გაზაფხულის დადგომასთან ერთად სასოფლო სამუშაოები იწყება. სოფლის მეურნეობას გურიის ეკონომიკაში მნიშვნელოვანი ადგილი უჭირავს და დროის მიხედვით განსხვავებულია დარგის წინაშე მდგომი ამოცანები და მათი გადაწყვეტის გზები.
მიწის სწორად მართვას უდიდესი მნიშვნელობა ენიჭება, რადგან საზოგადოების გრძელვადიანი სოციალური და ეკონომიკური განვითარების საფუძველს წარმოადგენს.
არასწორად წარმართული სამეურნეო საქმიანობის შედეგი კი ნიადაგის დეგრადაციაა, რაც საფრთხეს უქმნის დედამიწის მოსახლეობის საკვებით უზრუნველყოფას და ასევე, ბუნებრივი გარემოს ეკოლოგიურ უსაფრთხოებას.
როგორც დარგის ექსპერტები ამბობენ, ქიმიური სასუქების, პესტიციდების ინტენსიურმა გამოყენებამ, ნიადაგების ხშირმა და არასწორად დამუშავებამ, საძოვრებზე არამდგრადმა ძოვებამ, წყლისმიერმა და ქარისმიერმა ეროზიებმა და სხვა, განაპირობა ნიადაგის ფიზიკური და ბიოლოგიური დეგრადაცია და გარემოს ქიმიური დაბინძურება.
ნიადაგის არასწორი ექსპლოატაცია-მოხმარება, მისი არასწორი გამოყენება დეგრადაციის ერთ-ერთი მნიშვნელოვანი მიზეზია. ნიადაგის დეგრადაციის შესუსტების ან სრული შეწყვეტისათვის განსაკუთრებით მნიშვნელოვანია ნიადაგის დამუშავებისა და გამოყენების სწორი რეგულირება.
რა უნდა გაითვალისწინონ ფერმერებმა, სოფლის მოსახლეობამ გაზაფხულის დადგომასთან ერთად _ ამ საკითხზე „გურია ნიუსი“ სოფლად თემთა განვითარების სააგენტოს თავმჯდომარეს, როსტომ გამისონიას ესაუბრა.
გამისონიას თქმით, წელს მკაცრი ზამთარი არ იყო, რის გამოც მოსალოდნელია სხვადასხვა სახის მწერები გამოჩნდნენ, ამიტომ მნიშვნელოვანია, მინდვრების, ხეხილის გაწმენდა და დამუშავება.
„წელს არ იყო მკაცრი ზამთარი, ამრიგად ათასნაირი მწერების გამოჩენა და გამრავლება მოსალოდნელია. ამ ეტაპზე უნდა ჩატარდეს ხეხილის დამუშავება, მიწის ნაკვეთების დამუშავება, უნდა გასუფთავდეს ნარჩენებისგან მინდვრები. კლიმატის ცვლილებასთან დაკავშირებით პროგნოზი კი არის დადებითი, მაგრამ არ ვიცით, როგორი ამინდი იქნება და ამიტომ ფერმერებმა, ადგილობრივმა მოსახლეობამ თავიდანვე უნდა დაიჭიროს თადარიგი, რომ მოიმარაგოს თესლი და საჭირო სასუქები“, _ ამბობს გამისონია.
სოფლად თემთა განვითარების სააგენტოს თავმჯდომარის თქმით, მოსავლის დაბალხარისხიანობის ერთ-ერთი გამომწვევი მიზეზი ნაკვეთმონაცვლეობის პრობლემაა.
„სადაც არ ტარდება ნაკვეთმონაცვლეობა, იქ ერთი და იმავე ნაკვეთზე მოცემული სიმინდის თესლი არ არის ხარისხიანი და ამით არის გამოწვეული დაბალი მოსავლიანობა, სიმინდისა და სხვა კულტურების. პირველ რიგში, სათანადო თესლების უზრუნველყოფა არის მნიშვნელოვანი ამ ეტაპზე. სასურველია, რომ მოხდეს ნიადაგების, მინდვრების გასუფთავება, რადგან გახშირდა ქარი, მოსახლეობამ უნდა იზრუნოს იმაზე, რომ თავისი მინდვრების ირგვლივ დაიწყოს ქარსაფარი ზოლების გაშენება. გურიაში ყოველთვის იყო ქარსაფარი ზოლების მშენებლობის ტრადიცია“, _ ამბობს სოფლად თემთა განვითარების სააგენტოს თავმჯდომარე.
მინდვრების გამოსუფთავების შედეგად შეგროვილ ნარჩენებს მოსახლეობის უმეტესობა წვავს, რაც უყურადღებობისგან გამოწვეული ხანძრების საფრთხეს ზრდის.
შეგახსენებთ, რომ გუშინ ქობულეთის მუნიციპალიტეტის სოფელ ჭახათში კაცი, რომელმაც ეზოს მოწესრიგებისას ფიჩხებს და სხვა შეგროვილ ნარჩენებს ცეცხლი მოუკიდა, ემსხვერპლა ცეცხლს.
თუმცა, მიუხედავად ამისა, გამართლებულია თუ არა მინდვრის გამოსუფთავების შედეგად მოგროვილი ნარჩენების დაწვა _ ამ კითხვაზე როსტომ გამისონია გვპასუხობს, რომ მოსახლეობამ უნდა ისწავლოს ამ სახით შეგროვილი მასის კომპოსტირება.
„გამოსუფთავებული მასის დაწვა არ არის მართებული. ის არ უნდა დაიწვას, უნდა მოხდეს მისი კომპოსტირება და შემდეგ სასუქად გამოყენება, რაც მოსახლეობას სასწავლი აქვს. გარდა ამისა, შესაძლებელია მისი გამოყენება საწვავ ბრიკეტად, მაგრამ ღიად დაწვა არ შეიძლება არავითარ შემთხვევაში, რადგან ეს იწვევს ნახშირორჟანგის ემისიებს და თბური აირების ზრდას“, _ ამბობს გამისონია.
სოფლად თემთა განვითარების სააგენტოს თავმჯდომარე „გურია ნიუსთან“ საუბარში ყურადღებას ამახვილეს ველური აკაციის, იგივე ჩოჩობასგან მომდინარე საფრთხეზე.
როგორც როსტომ გამისონია ამბობს, სასურველია ჩოჩობას მოჭრა, რადგან თუ ყურადღება არ მიექცა მოსალოდნელია გურიის დაბალი ზონა ჩოჩობას ტყით დაიფაროს.
„ვინაიდან გურიაში ბოლო წლების განმავლობაში სასოფლო ნაკვეთებზე ძალიან მომრავლდა ველური აკაცია, ე.წ. ჩოჩობა, რომელიც და ანადგურებს სასოფლო სამეურნეო ნაკვეთებს, საჭირო იქნება ამის გამოყენება სხვა კუთხით, თუნდაც, იმისათვის, რომ მოიჭრას და დამზადდეს ისევ საწვავი ბრიკეტები, რომლითაც შეიძლება სკოლების, საბავშვო ბაღების, მოსახლეობის უზრუნველყოფა შეშით გასათბობად. ამას თუ არ მივაქციეთ ყურადღება მალე მთელი გურიის დაბალი ზონა დაიფარება ჩოჩობას ტყით“, _ ამბობს გამისონია.
