დღევანდელი სახალისო მოგონებები ქართველ ხელოვანებს მიეძღვნება. ამ პროფესიის ადამიანებს გასახსენებელი ბევრი აქვთ. ზოგიერთი მათგანი ქართული საზოგადოებისათვის ცნობილი გახლდათ, რამდენიმე „შემთხვევა“ კი შედარებით უცნობი იყო და მათმა „ავტორებმა“ დღის სინათლეზე მრავალი წლის შემდეგ „გამოიტანეს“.
მთავრობის დაკვეთით გიგა ლორთქიფანიძემ გიორგიევსკის ტრაქტატის საიუბილეოდ მრავალსერიანი ფილმი გადაიღო. ფილმი, ჩვეულებისამებრ, ჯერ მთავრობის წევრებს უნდა ენახათ.
გადამღები ჯგუფი მთავრობის მოსვლას კინოსტუდიის ეზოში ელოდა.
პირველი სერიის სათაური „წიგნი ფიცისა“ გახლდათ. სტუმრების მოლოდინში გიგა მეორე სერიის სათაურს უტრიალებდა და „ნათელ მომავალს“ ანიჭებდა უპირატესობას. საუბარში ბიძინა კვერნაძე ჩაერთო: „ნათელი მომავალი“ კი არა „ფიცი მწამს ბოლო მაკვირვებს“ დაარქვიო. ამ დროს მთავრობის წევრებიც გამოჩნდნენ და ხალხში „მოვიდა! მოვიდა!“ გაისმა. იქვე მდგარმა იაშა ბობოხიძემ იკითხა ვინ მოვიდაო. ვინ მოვიდა და ედუარდიო, უპასუხეს.
„რომელი ედუარდიო?“ გულუბრყვილოდ დაინტერესდა იაშა.
„ლუდოვიკო ხომ არ არის რომ დაგინომროთო“, მიაგება ბიძინამ.
რეზო ლაღიძის პანაშვიდზე პარტიის და მთავრობის უმაღლესი ეშელონი გამოცხადდა.
მაშინდელი მთავრობა შავი „ვოლგებით“ გადაადგილდებოდა და ხალხით გადავსებულ მოსაშვილის ქუჩაზე ჩოჩქოლი რომ ატყდა, ვიღაცას უკითხავს რა ხდებაო.
„მოშავდნენ“, – წაიბურტყუნა ბიძინა კვერნაძემ.
მოსკოვში კომპოზიტორთა საკავშირო ყრილობაზე ერთმანეთს შეხვდნენ რუსი და ქართველი დელეგატები – შოსტაკოვიჩი, კაბალევსკი, ხაჩატურიანი, ხრენნიკოვი, ნასიძე, კვერნაძე და სოხუმიდან მოსკოვში საცხოვრებლად გადასული კომპოზიტორი კულა ნარიმანიძე.
ცოცხალ კლასიკოსებს შორის მოხვედრილი კულა გატრუნულა. ბიძინას უთქვამს: „რა გინდოდა კულა მოსკოვში, დატეულიყავი აფხაზეთში და იქ „А -კულა“ მაინც იქნებოდი.“
ტანმორჩილი მხატვრის, გოგი თოთიბაძის მაღალ, წარმოსადეგ ცისანა ტატიშვილზე დაქორწინების ამბავი ბიძინას მეუღლემ ამცნო:
„ბიძინა, გაიგე გოგის ცისანა მოუყვანია ცოლად!“
ბიძინამ გაიკვირვა: „როგორ მთლიანად?“
ვატო კახიძე ბიძინას თავისი ახალი ნაწარმოების ჩანაწერის მოსმენას სთხოვდა. იმ პერიოდში მოხშირებული პურმარილები რომ არ გაეცდინა, ბიძინა ყოველ ჯერზე ახალ-ახალ მიზეზებს იგონებდა.
ერთხელ გვიან საღამოს ტაქსის მოლოდინში ნაქეიფარ ბიძინას ვატომ გაუჩერა მანქანა. „ბიძინა ძია, სადაც მეტყვი იქ მიგიყვანთ და თან გზაში ახალ ნაწარმოებსაც მოგასმენინებთ“.
„ბიჭო, ბ..ი ხომ არ გგონივარ, მანქანაში მუსიკა რომ მასმენინო!“
„დათა თუთაშხიას“ შემდეგ საკმაო დრო გავიდა, სანამ ბიძინას ისევ მოუხდა კინოსტუდიაში მისვლა. ტაქსიდან გადმოსულმა „პიტაჩოკზე“ კინოსტუდიის იგივე თანამშრომლები, იმავე პოზიციაზე და ზუსტად იმავე თემაზე მოლაპარაკე რომ დაინახა, უთქვამს:
„თქვენ რა ჭადრაკში გადადებულ პარტიასავით დგახართ!“
როდესაც დიმა თაყაიშვილი მხატვართა კავშირის თავჯდომარედ აირჩიეს, საქმეზე მისული გაკვირვებული ბიძინა ასე მისულა:
„დიმა, შენ ამ კაბინეტში რომელი დიმახოდიდან აღმოჩნდი?“
2008 წლის აგვისტოში რუსეთის აგრესიის შემდეგ რიგ – რიგობით ჩამოდიოდნენ საფრანგეთის, ლიტვის , პოლონეთისა და ლატვიის პრეზიდენტები, ევროპელი საგარეო სამეთა მინისტრები და სხვა უცხოელი მაღალჩინოსნები, რაც ქვეყანას გარკვეულწილად იცავდა რუსეთის მორიგი თავდასხმისაგან.
როდესაც უკანასკნელმა სტუმარმაც დატოვა თბილისი, ბიძინას უკითხავს: „ნეტავ დღეს ვინ გვითენებს ღამეს?“
თბილისში მაია პლისეცკაია უნდა ჩამოსულიყო და კვერნაძეებს აუცილებლად ესტუმრებოდა. არადა აბაზანაში ნიჟარა ჰქონდათ გატეხილი და ნუგეშამ სასწრაფოდ შეკეთება გადაწყვიტა. ნუგეშას ერთი პატიოსანი ხელოსანი, შურა გაახსენდა, რომლსაც დღისით ვერ დაუკავშირდა და გვიან საღამოს ქანცგამოცლილს შეევედრა, ეგებ დღესვე მომიხერხო რამეო.
„Ну что ж, везите вашу раковину, У меня как раз есть новый универсальный клей“ – ხათრი არ გაუტეხა შურამ.
ნუგეშამ ნიჟარა მანქანაში ჩატვირთა და დაძვრას რომ აპირებდა ბიძინაც გამოჩნდა ეზოს შემოსასვლელში.
„უჰ, ბიძინა რა დროზე მოხვედი, ჩამიჯექი და გამომყევი,“ – ამოისუნთქა ნუგეშამ.
„სად მიდიხარ?“
„შურას универсальный клей ჰქონია და ნიჟარა უნდა დაგვიწებოს“.
„კი მარა, ქალო, ამ შურას ამისთანა რა კლეი აქვს შუაღამეზე რომ გამოგიყვანა სახლიდან?“ – შეაგება ბიძინამ.
ავტორი
