მწვანე ფოთლები და ყვავილები ოთახში ზამთრის პერიოდში უფრო მიმზიდველები ხდებიან, რადგანაც ზამთარში სითბო და სიმწვანე ისედაც არასაკმარისია. ამიტომაც, ნებისმიერ ოთახში ყურადღებას იქცევს “მწვანე ოაზისი”, რომელიც სხვადასხვა ქოთნის მცენარეებით იქმნება.
იმისთვის, რომ ოთახის დეკორატიულმა მცენარეებმა ზამთარი კარგად გადაიტანონ, მათი სწორი მოვლა უნდა ვიცოდეთ. შენობებში, რომლებიც სხვადასხვა საშუალებით თბება, ჰაერი ცხელი და მშრალია, რის გამოც ვცდილობთ, მცენარეების ხშირად მორწყვას, რათა მიწა ქოთანში არ გამოშრეს.
სითბო და ნესტი მცენარეთა სწრაფ ზრდას ხელს უწყობს, მაგრამ სინათლისა და ჰაერის უკმარისობა მათ ასუსტებს. თებერვალში მცენარეები ნელ-ნელა ზამთრის ძილიდან გამოდიან და იღვიძებენ. საჭიროა, ამ პროცესში დახმარება, რომ ისინი მთელი წლის განმავლობაში ძლიერი და მაღალი დეკორატიულობით იყვნენ გამორჩეულნი. აუცილებელია, გამოვუცვალოთ მიწა, ხშირ შემთხვევებში ქოთანიც. მსხვილი ფოთლები ფრთხილად უნდა გავუწმინდოთ სველი ღრუბლით, წვრილ ფოთლებს კი საფრქვევით დავასხუროთ წყალი.
კაქტუსები და დაშვებული ფოთლების მქონე მცენარეები კი მტვრის მოსაცილებლად რბილი ფუნჯით უნდა გაიწმინდოს.
თუ სახლში პალმები გაქვთ, მათ ფოთლებს წყალი საფრქვევით კარგად უნდა შევასხუროთ, განსაკუთრებით, ფოთლების ზედა მხარეს. ამით თან გავრეცხავთ მათ და თანაც ზოგიერთი მავნებლებისგან დავიცავთ. ოღონდ პროცედურა დილით უნდა გახორციელდეს, რომ საღამომდე ფოთლები გაშრეს; ფიკუსი, მონსტერა და ფილოდენდრონი, რომლებსაც სქელი ფოთლები აქვთ, სველი ტილოთი ფრთხილ გაწმენდას მოითხოვენ.
თუ ახალი მცენარეების ყიდვა გნებავთ, კარგი დროა აზალიის, პუანსეტიის, ციკლამენის და ფურისულების შესაძენად. ოღონდ უნდა გვახსოვდეს, რომ ღამით ისინი ცივ გარემოში უნდა იყვნენ, რათა ყვავილობის დიდხანს გაგრძელება შეძლონ. საერთოდ კი, ბინაში ზომიერი ტემპერატურა უნდა იყოს, რომ მცენარეებმა თავი კომფორტულად იგრძნონ.
თებერვალში ოთახის სიცხე მცენარეებს არ სიამოვნებთ. თუ თქვენ ხავერდოვანი ფოთლების მქონე ბეგონია და სენპოლია გაქვთ, არავითარ შემთხვევაში, არ დაასხუროთ მათ წყალი. წინააღმდეგ შემთხვევაში, მცენარეებს დაავადება გაუჩნდებათ და დაიღუპებიან _ ფოთლები მხოლოდ მშრალი ფუნჯით, ფრთხილად უნდა გაიწმინდოს.
თებერვალში საჭიროა მორწყვის სიხშირე თანდათან გაიზარდოს. ნესტის ყველაზე მოყვარული მცენარეების მორწყვა კვირაში ორჯერ არის რეკომენდირებული. შესაძლებელია კაქტუსების ზომიერი მორწყვის დაწყებაც. გრძელი ღეროების მქონე მცენარეებს საყრდენი სჭირდებათ. ლიანებს კი თუ ტოტები გაუყვითლდა ან გაუხმათ, უნდა გავსხლათ.
ზამთარში რომ მცენარეები არ ვაწვალოთ და ვაიძულოთ, ზრდა დააჩქარონ, უნდა დავეხმაროთ, დაისვენონ და გაზაფხულის დაწყებამდე ძალა მოიკრიბონ. ამისთვის საჭიროა, მორიგი მორწყვის ნაცვლად, ქოთანში მიწის გაფხვიერება. ეს ფესვებს ჟანგბადის მიწოდებაში დაეხმარება და მორწყვის აუცილებლობას აგვაშორებს თავიდან. მორწყვა კი მხოლოდ მაშინ არის აუცილებელი, როცა მიწა მთლიანად გამოშრება, თუმცა, წყალი ცოტა უნდა დავუსხათ. უკეთესი იქნება თუ წყალს მხოლოდ ფოთლებსა და ღეროზე შევასხურებთ.
ზამთარში არ შეიძლება ჭარბი საკვების მიცემა მცენარეებისთვის. რეკომენდირებულია, მხოლოდ 2-3 კვირაში ერთხელ და ისიც არა ყველა მცენარისთვის. გამონაკლისია მოყვავილე მცენარეები, რომლებსაც საკვები ნივთიერებები უფრო ხშირად სჭირდებათ. ამისთვის გამოდგება სუსტი კონცენტრაციის საკვები ხსნარები, ძლიერმა კი შესაძლოა ფესვების დამწვრობა გამოიწვიოს. შეგიძლიათ მცენარეს დაუსხათ ერთ ლიტრ წყალში გახსნილი ერთი ჩაის კოვზი რძის ნაზავი.
იმისთვის, რომ მცენარეები დაიცვათ პარაზიტებისგან, შესაძლოა, გამოიყენოთ სარეცხი საპონის ხსნარი და სწრაფადვე ჩამორეცხოთ სუფთა წყლით ფოთლებიდან, მაგრამ ასეთ დროს აუცილებელია ქოთნის მიწის დაფარვა, რადგანაც საპნიანმა წყალმა, შეიძლება, ფესვი დააზიანოს.
