კითხვაზე – რა იცით კორონავირუსის შესახებ? – აღმოჩნდა, რომ ოზურგეთში რესპონდენტებს პასუხის გაცემა უჭირთ, იციან მხოლოდ ის, რომ ეს არის ვერაგი დაავადება და აუცილებელია მისგან თავის დაცვა. გამოკითხული ადამიანების ნაწილი აცრილია, ხოლო ნაწილი აუცრელი. ვაქცინირებულები მიიჩნევენ, რომ აუცილებელია ყველა ადამიანი აიცრას და ეს სულაც არ არის საშიში.
“გურია ნიუსის” რესპონდენტების აზრით, იმუნიზაცია უნდა იყოს ნებაყოფლობითი და არა დაძალებით. რაც შეეხება არავაქცინირებულ რესპონდენტებს, მათ სხვადასხვა აზრი გააჩნიათ ვაქცინის შესახებ. მათი ნაწილი ფიქრობს, რომ ვაქცინა სულაც არ არის საჭირო, ზოგმა მათგანმა კი საერთოდაც არ იცის რა წამალი შედის მათ ორგანიზმში, ამიტომ ურჩევნიათ ვაქცინა არ გაიკეთონ. ნიკა ანტივაქსერია. მას რამდენიმე კითხვით მივმართეთ.
– ნიკა, ხართ თუ არა ვაქცინირებული?
– არა.
– აპირებთ თუ არა აიცრათ?
– დიახ, ვაპირებ.
– აქამდე რატომ არ აიცერით?
– აცრა არც ახლა მინდა, თუმცა იძულებული ვარ ავიცრა, რადგან ე.წ. მწვანე ბარათის გარეშე ვერ შევძლებ ყველგან თავისუფლად შესვლას.
-თქვენი აზრით, ვაქცინაცია ნებაყოფლობითი უნდა იყოს?
– რა თქმა უნდა, ნებაყოფლობითი უნდა იყოს, – გვითხრა ნიკამ.
მეორე რესპონდენტმა, საბა ბაკურაძემ, რომელიც უკვე ორჯერაა აცრილი “გურია ნიუსთან” საუბრისას ხაზი გაუსვა, რომ ამ ვირუსის დამარცხება აცრის გარეშე შეუძლებელია.
– ვფიქრობ, რომ კორონავირუსის დამარცხება შესაძლებელია ერთადერთი გზით, ვაქცინაციით. მე მომხრე ვარ ვაქცინაციის და ვფიქრობ, რომ ყველა ჩვენგანი უნდა აიცრას, მაგრამ მესმის იმ ხალხის, რომელსაც საწინააღმდეგო აზრი აქვს და განსხვავებულად ფიქრობს,_ ამბობს ბაკურაძე.
ოზურგეთის საზოგადოებრივი ჯანდაცვის ეპიდემიოლოგი ელზა სიმონიშვილი ჩვენთან საუბრის დროს ამბობს, რომ ვაქცინის გაკეთების მსურველებმა მოიმატა.
_ ქალბატონო ელზა, ძირითადად, რა ასაკის ადამიანები იცრებიან?
– ამ ბოლო პერიოდში მოიმატა ამცრელ პენსიონერთა რაოდენობამ, ეს, თავისმხრივ, განპირობებულია წამახალისებელი ღონისძიებებით.
– რას ფიქრობთ, რატომ არ იცრება საზოგადოების ნაწილი?
_ ერთის მხრივ, სხვადასხვა სუბიექტურმა თუ ობიექტურმა მიზეზმა, რაც ჩვენს ქვეყანაში იყო, ძალიან დიდი გავლენა იქონია. მეორეს მხრივ, სასულიერო პირების დამოკიდებულებამ პანდემიის პირველ ეტაპზე. ჩვენთან, მაგალითად, ტესტირება სავალდებულოა გარკვეული რისკ ჯგუფებისთვის, ამ რისკ ჯგუფებში შედიან რელიგიის მსახურებიც, რომლებიც ვალდებულები არიან გაიკეთონ ტესტი კვირაში ერთხელ. სიმართლე გითხრათ, მხოლოდ იმ შემთხვევაში მოდიან, თუ შეხება ჰქონდათ ინფიცირებულთან. მე წავიკითხე საქართველოს საპატრიარქოს განცხადება, რომ აცრას არანაირი კავშირი არ აქვს რელიგიურ შეხედულებებთან, მაგრამ იმ პირველმა დამოკიდებულებამ მაინც თავისი გავლენა იქონია. მესამე ვარიანტი არის ის, რომ საზოგადოების ნაწილი, რომელიც ინტერნეტში აწყდება ანტივაქსერულ მოწოდებებს, მაინც თავს იკავებს ვაქცინაციისგან.
– და ბოლოს, რატომ უნდა ავიცრათ?
– უნდა ავიცრათ, პირველ რიგში, იმიტომ, რომ ეს არის პანდემია და როგორც მსოფლიოს მრავალწლიანი გამოცდილება აჩვენებს, ეპიდემიასთან ბრძოლის ყველაზე ეფექტური საშუალება არის ვაქცინაცია. მეორე ის, რომ რეგულაციების წესების დაცვა ნაკლებად ხდება, მაგალითად, ნიღბის ტარების მაჩვენებელი 28%-ზეა ჩამოსული. მესამე ის, რომ ჯერჯერობით მსოფლიოში არ არსებობს სპეციფიკური სამკურნალო საშუალება, ამიტომ ჩვენ სხვა გამოსავალი არ გვაქვს და რეალურად რომ შევხედოთ დღევანდელ სინამდვილეს, ყველაზე ეფექტური საშუალება არის ვაქცინაციის ჩატარება.
ავტორი: გუგა ლომაძე
