1 თვის განმავლობაში წყალში 26 ადამიანი დაიღუპა, 60-ის გადარჩენა კი მაშველებმა შეძლეს.
რამდენად არიან მოქალაქეები დაცულები საქართველოს სანაპირო ზოლზე და რა რეკომენდაციებია იმისთვის, რომ ადამიანები წყალში არ დაიხრჩონ_ამ საკითხებზე „გურია ნიუსი“ საგანგებო სიტუაციების მართვის სამსახურს ესაუბრა.
როგორც სააგენტოში ამბობენ, წელს შავი ზღვის სანაპიროზე 200 მაშველია და 24 საათიანი მონიტორინგი ხორციელდება, თუმცა არის ადგილები, სადაც ბანაობა აკრძალულია და შესაბამისად, ასეთ ადგილებში მაშველები არ დგანან.
„საზღვაო სეზონის დაწყებასთან ერთად მაშველების გამოძახების შემთხვევები გაიზარდა. იმ ადგილებში, რომლებიც მიჩნეულია საბანაო ზონად 24 საათიანი კონტროლი მიმდინარეობს. საქართველოს ტერიტორიაზე არის უამრავი წყალსაცავი, მდინარე, ტბა, სადაც ბანაობა აკრძალულია და ამიტომ მაშველები არ დგანან. თუმცა, მოქალაქეები ამკრძალავ ნიშნებს ყურადღებას არ აქცევენ და წყალში მაინც შედიან. მაშველებს რეაგირება კონკრეტულ გამოძახებაზე უწევთ. ადამიანის სიცოცხლის გადასარჩენად წუთები და წამები არის გადამწყვეტი და არსებობს მდინარეები, რომლებიც სამაშველო დეპოსგან 5, 6 ან 40 კილომეტრის მოშორებით არის, იქ მაშველი დროულად ვერ მივა და ვერ აღმოუჩენს წყალში შესულ ადამიანს დახმარებას“,_ამბობენ საგანგებო სიტუაციების მართვის სამსახურში.
უწყებაში ასევე აღნიშნავენ, რომ ადამიანები წყალში ნასვამ მდგომარეობაში საკმაოდ ხშირად შედიან, რაც ფატალური შედეგით სრულდება.
„შავი ზღვის სანაპიროზე სადაც მაშველები მუდამ პატრულირებენ ადამიანების გადარჩენა ხდება, თუ არის 5 დაღუპული არის 41 გადარჩენილი, თუმცა, აღსანიშნავია, რომ ამ 5 დაღუპულიდან 3 ნასვამ მდგომარეობაში იყო. ესეც ერთ-ერთი გამოწვევაა მიმდინარე სეზონის. ყველა სტატისტიკური მონაცემი რაც გაგვაჩნია, რომ ადამიანები ზღვაში შევიდნენ ნასვამ მდგომარეობაში 95% ასეთი შემთხვევების სრულდება ფატალური შედეგით. მაშველი, რომელიც შესაძლოა იქვე იყოს ვერ შველის ადამიანს, რადგან არ შეიძლება ნასვამ მდგომარეობაში წყალში შესვლა“,_ამბობენ საგანგებო სიტუაციების მართვის სამსახურში.
მოქალაქეებს უსაფრთხოების მიზნით კი საგანგებო სიტუაციების მართვის სამსახურში შემდეგ რჩევებს აძლევენ:
„მაშველები ახორციელებენ როგორც პლაჟის მონიტორინგს, ასევე პატრულირებენ ზღვის სიღრმეში სამაშველო ტექნიკით, რომ თუკი ვინმეს დახმარება სჭირდება, დროულად დაეხმარონ. მოქალაქეებმა უნდა გაითვალისწინონ ძალიან ბევრი რეკომენდაცია რასაც ყოველდღე გავცემთ. ჩვენი კატეგორიული მოთხოვნაა, რომ ნასვამ მდგომარეობაში არ შევიდნენ წყალში, ასევე ყურადღება მიაქციონ ამკრძალავ ნიშნებს და თუ ბანაობის ამკრძალავი ნიშანი არ არის, ერთ-ერთი მინიშნება მოქალაქეებისთვის უნდა იყოს ის, რომ სადაც მაშველი არ არის, იქ ბანაობა დაშვებული არ არის. გამორიცხულია, რომ საბანაო ტერიტორიაზე მაშველები ვერ შენიშნონ. ნებისმიერი კითხვის არსებობის შემთხვევაში მივიდნენ მაშველებთან და მიიღონ მაქსიმალური ინფორმაცია. ზღვაზე დამსვენებლებს ყოველთვის ვაწვდით ინფორმაციას ამინდის გაუარესების ან მოსალოდნელი შტორმის შესახებ და ასეთ შემთხვევაში წყალში არ უნდა შევიდნენ, გარდა ამისა, სამაშველო კოშკურაზე დამონტაჟებულია ნიშნები_ წითელი ალამი, ნიშნავს რომ ცურვა აკრძალულია, თეთრი ალმის შემთხვევაში კი ზღვაში შესვლა ნებადართულია და ამ ნიშნებსაც ყურადღება უნდა მიაქციონ“,_ამბობენ საგანგებო სიტუაციების მართვის სამსახურში.
