წელს, ლანჩხუთში, არა ერთი ინფრასტრუქტურული პროექტის გახორციელებაა დაგეგმილი და საამისოდ ინფრასტრუქტურის სამინისტროდან ლანჩხუთის მუნიციპალიტეტისთვის გაღებული თანხები ოთხ მილიონ ლარს აჭარბებს. ამ თანხას, ასევე, დაემატება მუნიციპალური განვითარების ფონდიდან დაფინანსებული პროექტები, რომლებიც, ძირითადად, სკოლებისა და საბავშვო ბაღების მშენებლობა-რეაბილიტაციას ეხება. ტრადიციისამებრ, მსუყე იქნება ის თანხაც, რომელიც გასული წლების სტიქიის შედეგების სალიკვიდაციოდ, გადმოეცემა ლანჩხუთს და როგორც მერიის ინფრასტრუქტურის სამსახურის უფროსი ლევან ჩხაიძე ამბობს, საუბარია, დაახლოებით, 5 მილიონ ლარზე, რომელიც ჯერ გამოყოფილი არ არის.
ლანჩხუთში გარკვეული ინფრასტრუქტურული პროექტების გახორციელება უკვე დაწყებულია. მაგალითად, ქალაქის ქუჩებზე რკინა-ბეტონის სანიაღვრე არხების მოწყობა და მრავალბინიანი კორპუსების გადახურვა.
სანიაღვრე არხის მოწყობის პატივი კი ამჯერად სულ ცხრა ქუჩას ერგო და ჯამში, ამ პროექტზე მილიონ 169 ათას 999 ლარი დაიხარჯება.
რკინა-ბეტონის სანიაღვრე არხების მოეწყობა ებრალიძის, გოგებაშვილის, წერეთლის, ნინოშვილის (I შესახვევი), ჭანტურიას, თავდიშვილის, ხომერიკის, კუპრეიშვილის და ნათლისმცემლის ქუჩებზე. როგორც ზემოთ აღვნიშნეთ, სამუშაოები უკვე დაწყებულია და მას ტენდერში გამარჯვებული შპს “პალადა” ასრულებს, რომელიც ივნისის ბოლოსთვის გეგმავს სამუშაოების დასრულებას.
რაც შეეხება ქალაქის სამ ქუჩაზე (კუპრეიშვილი, კვირკველია, გორგასალი) მდებარე მრავალბინიანი სახლების სახურავების რეაბილიტაციას, ეს სამუშაოებიც უკვე აქტიურ ფაზაშია და ამისთვის საქართველოს რეგიონებში გასახორციელებელი პროექტების ფონდიდან 390 000 ლარი დაიხარჯება.
ბავშვთა საფეხბურთო აკადემიის მშენებლობის შესახებ ყველა ინფორმირებულია. აქ დარჩენილია თანამედროვე სტანდარტების მქონე ხელოვნურსაფარიანი მინდვრის საფარის მომზადება-დაგება, რომელსაც ფეხბურთის ფედერაცია უეფას თანხებით უკვე ახორციელებს და აკადემიის ეზოს განათების სისტემისა და სველი წერტილების მოწყობა, რომელიც უახლოეს პერიოდში დაიწყება. აღნიშნული პროექტების ღირებულება 1 180 000 ლარს შეადგენს, აქედან 800 000 ლარი უშუალოდ სტადიონის, ხოლო 380 000 ლარი ეზოს გარე განათების მოწყობას მოხმარდება.
ფაქტობრივად, უკვე დასაწყებად გამზადებულია ქალაქის უმთავრესი ქუჩის, ჟორდანიას ქუჩის საფეხმავლო ბილიკების (ტროტუარების), გარე განათების და მიმდებარე ტერიტორიაზე არსებული მრავალბინიანი შენობების გარე ფასადის მოწყობა. ეს პროექტი გარდამავალია და წელს 600 ათას ლარზე მეტი ღირებულების სამუშაოების ჩატარებაა გათვალისწინებული, დანარჩენი კი 2021 წელს გაგრძელდება, სადაც დაახლოებით 900 ათასი ლარის დახარჯვაა დაგეგმილი.
ნახევარ მილიონზე მეტი თანხის დახარჯვა იგეგმება მუნიციპალიტეტის ადმინისტრაციულ ერთეულებში შიდა სასოფლო გზების რეაბილიტაციისთვის. ამ კუთხით სამუშაოებს უნდა ველოდოთ მაჩხვარეთში, ჩიბათში, ნინოშვილში, ლესაში, სადაც ასფალტ-ბეტონის დაგება იგეგმება. მაჩხვარეთში შარშან დაგებულ გზას მნიშვნელოვანი გაგრძელება მოჰყვება და ე.წ. “ოტინაის ღარდამდე” მივა ასფალტის საფარი. ასევე გაგრძელდება ჩიბათში დაწყებული ორი ქუჩიდან ერთ-ერთის გზის საფარის დაგება, მომავალ წელს კი ეს პროექტი ისევ გაგრძელდება.
ჩოჩხათის ტერიტორიულ ერთეულში ალაგ-ალაგ ბეტონის დაგებით გაკეთილშობილდება არსებული გზის საფარი, ხოლო შუხუთსა და გვიმბალაურში წელს მხოლოდ სანიაღვრე არხები მოეწყობა, გვიმბალაურში კი პროექტი გაგრძელდება 2021 წელს და ასფალტის საფარიც დაიგება. გზების კეთილმოწყობის ეს პროექტი გარდამავალი იქნება და გაისად მილიონ ლარამდე თანხის დახარჯვაა დაგეგმილი.
წყლის სისტემის რეაბილიტაციისთვის სოფელ ლესაში წელს 315 ათასი ლარია გამოყოფილი. ეს თემა წლებია პრობლემურია და აქ გარკვეული სამუშაოები უკვე ჩატარდა შიდა სისტემების აღდგენის სახით. ამ პროექტით კი არსებული სათავე ნაგებობის რეაბილიტაცია და ახალი სათავე ნაგებობის მშენებლობა იგეგმება, რასაც წყლის მთავარი მაგისტრალის გამოცვლა დაემატება. ეს პროექტიც გარდამავალია და მომავალ წელს 700 ათას ლარზე მეტი დაიხარჯება ამ საქმის ბოლომდე მისაყვანად.
კიდევ ერთი პროექტი, რომელიც საქართველოს რეგიონებში გასახორციელებელი პროექტების ფონდიდან იგეგმება ნიგოითის ადმინისტრაციულ ერთეულში მთავარი საავტომობილო მაგისტრალის გასწვრივ ახალი განათების სისტემის მოწყობაა. აქ ტენდერში გამარჯვებული უკვე ცნობილია, მაგრამ გარკვეული ტექნიკური წუნის გამო, მშენებელმა სამუშაოების დაწყება ჯერ ვერ შეძლო.
როგორც ლევან ჩხაიძემ გვითხრა, ხარვეზები მალე გამოსწორდება და სამუშაოები მოკლე ხანში დაიწყება. ამ პროექტის ღირებულება 142 486 ლარია.
რაც შეეხება მუნიციპალიტეტში სხვა ფონდებიდან გამოყოფილ თანხით გასახორციელებელ პროექტებს, მუნიციპალური განვითარების ფონდის (მგფ) მიერ რამდენიმე მსხვილი ობიექტის რეაბილიტაცია იგეგმება. ამ კუთხით დაგეგმილია ნიგვზიანისა და სუფსის საბავშვო ბაღების მშენებლობის დაწყება, რომელიც 2021 წელს უნდა დასრულდეს. აქ საუბარია 4 ჯგუფზე გათვლილ ახალი სტანდარტების შენობაზე. რაც შეეხება აცანას, აქ წელსვე აშენდება ბაღის შენობა, ოღონდ, ის მხოლოდ ორ ჯგუფზე იქნება გათვლილი.
სტიქიის თანხების გარეშე, ალბათ, მუნიციპალიტეტის არც წლევანდელი ბიუჯეტი ჩაივლის, ოღონდ ამ ეტაპზე ჯერ ცნობილი არაა რა თანხას გაიმეტებს ცენტრალური ხელისუფლება. პროგნოზით საუბარია, დაახლოებით, 5 მილიონ ლარზე.
რამდენიმე დღეა, დაიწყო აღმაშენებლის ქუჩაზე სავალი გზის რეაბილიტაცია, რომლის მიზანი უკვე დასრულებული ავტობანის ერთ მონაკვეთთან მიბმაა. ეს გზა ყოფილი “ატეკის” მიმდებარე ტერიტორიის გავლით, სავარაუდოდ, ახლო მომავალში შეუერთდება ავტობანის ცალმხრივ მაგისტრალს და თბილისიდან მომავალი ავტომობილები ჯაპანიდან ან სულაც ვაზისუბნიდან ახალ მაგისტრალზე აღმოჩნდებიან, აღმაშენებლის ქუჩიდან გამოვლენ არსებულ გზატკეცილზე და მოძრაობას ბათუმის მიმართულებით გააგრძელებენ.
და ბოლოს, არ შეიძლება არ ვთქვათ ღრმაღელის თემის მოსახლეობის რამდენიმეწლიან პრობლემაზე, რაც გამოწვეულია არსებული შიდა გზების საშინელი მდგომარეობით. მერიის ინფრასტრუქტურის თავკაცი გვარწმუნებს, რომ უკვე არსებობს თანხა, რომლითაც მოხდება სუფსა-წყალწმინდის და სუფსა-ომფარეთი-ღრმაღელის გზის მონაკვეთის პროექტის შედგენა. სავარაუდოდ, აპრილის ბოლოს ეს პროექტი მზად იქნება და ამის შემდეგ უშუალოდ გზის რეაბილიტაციაც უნდა დაიწყოს, თუმცა, გადაწყვეტილად ეს თემა მაინც ვერ უნდა მივიჩნიოთ. საუბარია იმაზეც, რომ სუფსა-გრიგოლეთის შემოვლითი გზის მშენებლობის დროს შეიძლება ეს გზა სარეზერვო მნიშვნელობის აღმოჩნდეს და მაშინ გზების დეპარტამენტი ვალდებული იქნება, მისი აღდგენა დაიწყოს, მაგრამ ეს ვარაუდებია, რეალურად კი რა მოხდება, ეს დროის საქმეა.
