რა სახის ვეტერინარული მკურნალობა სჭირდება მსხვილფეხა რქოსან პირუტყვს საგაზაფხულოდ

გურიაში პიროპლაზმოზს  ციებას ეძახიან. ჩვენს გარემოში ეს დაავადება აქტიურდება საგაზაფხულოდ. დაავადების გადამტანია ტკიპა.

ტკიპით დაინვაზირების დროს, მსხვილფეხა რქოსან პირუტყვს აქვს მაღალი ტემპერატურა _ 41-42 გრადუსი და მეტიც. ამასთანავე ის მოწყენილია, არ ჭამს,  იკლებს წველადობა, აქვს შარდიანი სისხლი, ბალანი აბურძგნილია. როცა ასე ძალზე გამოკვეთილად დასანახი მდგომარეობაა, სასწრაფოდ უნდა მიმართოთ ვეტექიმს. მანამდე, კი რაკი გაზაფხულზე იწყება ტკიპების აქტიურობა, პირუტყვს წინასწარ უნდა ჩავუტაროთ საგაზაფხულო პროფილაქტიკა.

პირველ რიგში პირუტყვი უნდა გასუფთავდეს _ ჩამოვვარცხნოთ სპეციალური სავარცხლით. შემდეგ მოვამზადოთ სპეციალური ხსნარი. არსებობს სხვადასხვა სახეობის პრეპარატები, რომელსაც  თქვენი სურვილით ან  ვეტერინარის რჩევით  შეიძენთ.

ძალიან კარგია 2-პროცენტიანი ქლოროფოსის ხსნარით  დამუშავება. პირუტყვი მზიან, მშრალ გარემოში უნდა ჩავუტაროთ ეს პროცესი, მერე კი ვაცალოთ, გაშრეს.  თვალყური ვადევნოთ, რომ არ მოლოკოს ენით სხეულის რომელიმე ნაწილი.

სასურველია, გაზაფხულის დაწყებიდან, ყოველ 20 დღეში მოვახდინოთ  პირუტყვის ასეთი გარეგანი დამუშავება.

თუ გსურთ, შეიძლება სპეციალური ნემსის გაკეთებაც, თუმცა, კარგია, თუ საქმეს აქამდე არ მივიყვანთ და პირუტყვი მუდმივი მეთვალყურეობის ქვეშ გვეყოლება.