსდაცვის ღირებულება, უფრთხილდებიან საკუთარ რეპუტაციას და იყენებენ გარემოსდაცვით ტექნოლოგიებს”, _ განაცხადა დავით დარსაველიძემ.
