ნაგავში, სიცხესა თუ სიცივეში ასობით უსახლკარო ძაღლი, რომლებიც ცოცხლად ლპებიან და პირდაპირ სიკვდილისთვის არიან გამეტებულები_ ეს ბათუმში, აეროპორტისკენ მიმავალ გზაზე არსებული ნაგავსაყრელის ყოველდღიურობაა. როგორც ადგილობრივები ამბობენ, ნაგავსაყრელზე გადაყრილი ძაღლები არ არიან სტერილიზირებული, კასტრირებული, ვაქცინირებული.
„არც ერთ მათგანს არ აქვს ნიშანი, რაც იმას ნიშნავს, სტერილიზაციის, კასტრაციის, ვაქცინირების გარეშეა ეს ძაღლები გადაყრილი, უკანონო სიტყვიერი დავალების საფუძველზე და თანხები კი რაც ამ პროცესებისთვის იყო განკუთვნილი, მითვისებულია.
ფაქტია, რომ ბათუმში ძაღლებს მოუწყვეს ჯოჯოხეთი! ასეთ გაუბედურებულ მდგომარეობაში ვერც ერთ ქალაქში ვერ ნახავთ ცხოველებს, ზოგი მათგანი უკვე ვერც დადის შიმშლისგან გაძვალტყავებულები. ტურისტებს აწონებენ თავს და ცხოველებს ნაგავსაყრელზე ყრიან, მარტივი გამოსავალი იპოვეს!“ _ საყვედურს ვერ მალავენ ის ბათუმელები, ვისაც ცხოველთა მიმართ მცირედი თანაგრძნობა მაინც გააჩნია.
რამდენიმე დღის წინ სოციალურ ქსელში ბათუმში, ზემოთ ხსენებულ ნაგავსაყრელზე გადაღებული ვიდეო გამოქვეყნდა, სადაც კარგად ჩანს, მართლაც რა მძიმე მდგომარეობაა ადგილზე _ შიმშილისგან დაუძლურებული, ჩონჩხად ქცეული ძაღლები ძლივს ახერხებენ გადაადგილებას, ზოგს უკვე ფეხზე დგომაც არ შეუძლია, კიდურები დაუძლურებული აქვთ.
როგორც ცხოველთა მოყვარული ბათუმიდან თამარ ხონელიძე „გურია ნიუსთან“ საუბრისას ყვება, აღნიშნული პრობლემის შესახებ ორი თვის წინ გაიგო და მას შემდეგ, ფაქტობრივად, მისი ყოველდღიური საზრუნავი შეიქნა.
„როცა ამ საკითხით დავინტერესდით და მივედით ადგილზე, სრული ჯოჯოხეთი დაგვხვდა იქ. გვქონდა ინფორმაცია, რომ თავშესაფრიდან ექვსი ძაღლი იყო გადაყვანილი ნაგავსაყრელზე, ექვსის ნაცვლად კი 500 უპატრონო ძაღლი დაგვხვდა. მართლაც წარმოუდგენელი რამ ხდება ადგილზე. მოვახერხეთ და რამდენიმე ძაღლი წამოვიყვანეთ. მეორე დღეს მერიაშიც მივედით. თუმცა, მერისგან პასუხად მივიღეთ, რომ წლებია ასე ხდება და რა მაინცდამაინც ახლა, მისი მერობის დროს დაგვაინტერესა ამ პრობლემამ. მერე ვითომ დაგვპირდა, რომ ნაგავსაყრელის ტერიტორია გადაიხურებოდა და იქ მოეწყობოდა ძაღლებისთვის თავშესაფარი, რაც სასაცილოც კია. ფაქტია, რომ რეალურად არავის აინტერესებს ეს საკითხი, ყველასგან ნულია ყურადღება, სამწუხაროდ, არც გარემოს დაცვაა დაინტერესებული პრობლემით.
მოვახერხეთ და საკუთარი სახსრებით დავიქირავეთ სატვირთო მანქანა, ჯანმრთელი ძაღლები გადმოვიყვანეთ თავშესაფარში, თუმცა, ორი დღის შემდეგ ეს ძაღლები ისევ ნაგავსაყრელზე დაგვხვდა მიყვანილი. ორი თვეა ამ ჩხუბსა და დავიდარაბაში ვართ“, _ ამბობს თამარ ხონელიძე.
იგი იმასაც ამბობს, რომ ძაღლები თავშესაფრის მეპატრონეებისთვის ფულის შოვნის კარგი საშუალებაა: „მთავრობასაც ძაან ვერ გაეჭიმები, ყოველთვიურად თავშესაფარს თითო ძაღლზე 60 ლარი ერიცხება. რეალურად ძაღლს თავშესაფარში 10 დღე თუ აჩერებენ, მერე ადგებიან და ნაგავსაყრელზე ყრიან. ძაღლი აღრიცხვაზე ჰყავთ, ფულიც ერიცხებათ და ძაღლები ნაგავშია გადაყრილი. წლებია ასეთი მდგომარეობაა, პატრონი კი არავინაა“.
თამარ ხონელიძის ინფორმაციით, გარდა ძაღლებისა ბათუმის ნაგავსაყრელი ძროხებითა და თოლიებითაა სავსე, რაც ეპიდემიის გავრცელების საფრთხეს ქმნის.
„ამ მხრივაც სრული კატასტროფაა, ნუთუ არავინ უნდა დაინტერესდეს აქ არსებული ვითარებით?! 21-ე საუკუნეში ვცხოვრობთ ხალხი და წარმოიდგინეთ, ძროხები ნაგავსაყრელზე იკვებებიან. დაახლოებით 800 ძროხა მაინც იქნება. გარდა ამისა, ნაგავსაყრელზე არის ადამიანების, დაახლოებით, 20-კაციანი ჯგუფი ადამიანების, რომლებიც ხვდებიან ნაგავშემკრებ მანქანებს და ნაგვიდან პლასტმასის ბოთლებს იღებენ. არ ვიცი მერე რას უშვებიან ამ ბოთლებს. შესაძლოა, წველიან იქ მყოფ ძროხებს, ასხამენ ამ ბოთლებში და ყიდიან კიდეც. საშინელება ხდება ნამდვილად. ძაღლი, თოლია და ძროხა ერთად ჭამს ლეშსს. სამწუხაროა, რომ მოქალაქეების უმეტესობას რეაქცია არ აქვს იმაზე , რაც ხდება ჩვენს გარშემო“, _ ამბობს თამარ ხონელიძე.
ის, რომ პრობლემა მართლაც რეალურია და წლებია აქტუალურია, ბათუმის მერიის ოფიციალურ გვერდზე გამოქვეყნებულ ინფორმაციას თუ დავეყრდნობით, ადგილობრივ ხელისუფლებაშიც აღიარებენ, კერძოდ კი, მერი არჩილ ჩიქოვანი.
„პრობლემა რეალურად დგას ჩვენი ქალაქის წინაშე და მას დიდი ხნის ისტორია გააჩნია. ამ ეტაპისათვის, ჩვენ ძალიან სწრაფად და ეფექტურად უნდა მოვახდინოთ მყისიერი რეაგირება ყველა მიმართულებით, რათა მიუსაფარ ცხოველთა მდგომარეობა, მათი უფლებები და მათზე ზრუნვის ნაწილი იყოს დარეგულირებული. ამაზე პასუხისმგებლობას სრულად იღებს მუნიციპალიტეტი, თუმცაღა, მნიშვნელოვანია არასამთავრობო ორგანიზაციების გამოცდილება ამ კუთხით და მათთან ურთიერთთანამშრომლობა. ამისათვის, ჩვენ შევქმენით შერეული ჯგუფი, სადაც ჩართულები იქნებიან მუნიციპალური და შესაბამისი სამსახურები, მათი ხელმძღვანელები, კომპანია ,,სევერი“ და ბუნებრივია, არასამთავრობო ორგანიზაციები. პერიოდულად, გაიმართება შეხვედრები აღნიშნული პრობლემატიკის შესწავლის მიზნით, დაისახება კონკრეტული გეგმები და ამოცანები. თუმცა, აქვე მინდა აღვნიშნო, თქვენ იცით, მუნიციპალიტეტს მიღებული აქვს გადაწყვეტილება, რაც უკვე საბიუჯეტო ცვლილებებზე დავაანონსეთ, ახალი თავშესაფრის მშენებლობის შესახებ, რომელიც გრძელვადიან პერსპექტივაში ეფექტურად მოაგვარებს პრობლემას. ეს იქნება თანამედროვე სტანდარტების შესაბამისი უსაფრთხო გარემო, როგორც ცხოველთათვის, ასევე ვიზიტორთათვის. სამედიცინო სფეროდან დაწყებული, ყველა სახის მომსახურება გაეწევა მუნიციპალიტეტის ტერიტორიაზე მყოფ უსახლკარო, მიუსაფარ ცხოველებს. აღნიშნულის გათვალისწინებით, ჩვენ ინტენსიურ რეჟიმში განვაგრძობთ მუშაობას არასამთავრობო ორგანიზაციების ჩართულობით“, _ ვკითხულობთ ბათუმის მერიის ფეისბუქზე, რომელიც შვიდი ივლისითაა დათარიღებული. თუმცა, ცხოველთა ბათუმელ დამცველთა თქმით, ნაგავსაყრელზე ძაღლები ახლაც ცოცხლად ლპებიან.
