ზოსტერის ვირუსით (VZV) გამოწვეული მწვავე ვირუსული ინფექციური დაავადება ჩუტყვავილა ხასიათდება მაღალი გადამდებობით, უმეტესად ვრცელდება ბავშვთა ასაკში, თუმცა, შესაძლებელია, დაავადდეს ნებისმიერი ასაკის ადამიანი, თუ მას იმუნიტეტი არა აქვს. ამ გაზაფხულზე ჩუტყვავილას ინფექცია თითქმის ყველა კუთხეში დაფიქსირდა, მათ შორის, ლანჩხუთშიც _ პატარებს უგუნებობასა და ტემპერატურის მომატებასთან ერთად სხეულზე გაუჩნდათ გამონაყარი, დაუქვეითდათ მადა, დაეწყოთ ჭირვეულობა.
მართალია, ეს ყველაფერი რამდენიმე დღეში გაივლის, თუმცა, როგორც ცნობილია, ჩუტყვავილას ახასიათებს გართულებებიც. აღნიშნული ვირუსული ინფექცია მას შემდეგ უფრო გახდა საყურადღებო, რაც გორში მცირეწლოვანი, სავარაუდოდ, ჩუტყვავილას ვირუსის გართულებებით დაიღუპა.
რამდენად ხშირია წელს ჩუტყვავილას შემთხვევები, რა მდგომარეობაა და იყო თუ არა მძიმე გართულებები მუნიციპალიტეტში, ამის გასარკვევად “გურია ნიუსი” ლანჩხუთის ჯანდაცვის ცენტრის ხელმძღვანელს ნატო მენაღარიშვილს დაუკავშირდა. მისი თქმით, ლანჩხუთში თვეების განმავლობაში ფიქსირდება აღნიშნული ვირუსული ინფექციის ერთეული შემთხვევები და ყველა მათგანი გართულებების გარეშე მიმდინარეობდა.
“ვერ ვიტყვი, რომ ჩუტყვავილას შემთხვევების დაფიქსირების განსაკუთრებული მატება შემჩნეოდეს, თვეების განმავლობაში გვაქვს ინფექციის ცალკეული შემთხვევები და საბედნიეროდ, ყველა შემთხვევა გართულებების გარეშე მიმდინარეობდა”, _ გვითხრა ნატო მენაღარიშვილმა.
იქედან გამომდინარე, რომ ჩუტყვავილა, უმეტესად, ბავშვთა ასაკში ვრცელდება, დავინტერესდით, რა მდგომარეობაა ამ მხრივ მუნიციპალიტეტის საბავშვო ბაღებში და მეტი დეტალის გასარკვევად “გურია ნიუსი” ბაღების ცენტრის ხელმძღვანელს ნატა კობალავას დაუკავშირდა. როგორც მასთან საუბრისას გაირკვა, ამ ეტაპზე ჩუტყვავილას ვირუსული ინფექციის გავრცელების გამო, შუხუთის საბავშვო ბაღის ერთ ჯგუფში, სადაც დაფიქსირდა ინფექციის შემთხვევა, გამოცხადდა კარანტინი და ჯგუფი დროებით დაიხურა.
“ჯანდაცვის ცენტრის ხელმძღვანელის რეკომენდაციის თანახმად, როგორც კი რომელიმე ჯგუფში დაფიქსირდება ჩუტყვავილას შემთხვევა, ბაღებში ცხადდება კარანტინი და ჯგუფი იხურება. იყო ასეთი არაერთი შემთხვევა. ამჟამად შუხუთის საბავშვო ბაღის ერთ ჯგუფში დაფიქსირდა ჩუტყვავილას შემთხვევა და ჯგუფი დროებით დაიხურა”, _ ამბობს ბაღების ცენტრის ხელმძღვანელი.
ექიმთა განმარტებით, ჩუტყვავილა, ზოგადად, ნაკლებად რთულდება. გამონაყრის შემთხვევაში, უმჯობესია, თუ ექიმს მივმართავთ, თუმცა, ინფექციის ამოცნობა სახლის პირობებშიც ადვილია.
“ჩუტყვავილას საინკუბაციო პერიოდი 1-დან 3 კვირამდეა, რომელიც უსიმპტომოდ მიდის. ამას მოჰყვება აქტიური პერიოდი, როდესაც პატარას ტემპერატურის მომატება ეწყება. ტანზე გამონაყრის დაწყებისას ხშირად ტემპერატურა იწევს და კანი ვარდისფერი, სხვადასხვა ზომის, წყლიანი ბურთულების მსგავსი გამონაყრით იფარება. გამონაყრის კანზე გამოჩენა, ანუ ინფექციის აქტიური სტადია, დაახლოებით, 3-4 დღე გრძელდება. ხალხში ამას გამონაყრის “გამოფენასაც” ეძახიან… პატარას ამ დროს ქავილი აწუხებს; უნდა გვახსოვდეს, რომ გამონაყრის დაზიანება არ შეიძლება, რადგან დაავადება, შესაძლოა, გართულდეს, კანზე კი ნაიარევი დარჩეს.
“ჩუტყვავილა” ვირუსული დაავადებაა და მისი ანტიბიოტიკებით მკურნალობა დიდ ეფექტს ვერ იძლევა. როცა ექიმი ამ დროს ანტიბიოტიკებს ნიშნავს, ითვალისწინებს იმას, რომ ამ პრეპარატებმა პატარას უნდა აარიდოს მეორადი, ბაქტერიული დაავადება. სწორედ ამიტომაც არის საჭირო ამ დროს სისუფთავის ზედმიწევნით დაცვა, რათა დაზიანებულ უბნებში ინფექცია არ შეიჭრას. აუცილებელია, რომ ამ დროს ბავშვს დავაჭრათ ფრჩხილები, ხშირად დავბანოთ ხელები. იშვიათია ჩუტყვავილას გართულების შემთხვევები, გამონაყრის დაჩირქება ან ანთებით გართულება.
ჩუტყვავილა ჰაერწვეთოვანი გზით გადაეცემა, კონტაქტით. ამიტომაც როცა საბავშვო ბაღებში ინფექცია ჩნდება, საჭიროა, გამოცხადდეს საკარანტინო პერიოდი.
ეს დაავადება ძალიან მტკიცე იმუნიტეტს გამოიმუშავებს და მისი გადატანის განმეორებითი შემთხვევები არ გვხვდება”, _ განმარტავენ ექიმები.
ავტორი
