ადამიანის ორგანიზმისათვის D ვიტამინის მნიშვნელობა დიდი ხანია ცნობილია
D ვიტამინი დიდ როლს ასრულებს კალციუმისა და ფოსფორის ცვლაში; იგი აუცილებელია მტკიცე ძვლებისა და კბილების ჯანმრთელობისთვის; რაქიტის პროფილაქტიკისთვის ბავშვებში და სხვ. თუმცა, ცოტას თუ სმენია, რომ D ვიტამინი ძვლების გარდა, სხვა მრავალი ორგანოს გამართული მუშაობისთვის უმნიშვნელოვანესია. მაგ., იმუნური, ენდოკრინული, ნერვული, რეპროდუქციული და სხვა სისტემების მუშაობისთვის. გავლენას ახდენს ნერვულ-კუნთოვან სისტემაზე და ფსიქო-ემოციურ სფეროზე.
ამდენად, მისი დეფიციტი დაკავშირებულია მთელ რიგ დაავადებებთან, როგორიცაა: მეტაბოლური დარღვევები, აუტოიმუნური დაავადებები, ნევროლოგიური და ნერვ-კუნთოვანი სისტემის დაავადებები, ფსიქიური და ონკოლოგიური პრობლემები, ასევე, გულ-სისხლძარღვთა პათოლოგიები და რეპროდუქციული სისტემის დარღვევები.
ორსულობა და ლაქტაცია, ასევე, ბავშვობის პირველი წლები, წარმოადგენს D ვიტამინის დეფიციტის მაღალ რისკფაქტორს.
კორონავირუსის პანდემიის ფონზე ამ ვიტამინით დაინტერესება კიდევ უფრო გაიზარდა.
ბრიტანელი მეცნიერები ამბობენ, რომ D ვიტამინს შეუძლია ადამიანის იმუნიტეტის გაძლიერება და კორონავირუსისგან დაცვა.
ამ ვიტამინს საკვებიდანაც და სხვადასხვა ვიტამინებისგან ვიღებთ, თუმცა, უმეტესად მისი სხეულში წარმოქმნის წყარო მზის სხივებია.
რა მნიშვნელობა აქვს D ვიტამინს ადამიანის ჯანმრთელობისთვის, რა არის ამ ვიტამინის ნაკლებობის სიმპტომები, რა საფრთხეს წარმოადგენს D-ს ნაკლებობა და მიზანშეწონილია თუ არა D ვიტამინის თვითნებურად მიღება_ ამ საკითხების შესახებ რეპროდუქციული მედიცინის ცენტრ „უნივერსის“ ექიმ რეპროდუქტოლოგს, ენდოკრინოლოგს, მედიცინის აკადემიურ დოქტორს, ბარბარე გორგოშიძეს ვესაუბრეთ.
როგორც ქალბატონი ბარბარე „გურია ნიუსთან“ საუბრისას აღნიშნავს, D ვიტამინის ნაკლებობა უმეტესად იმ ადამიანებს უვითარდებათ, ვინც მზეზე ნაკლებ დროს ატარებენ, ასევე არასრულფასოვნად იკვებებიან. გარდა ამისა, D ვიტამინის დეფიციტი ვლინდება ენდოკრინოლოგიური დაავადებებისა და შაქრიანი დიაბეტის მქონე პაციენტებში.
„D ვიტამინი შედის გაყიდვაში არსებული ვიტამინების კომპლექსების უმრავლესობაში. ამჟამად უკვე გამოდის D ვიტამინის მონოპრეპარატები და ადვილად ხელმისაწვდომია ყველასთვის. D3-ს ულტრაიისფერი სხივებისგან ვიღებთ. მზეზე ყოფნა სასარგებლოა დღის 1-ელ საათამდე, რადგან უფრო მეტი ულტრაიისფერი სხივებია. ვიტამინი D2-ს ორგანიზმი საკვებისგან იღებს, მაგრამ თუ ადამიანი ვეგეტარიანელია, არ ღებულობს თევზის და რძის პროდუქტებს, იმყოფება წონის დასაკლებ დიეტებზე, კუჭნაწლავის ტრაქტის რაიმე დაავადების გამო დაქვეითებულია შეწოვის პროცესები, იქ მოსალოდნელია დეფიციტის არსებობა. დეფიციტი უვითარდებათ ადამიანებს, რომლებიც ნაკლებად გამოდინ მზეზე. აქვთ ენდოკრინული პრობლემები .
D ვიტამინის დეფიციტის გამომხატველი კონკრეტული სიმპტომები შეიძლება ადამიანმა ვერ იგრძნოს, მაგრამ როცა მას აქვს დეპრესია, რაიმე ორგანოს სიმსივნური დაავადება, სისუსტე, ფრჩხილების მტვრევა, თმის ცვენა, სასურველია სხვა გამოკვლევებთან ერთად D ვიტამინიც გამოიკვლიოს სისხლში.
ჩვენ, დიდი ხანია ვიცით D ვიტამინის მნიშვნელობის შესახებ, ადამიანის ჯანმრთელობისთVის და როგორც კი დაინერგა მისი კვლევის მეთოდი დავიწყეთ D ვიტამინის აქტიური გამოკვლევა სხვადასხვა პათოლოგიების დროს. მე უშვილო წყვილებთან მაქვს საქმე და მათში ვიკვლევ. რომ გითხრათ რომ მასიური ნაკლოვანებაა ასე არ არის, მაგრამ უმრავლესობას აქვს ნორმის დაბალ ზღვათან ახლოს. ძალიან დიდი დიაპაზონია ნორმის საზღვრებს შორის, მაგალითად, 30-იდან 100-მდე და ძირითადად მოდიოდა, 40- 45-ის ფარგლებში. ხოლო 30-ზე ნაკლები ეს უკვე დეფიციტია. ამიტომ ვთვლი, რომ ეს საჭირო გამოკვლევაა და დეფიციტის და ნორმის დაბალი მაჩვენებლების შემთხვევაში მკურნალობა და პროფილაქტიკა აუცილებლად უნდა ჩავატაროთ.
თვითმკურნალობა მიზანშეწონილი არ არის, ჯობს გამოიკვლიონ და ისე მიიღონ D ვიტამინი. და მკურნალობის შემდეგ აკონტროლონ D ვიტამინის დონე. ეს კი უმჯობესია ექიმის მეთვალყურეობის ქვეშ მოხდეს. პროფილაქტიკური მიზნით, კი ალბათ ყველამ უნდა მივიღოთ. პროფილაქტიკური დოზა არის 4000-დან 6000 საერთაშორისო ერთეულამდეა“,_ ამბობს ექიმი გორგოშიძე.
ექიმ რეპროდუქტოლოგი ჩვენთან საუბრისას აღნიშნავს, რომ D ვიტამინის ნაკლებობა განსაკუთრებით სახიფათო ორსული ქალებისთვის და მათი ნაყოფისთვისაა. ის ქვეყანაში აუტიზმის შემთხვევების ზრდაზე საუბრობს.
„აქამდე თუ არ ვნიშნავდით D ვიტამინს ცალკე, ახლა უკვე დავიწყეთ დანიშვნა იქ, სადაც ვხედავთ, რომ დეფიციტია. ის ხელს უწყობს კალციუმის შეწოვას. ამ ვიტამინის ნაკლებობა იწვევდა ბავშვებში რაქიტს და მოზრდილებში ძვლების სისუსტეს, ოსტეომალაციას. ამას ყოველთვის დიდი ყურადღება ექცეოდა ჩვენს ქვეყანაში. მაგრამ გამოჩნდა ისეთი აზრი, რომ D ვიტამინის ნაკლებობა ორსულ ქალში, შეიძლება შემდგომში, ახალშობილში გამომჟღავნდეს აუტისტური სპექტრის აშლილობით. აუტისტური სპექტრის აშლილობა გვიან მჟღავნდება და ამიტომ სჯობია თავიდანვე მივაწოდოთ პაციენტს ვიტამინი, რომ შემდგომში საყვედური არ მივიღოთ. შეიძლება მიზეზი სულ სხვა იყოს,მაგრამ დაბრალდეს ექიმს, რომ მან არ გამოიკვლია და არ დაუნიშნა D ვიტამინი პაციენტს და ასეთი ბავშვი ამიტომ გაჩნდა. საკამათო საკითხია. ზუსტად დადგენილი არ არის.მიმდინარეობს კვლევები. ფაქტია, რომ აუტიზმმა მოიმატა და ეს დავაბრალოთ D ვიტამინის ნაკლებობას, თუ ბავშვის მამის ალკოჰოლისადმი და ნარკოტიკებისადმი მიდრეკილებას თუ რაღაც სხვას, ძნელი სათქმელია. დღეს მომავალი დედების უმრავლესობა გამოკვლევებს იტრებს, უარს არ ამბობს არც გამოკვლევაზე და არც დეფიციტის მკურნალობაზე რადგან ორივეს გვსურს რომ ნანატრი ბავშვი ჯანმრთელი დაიბადოს. შემდეგ კი ესტაფეტას პედიატრებს გადავცემთ“,_ ამბობს ექიმი გორგოშიძე.
