“სოფლის პროგრამის” ფარგლებში ჩოხატაურის მუნიციპალიტეტის მერი დავით შარაშიძე ადგილობრივ წარმომადგენლებთან ერთად ჩოხატაურის მუნიციპალიტეტის სოფელ ახალშენში იმყოფებოდა.
მერმა მოისმინა იქ დამსწრე მოსახლეობისგან სოფლის პრობლემების შესახებ და უპასუხა მათ კითხვებს.
როგორც შეხვედრაზე ითქვა, სოფელში მოწესრიგებული არ არის სანიაღვრე სისტემები, წყალგაყვანილობა და შიდა გზები, რომლებიც უამინდობისას კატასტროფულ მდგომარეობაშია.
“სოფლის პროგრამის” ფარგლებში ახალშენისთვის გამოყოფილია 12 000 ლარი. შეხვედრაზე იმსჯელეს და ერთხმად გადაწყვიტეს, ამ თანხით რეაბილიტაცია ჩაუტარდეს ახალშენი-გორას დამაკავშირებელი გზას და წესრიგში მოიყვანონ ქუჩის განათება, რადგან ზოგიერთ მონაკვეთზე ქუჩა განათებული არ არის.
ახალშენის ერთ-ერთმა მცხოვრებმა გულიკო კუტუბიძემ თქვა, რომ ახალშენელები მთავრობას ყოველთვის გვერდით ედგნენ, მაგრამ მათ ყურადღებას არავინ აქცევდა:
“ჩვენ მთავრობას ყოველთვის გვერდით ვედექით, მაგრამ ჩვენთან არავინ არ იდგა მიუხედავად იმისა, ახალშენიდან ბევრი წარმომადგენელი იყო ადგილობრივ ხელისუფლებაში.
ცენტერაძეების უბანში ოდითგანვე ტრასა იყო, ჩვენ კი, ექვსმა ოჯახმა გზა ჩვენი ფულით გავაკეთეთ, რომელიც ახლა წყალს მიაქვს. ჩვენმა მეზობელმა გააკეთა ხიდიც, რომელიც ახლა ჩავარდნაზეა და სანამ ნორმალურ გზამდე გავალ, ახლა მიწევს გავაღო 2-3 ჭიშკარი და სხვის ეზოებში ვიარო.
ჩვენ არ ვართ მოსახლეობა?! ერთეულები კი დაგიკრავენ ტაშს, რადგან სამსახურები აქვთ და არ უნდათ დაკარგვა, ჩვენ კი ნუ გვაიძულებთ სხვანაირად მოვიქცეთ.
შვილიშვილი გამყავს ხიდზე, რომლის გაკეთებაშიც დაგვეხმარა ვასილ ჩიგოგიძე. გადააგდებს ბავშვი ქვას ხიდიდან და ასე ირთობს თავს. არ შეიძლება, რომ გააკეთოთ სტადიონი, სხვადასხვა გასართობი ატრაქციონები? გაერთობიან ახალგაზრდები.
იყვნენ ხელისუფლების წარმომადგენლები და დაგვპირდნენ, რომ გაკეთდება სტადიონი, მაგრამ არაფერი გაუკეთებიათ.
ქვენობანში, ხიდისთავში ძალიან კარგი პარკი აქვთ, ჩვენ რა დავაშავეთ? როგორ ვატაროთ ამხელა გზაზე ბავშვები გასართობად?”
დავით ცენტერაძემ მოითხოვა თავისი საცხოვრებელი სახლისკენ მიმავალი გზის რეაბილიტაცია, რომელიც კატასტროფულ მდგომარეობაშია:
“ჩემს უბანში გზა ძალიან ცუდ მდგომარეობაშია. ხომ შეიძლება, ერთკილომეტრიანი მონაკვეთი მაინც მოგვიწესრიგოთ? წამობრძანდით და თავად ნახეთ რა, მდგომარეობაშია ეს გზა. მე თვითონ მოვიყვანე შესაბამისი ტექნიკა რამდენიმე დღის წინ და გავასწორებინე ეს გზა, მაგრამ წვიმიან ამინდში გადაადგილება მაინც შეუძლებელია”.
“გზის სრულად რეაბილიტაცია ამ წელს ვერ მოხერხდება, მაგრამ გპირდებით, რომ ამ მონაკვეთს ისე გავაკეთებთ, მსუბუქ ავტომობილს და ქვეითად მოსიარულე ადამიანს არ შეექმნება გავლის პრობლემა, შემდეგ წელს კი მთლიან გზასაც მივხედავთ”, _ უპასუხა დავით შარაშიძემ.
შეხვედრის შემდეგ მერმა ჩვენს კითხვას უპასუხა:
_ ბატონო დავით, “სოფლის პროგრამის” ფარგლებში რომელ სოფლებში იყავით და, ძირითადად, რა პრობლემა იკვეთება?
_ ჩოხატაურის მუნიციპალიტეტში აქტიურად დავიწყეთ “სოფლის პროგრამის” ფარგლებში შეხვედრები. ჩოხატაურის ნახევარი უკვე მოვიცავით.
“სოფლის მხარდაჭერის პროგრამის” ფარგლებში გასახორციელებელი პროექტების შერჩევა მოსახლეობის მიერ ხდება და თითოეული თეთრი საზოგადოების 100 %-იანი ჩართულობით იხარჯება.
რაც შეეხება ძირითად პრიორიტეტებს, საზოგადოებისთვის ეს არის წყალმომარაგების ქსელის რეაბილიტაცია, გარე განათების ქსელის მოწესრიგება და გაუვალი შიდა გზების რეაბილიტაცია.
