მარიხუანა, ანუ კანაფი უძველესი დროიდანაა გავრცელებული, როგორც სამკურნალო, საყოფაცხოვრებო და მსუბუქი თრობის პოპულარული საშუალება. თუმცა, ამავდროულად, ის წარმოადგენს ერთ-ერთ ყველაზე ხშირად წარმოებულ და მოხმარებად უკანონო ნარკოტიკს მსოფლიო მასშტაბით.
რამდენიმე დღის წინ საკონსტიტუციო სასამართლომ მარიხუანას დეკრიმინალიზაციის შესახებ გადაწყვეტილება მიიღო.
საქართველოს საკონსტიტუციო სასამართლომ განმარტა, რომ პირის უფლება, თავად შეარჩიოს განტვირთვის მისთვის სასურველი სახე და განახორციელოს შესაბამისი აქტივობა, მათ შორის, მოიხმაროს მარიხუანა, წარმოადგენს პიროვნების პირადი ავტონომიით დაცულ სფეროს. ამასთან, ვინაიდან მარიხუანას მოხმარებით ადამიანის ჯანმრთელობას შეიძლება მიადგეს გარკვეული ზიანი, სასამართლომ აღნიშნული უფლების შეზღუდვა დასაშვებად მიიჩნია ისეთი ლეგიტიმური მიზნების მისაღწევად, როგორებიცაა: მაგალითად, საზოგადოებრივი უსაფრთხოების უზრუნველყოფა, სხვა პირთა სიცოცხლისა და ჯანმრთელობის დაცვა და სხვა.
სასამართლოს მიერ გაკეთებულ განმარტებაში „ახალგაზრდა ადვოკატების“ საკონსტიტუციო სამართალწარმოების მიმართულების ხელმძღვანელი გიორგი ლაბაძე სხვა ნარკოტიკების დეკრიმინალიზაციისთვის გზის გახსნის შესაძლებლობას ხედავს.
როგორც მან „გურია ნიუსთან“ საუბრისას აღნიშნა, სასამართლომ აქცენტი პიროვნების თავისუფალი ინდივიდის განვითარებაზე გააკეთა.
„ადამიანები ციხეში მარიხუანას მოხმარების გამო არ უნდა ხვდებოდნენ. მაგრამ აქ პრობლემა არის სასამართლოს მიერ გაკეთებულ განმარტება, სადაც აქცენტი არის გაკეთებული პირადი ჯანმრთელობის მიმართ მიყენებულ ზიანზე. სასამართლოს მიერ მიღებული გადაწყვეტილება შეიძლება ნიშნავდეს გზის გახსნას შემდგომში სხვა ნარკოტიკების დეკრიმინალიზაციისკენ. ეს შეიძლება მოხდეს, იმიტომ, რომ თუკი, მაგალითად, მარიხუანას, როგორც ექსპერტებმა დაადასტურეს და აღნიშნეს, არ შეუძლია ადამიანი წააქეზოს სხვისთვის ზიანის მიყენებისკენ, იმავე განმარტებით, შეიძლება ვთქვათ, რომ კოკაინის გარკვეული რაოდენობის მოხმარება არ წააქეზებს ადამიანს სხვას მიაყენოს ზიანი. სწორედ, ეს არის იმ ადამიანების სურვილი, რომლებიც თავგამოდებით ცდილობენ, ნორმა გაუქმებულიყო სასამართლოში. საუბარიც დაიწყო უკვე მარიხუანას მოხმარების ლეგალიზაციაზეც “ ,_ ამბობს ლაბაძე.
ის, ასევე, აღნიშნავს, რომ მიღებული გადაწყვეტილებით ადამიანების ჯანმრთელობა კითხვის ნიშნის ქვეშ დგება.
„პოლიტიკური გაერთიანება „გირჩის“ წარმომადგენლები როდესაც საუბრობენ ლეგალიზაციაზე, ისინი ამბობენ, რომ ბაზარი გახდება უფრო კონტროლირებადი და ა.შ. მაგრამ ადამიანებს, რომელთა სურვილიც ნარკოტიკული ნივთიერებების დეკრიმინალიზაცია და ლეგალიზაციაა, ჰყავთ საყვარელი იდეოლოგიური ფიგურა, ნიუტონ ფრიდმანი, რომელიც ამბობდა, რომ ლეგალიზაცია საჭიროა, იმიტომ, რომ ბაზარი იყოს უფრო გახსნილი და ღია, მაგრამ ეს ზრდის მოხმარებას. აქ უნდა გაევლოს ახლა პროპორციულობის ზღვარი, თუ რა უფრო მნიშვნელოვანია ადამიანის უფლება, რომ ლეგალურად მოიპოვოს მარიხუანა ან სხვა ნარკოტიკული საშუალებები, თუ საზოგადოების ჯანმრთელობა, რომელიც, ასევე, დადგება კითხვის ნიშნის ქვეშ, თუკი კანაფი იქნება მარტივად ხელმისაწვდომი“, _ ამბობს ლაბაძე.
როგორც „ახალგაზრდა ადვოკატების“ საკონსტიტუციო სამართალწარმოების მიმართულების ხელმძღვანელი ამბობს, სასამართლოს მიერ მიღებული გადაწყვეტილება პოლიტიკური მიდგომიდან გამომდინარეობს.
„ეს არის არამარტო სამართლებრივი, არამედ პოლიტიკური გადაწყვეტილება. უკანასკნელი პერიოდის განმავლობაში შესამჩნევია და მისახვედრი, რომ სამართალდამცავებმა თავის ნებაზე მიუშვეს კანაფის მოხმარებასთან დაკავშირებული საკითხები. თუ კი ადრე იყო სიმკაცრე, ახლა არის შემცირებული ბევრად. სახელმწიფო უნდა იყოს ჩართული იმაში, რომ ახალგაზრდობამ საკუთარი თავი აკონტროლოს ადვილად და ნაკლებად მოიხმაროს ნარკოტიკული ნივთიერებები“,_ამბობს ლაბაძე.
ის, ასევე, აღნიშნავს, რომ მარიხუანას დეკრიმინალიზაცია მოქალაქეებში შიშს გააქრობს და ის უფრო ხელმისაწვდომი გახდება, რაც მისი მომხმარებლების რაოდენობის ზრდას გამოიწვევს.
„ჩემი აზრით, აუცილებლად მოხდება ის, რომ უფრო ადვილად იქნება ხელმისაწვდომი კანაფი და ის შიში, რაც ჰქონდათ მოქალაქეებს, ახლა უფრო შემცირდება. თუ ქუჩაში მარიხუანას მწეველს ვერ დავინახავთ, აუცილებლად გაიზრდება მოხმარება“, _ ამბობს ლაბაძე.
ამავე თემაზე: მარიხუანას დეკრიმინალიზაცია _ საკონსტიტუციო სასამართლოს ახალი გადაწყვეტილება
რას ფიქრობენ გურული პოლიტიკოსები მარიხუანას დეკრიმინალიზაციაზე
