რამდენიმე დღის წინ, „გურია ნიუსის“ ოფისში ჩოხატაურის მუნიციპალიტეტის სოფელ ახალშენში მცხოვრები ციალა სიხარულიძე გვესტუმრა და დახმარება გვთხოვა. ქალბატონი ციალა სოციალური მომსახურების სააგენტოზეა განაწყენებული. როგორც ამბობს, თავად სამართალი ვერ იპოვა და ჩვენი გაზეთის საშუალებით უნდა გაიგოს, რატომ მოეხსნა სოციალური შემწეობა.
„2013 წლიდან რეგისტრირებული ვარ სოციალურად დაუცველთა ერთიან ბაზაში და ვიღებდი დახმარებას, თვეში 60 ლარს. ახლა გადამოწმება მოხდა და მომივიდა მაღალი სარეიტინგო ქულა. მაინტერესებს, რა შეიცვალა ჩემში გარდა იმისა, რომ კიდევ უფრო შრომისუუნარო გავხდი და წლები მომემატა?! _ ამბობს ქალბატონი ციალა და თავისი ოჯახის შესახებ გვიყვება.
„ოჯახში ვართ სამნი, მაგრამ მე მათთან არ ვარ. რომ მოვიდა სოციალური მომსახურების აგენტი, ვანახე, რომ ცალკე ვცხოვრობ. ცალკე მაქვს ყველაფერი. მოხუცებული ვარ და მირჩევნია, ჩემთვის ვიყო. ჩემი შემოსავალი მხოლოდ პენსია და სოციალური დახმარება იყო. ისიც მომიხსნეს. სხვა არაფერი გამაჩნია. არც ჩემი ოჯახის წევრებს გააჩნიათ სხვა შემოსავალი, მაგრამ ისინი არ ითხოვენ, ახალგაზრდები არიან და კი ირჩენენ თავს. შაქრიანი დიაბეტით დაავადებული ვარ. დღეში სამჯერ ინსულინი მჭირდება. ვისაც დიაბეტი აქვს, ყველას დაუტოვეს დახმარება, მე კი მომიხსნეს. გარდა შაქრიანი დიაბეტისა, ვარ უსინათლო, მაწუხებს გული, სახსრები, 2 ჯოხითაც ვერ დავდივარ. ყოველდღე მაღალი წნევა მაქვს _ 200-250. რა ვქნა მე, დავარდნილმა, 80 წლის ქალმა, რითი ვირჩინო თავი? მარჩენალი შვილი მომიკვდა და ჩემთვის უნდა მოეხსნათ დახმარება?! მეჩხუბება შვილიშვილი, თავი დაანებე, ნუ ითხოვო, მაგრამ ვერ შევეშვები, თან მაშინ, როცა ვხედავ ირგვლივ როგორი ოჯახები არიან შემწეობის მიმღებნი”.
ქალბატონი ციალა დამსახურებული მეჩაიე იყო. ის საბჭოთა კავშირის უმაღლესი საბჭოს ოცდამეექვსე ყრილობის დელეგატი გახლდათ.
„შრომაში სულამოგლეჯილი ქალი ვარ. შრომაში მიღწეული წარმატებებისთვის მიღებული მაქვს სხვადასხვა ხარისხის ორდენები და მედლები. ვიყავი 26-ე ყრილობის დელეგატი. რამდენჯერმე ამირჩიეს რაიკომის ბიუროს წევრად. პარიზშიც კი გამიშვეს. მაშინ დაფასება მქონდა. „ზარია ვასტოკაშიც“ დაიწერა ჩემ შესახებ. ახლა არავინ არაფრად აგდებს ჩემს დამსახურებას და შრომას და მაწამებენ, როგორც ძაღლს“.
„გურია ნიუსმა“ სოციალური მომსახურების სააგენტოს მიმართა და სთხოვა, ქალბატონი ციალასთვის განემარტა მაღალი სარეიტინგო ქულის მინიჭების მიზეზი.
„ციალა სიხარულიძე სოციალური მომსახურების სააგენტოს მიერ ბოლოს გადამოწმებულია 2017 წლის აპრილში. ბოლო გადამოწმებისას მისმა ოჯახმა მიიღო მაღალი სარეიტინგო ქულა, რაც არ ითვალისწინებს ფულადი საარსებო შემწეობის გაცემას. მანამდე ციალა სიხარულიძე გადამოწმებული იყო 2013 წელს და დეკლარაციაში ფიქსირდებოდა მარტო მცხოვრებად. ახალ დეკლარაციაში კი მასთან ერთად ოჯახში ცხოვრობს კიდევ 2 პირი _ 50 წლის ქალბატონი და 31 წლის მამაკაცი. სარეიტინგო ქულის დათვლისას, ყველა მონაცემი გაითვალისწინება და ყველა მათგანი თავისებურად ახდენს გავლენას სარეიტინგო ქულაზე. ოჯახის სახლი ფართი საკმაოდ მოზრდილია, 2 წევრი ჯანმრთელი და შრომისუნარიანია, რაც, ასევე, უმატებს ქულას ოჯახს. აღნიშნული ოჯახი ეწევა მცირე შინა მეურნეობას და ასევე, ოჯახის წევრს, ალექსი სიხარულიძეს ჰყავს უცხოური ავტომობილი. მეორე შრომისუნარიან წევრს _ გუგული სიხარულიძეს სოციალური მომსახურების სააგენტომ შესთავაზა დახმარება საკონსერვო ქარხანაში დასაქმებაში, თუ პირობები ქალბატონი გუგულისთვის მისაღები იქნება, იგი დასაქმდება“, _ აღნიშნა „გურია ნიუსთან“ სატელეფონო საუბრისას სოციალური მომსახურების სააგენტოს პრესსამსახურის უფროსმა ტატა გამყრელიძემ.
