ჩოხატაურის მუნიციპალიტეტში შეზღუდული შესაძლებლობის მქონე პირების დედების ეკონომიკური გაძლიერებისთვის სპეციალური პროგრამა ამოქმედდა.
პროგრამის შესახებ გენდერული თანასწორობის საბჭოს თავმჯდომარის მოადგილეს, მარინე ბერაძეს ვესაუბრეთ.
_ ქალბატონო მარინე, რას გულისხმობს აღნიშნული პროგრამა და ვის შეუძლია მასში ჩართვა?
_ 2022 წელს ჩოხატაურის მუნიციპალიტეტის გენდერული თანასწორობის საბჭოს ინიციატივით, ეროვნულ დემოკრატიული ინსტიტუტის (NDI) კონსულტაციით, მუნიციპალიტეტის მიერ გადამზადებულმა მოდერატორებმა ჩაატარეს ფოკუს ჯგუფების კვლევა, საბჭოს გადაწყვეტილებით სამიზნე ჯგუფად შეირჩა შეზღუდული შესაძლებლობის მქონე პირთა დედები. ის ქალები, ვინც ვერ ახერხებენ დასაქმებას შვილებთან მიჯაჭვულობის გამო. კვლევის შედეგების შესაბამისად, გენდერული თანასწორობის საბჭომ მოამზადა საბიუჯეტო ინიციატივა და წარუდგინა მუნიციპალიტეტის მერიას 2023 წლის ბიუჯეტში ასახვის მიზნით. 2023 წლის პირველი იანვრიდან ამოქმედდა მუნიციპალური პროგრამა შშმ პირთა დედების ეკონომიკური გაძლიერება, რაც გულისხმობს მათი მცირე სამეწარმეო იდეების დაფინანსებას.
_ ვის უნდა მიმართონ შეზღუდული შესაძლებლობის მქონე პირების დედებმა პროგრამაში ჩასართავად?
_ შეზღუდული შესაძლებლობის მქონე პირთა დედები განაცხადის ფორმას ავსებენ მერისა და გენდერული თანასწორობის საბჭოს თავმჯდომარის სახელზე. განცხადებაში უთითებენ მათი იდეისა და ამ იდეის გახორციელებისთვის საჭიროებების შესახებ. თანხის რაოდენობის მაქსიმუმია 1 500 ლარი. იდეას უნდა ახლდეს პროექტის აღწერა და მოსალოდნელი შედეგი. ფორმა მარტივია და მისი შევსება განსაკუთრებულ სირთულეს არ წარმოადგენს. ამ დროისთვის შემოსულია ათამდე განაცხადი და მათი დაფინანსება ეტაპობრივად ხორციელდება. საბჭოს მხრიდან პერიოდულად გახორციელდება დაფინანსებული იდეების საქმიანობის მონიტორინგი.
_ სამწუხაროდ, როგორც შშმ პირები, ასევე, მათი ოჯახის წევრები ხშირად ხდებიან საზოგადოების მხრიდან სტიგმის, ზოგჯერ, გარიყვის მსხვერპლებიც. როგორ ფიქრობთ, ხომ არ მოახდენს ეს რამე ზეგავლენას აღნიშნული პროგრამის მიმდინარეობაზე?
_ სწორედ ასეთი სტიგმების და სტერეოტიპების დაძლევას უწყობს ხელს აღნიშნული პროგრამის დანერგვა. ეს არის მხარდაჭერა მუნიციპალიტეტის მხრიდან, რომ ოჯახები, რომლებშიც ცხოვრობენ შშმ პირები, განსაკუთრებით კი, მათი დედები, ქალები გაძლიერდნენ და მათი სრული ინტეგრირება მოხდეს საზოგადოებაში.
ავტორი
