რა შეიძლება გამოიწვიოს არაჯანსაღმა კვებამ

კიბო, გულსისხლძარღვთა სისტემის დაავადებები, დიაბეტი,  ინსულტი,  სიმსუქნე  _  ეს იმ დაავადებების მოკლე ჩამონათვალია,  რასაც არასწორი კვება იწვევს. სწორი კვება კი მნიშვნელოვნად ამცირებს მათი განვითარების რისკს.

როგორც წესი, არაჯანსაღ საკვებს სწრაფი კვების პროდუქტები წარმოადგენს, როგორებიცაა: ჰამბურგერი, დონატი, პიცა, სენდვიჩი, კრუასანი, ასევე, გაზიანი სასმელი, ტკბილეული, მარილი, შაქარი, ცხიმიანი საკვები.  ჯანსაღ საკვებად კი ხილი და ბოსტნეული, ბურღულეული, პური, ხორცი, ზღვის პროდუქტები, პარკოსნები, რძე და მისი ნაწარმი სახელდება.

რა მნიშვნელობა აქვს ჯანსაღად კვებას ჯანმრთელობისთვის და ადამიანების უმეტესი ნაწილი რატომ არ იკვებება ჯანსაღად _ ამ საკითხებზე „გურია ნიუსი“ მედიცინის დოქტორს ნესტან ბოსტოღანაშვილს ესაუბრა.

როგორც ექიმი აღნიშნავს, ჯანსაღი კვება ცხოვრების ხარისხსა და ხანგრძლივობას განსაზღვრავს.

„ჯანსაღი კვება გახლავთ სწორად მიღებული მნიშვნელოვანი ნუტრიენტების (ცილა, ცხიმი, ნახშირწყალი), საკვების  ულუფის ზომისა და მირთმევის სიხშირის ერთგვარი ბალანსი.  ამაში ვგულისხმობთ იმას, რომ უნდა მივიღოთ ჩვენს ასაკზე, სქესსა და სხეულის მასის ინდექსზე მორგებული კალორიები, თუმცა, არსებობს ჯანსაღი კვების  უნივერსალური წესებიც. ცილა და ცხიმი დიდი რაოდენობითაა ხორცეულსა და რძის პროდუქტში, ნახშირწყალი კი ბოსტნეულსა და ხილში. რაც შეეხება მის მნიშვნელობას _  „თქვენ ის ხართ, რასაც მიირთმევთ“ _ ვფიქრობ, ამ ცნობილი გამონათქვამით ყველაფერი ნათქვამია. კვებით იწყება და მთავრდება ყველა ის მნიშვნელოვანი ფიზიოლოგიური პროცესები, რაზეცაა აგებული ჩვენი ცხოველთქმედება. ჯანსაღი კვება ცხოვრების ხარისხისა და ხანგრძლივობის განმსაზღვრელი ერთ-ერთი ფაქტორია“, _ამბობს ბოსტოღანაშვილი.

მედიცინის დოქტორის თქმით, არაჯანსაღად კვებას არაერთი დაავადების გამოწვევა შეუძლია, მათ შორის, წონის დეფიციტისაც.

„არაჯანსაღად კვება პირველ რიგში, ჭარბ წონასა და სიმსუქნეს იწვევს. სიმსუქნე კი  ეს ის დაავადებაა, რომელიც ონკოლოგიურ დაავადებებს, ოსტეოპოროზსა და პენიას, ჰიპერკოაგულაციას,  ნივთიერებათა ცვლის მოშლას, არტერიულ ჰიპერტენზიასა თუ სხვას განაპირობებს. ასევე, არაბალანსირებული კვება, შესაძლოა, წონის დეფიციტის სახითაც  გამოვლინდეს“, _ამბობს ის.

როგორც  ბოსტოღანაშვილი „გურია ნიუსთან“ საუბრისას აღნიშნავს, ადამიანების უმეტესობას ჯანსაღი საკვების მიღებაში ხელს უშლის არასაკმარისი ფინანსური მხარე და გარდა ამისა, მოსახლეობაში პრობლემას ცნობიერების არქონაც წარმოადგენს.

„ეს გახლავთ არასაკმარისი ფინანსური მხარე, არასაკმარისი სურვილი და მოტივაცია და ზოგადად, ცნობიერების არქონა. ასევე, აღვნიშნავდი არასაკმარის დროსაც. ვფიქრობ, მნიშვნელოვანია, ჯერ კიდევ  ბავშვებსა და მოზარდებს მივცეთ საკმარისი ინფორმაცია სწორი კვების შესახებ. რაც შეეხება მოტივაციასა და სურვილს, ესეც, ბუნებრივია, ცნობადობის ამაღლების შემდეგ თავისთავად მოვა. არსებობს გარკვეული ხრიკები, რომლის საშუალებითაც არასაკმარისი ფინანსების საკითხსაც მოვაგვარებთ“, _ამბობს ბოსტოღანაშვილი.