რას აცხადებს მოკლული დავით ოთხმეზურის მამა და ვის დასჯას ითხოვს ის

პროფესორი გიორგი ოთხმეზური, 2004 წლის ოქტომბერში მომხდარი, თავისი შვილის მკვლელობის საქმესთან დაკავშირებით სპეციალურ განცხადებას ავრცელებს.

მისი თქმით, დავით ოთხმეზურის მკვლელობაში ბრალდებულს საქალაქო სასამართლოს მოსამართლემ ელენე გოგუაძემ 2016 წლის 27 მარტს წინასწარი პატიმრობა შეუფარდა, თუმცა, მოგვიანებით, ახალმა მოსამართლემ, გიორგი დარახველიძემ, ბრალდებული ასლან ბეჟანიძე გაამართლა და სასამართლო დარბაზიდან გაათავისუფლა.

პროფესორ გიორგი ოთხმეზურის მიერ გავრცელებულ განცხადებას „გურია ნიუსი“ უცვლელად გთავაზობთ:

„მიმართვა საზოგადოებას: თორმეტი წლის წინ, 2004 წლის ოქტომბერში, თბილისში მიცკევიჩის და პეკინის ქუჩების კუთხეში მოხდა საზარელი მკვლელობა. მკვლელმა დანით სამი ჭრილობა მიაყენა 18 წლის დავით ოთხმეზურს, აკადემიკოს მარიკა ლორთქიფანიძის შვილიშვილის და პროფესორ გიორგი ოთხმეზურის შვილს. ამ სამი ჭრილობიდან ერთი მომაკვდინებელი აღმოჩნდა. მკვლელობას უამრავი ხალხი შეესწრო, მათ შორის 5 დაიკითხა სასამართლოში მოწმის სახით. იმავე დღეს ჩატარდა საგამოძიებო ღონისძიება და მკვლელობაში ეჭვმიტანილად ცნობილ იქნა ასლან ბეჟანიძე. მაგრამ 11 წლის განმავლობაში მის მიმართ არანაირი საგამოძიებო ღონისძიება არ გატარებულა, იგი საერთოდ არ დაკითხულა. სამწუხაროდ, ვიღაცის ხელშეწყობით და დახმარებით ბეჟანიძე მიიმალა. 12 წლის შემდეგ ბეჟანიძე დააკავეს. საქალაქო სასამართლოს მოსამართლე ელენე გოგუაძემ, 2016 წლის 27 მარტს მას წინასწარი პატიმრობა შეუფარდა. ამის შემდეგ, მოსამართლე გამოიცვალა. ახალმა მოსამართლემ, გიორგი დარახველიძემ, რომელიც ცნობილია თავისი წარსული „მოღვაწეობით“ – უსიტყვო მორჩილებით ყოფილი ხელისუფლებისადმი, მიუხედავად 5 მოწმის პირდაპირი ჩვენებისა, ასლან ბეჟანიძე გაამართლა და სასამართლო დარბაზიდან გაათავისუფლა.

მრავალრიცხოვან მოწმეთა ჩვენებებისა და სხვა უტყუარი მტკიცებულებების ცინიკური იგნორირება დარახველიძის სამოსამართლეო პრაქტიკის დამახასიათებელი ნიშან-თვისებაა. ეს სწორედ ის დარახველიძეა, რომლის გადაწყვეტილებითაც, მაგალითად, დღემდე დაუსჯელად დასეირნობს ქუჩაში ცნობილი ჯალათი, მწამებელი და ადამიანის უფლებათა დამრღვევი გაგა მკურნალიძე; ასევე, მისი გადაწყვეტილებით, სასამართლოს დარბაზიდან გათავისუფლდნენ დედის თვალწინ სადისტურად მოკლული ჯემალ შელიას მკვლელები, რამდენიმე ბრალდება მოეხსნა მეგის ქარდავას, ბაჩო ახალაიას, „მასტერას“ და ა.შ. ასეთი გადაწყვეტილებები, ცხადია, უმძიმესი დანაშაულებების წახალისებაა და დაუსჯელობის სინდრომის დამკვიდრებას უწყობს ხელს, ხოლო, მეორეს მხრივ,საბოლოოდ ანადგურებს სასამართლო ხელისუფლების ისედაც საკმარისად შერყეულ ავტორიტეტს. რასაც ჩვენი საზოგადოება არ უნდა შეეგუოს. იმედს გამოვთქვათ, რომ ზემდგომი ინსტანციის სასამართლოები გამოასწორებენ ამ აღვირახსნილ უსამართლობას და არ დაუშვებენ, რომ ქართულ მართლმსაჯულებას კიდევ ერთი შავი ლაქა მოეცხოს”, _ აღნიშნულია გიორგი ოთხმეზურის განცხადებაში.

რა მტკიცებულებების საფუძველზე გამოაცხადა პროკურატურამ დავით ოთხმეზურის მკვლელობა 12 წლის შემდეგ გახსნილად, რა ჩვენებები მისცეს მთავარმა მოწმეებმა სასამართლოს და როგორ დაასაბუთა მოსამართლე გიორგი დარახველიძემ მკვლელობაში ბრალდებულის სასამართლო დარბაზიდან გათავისუფლება, ამის შესახებ შეგიძლიათ “გურია ნიუსის” ჟურნალისტური გამოძიებიდან შეიტყოთ: 

ექსკლუზივი – არაერთგზის ნასამართლევი „ოქროს მოწმეები“, რომლებიც ძველ დანაშაულებს ხსნიან

12 წლის წინ მომხდარი გახმაურებული მკვლელობის დღემდე გაუხმაურებელი დეტალები

მკვლელობაში ბრალდებული სასამართლო დარბაზიდან გაათავისუფლეს (ფოტორეპორტაჟი)

რა არგუმენტებით დაასაბუთა მოსამართლემ მკვლელობაში ბრალდებულის უდანაშაულობა

ექსკლუზივი – 12 წლის წინ მომხდარი გახმაურებული მკვლელობის გაუხმაურებელი დეტალები

„ამ პროცესის მონაწილეები პასუხს აგებთ“ _ გარდაცვლილი პატიმრის ძმა პროკურატურას და მთავრობას მიმართავს

ექსკლუზივი – რატომ შეუცვალეს საპატიმრო დაწესებულება განსაკუთრებით მძიმე დანაშაულებში მსჯავრდებულს

პროკურატურის „ოქროს მოწმეები“, რომლებიც ძველ დანაშაულებს ხსნიან – ნაწილი II