„გავერთიანდეთ და ერთად ვუთხრათ არა ძალადობას!“ _ ეს იყო დღეს, „ივლიტას ბიბლიოთეკაში“ გამართული შეხვედრის თემა, რომელიც მედიასახლ „გურია ნიუსის“ და გურიის ახალგაზრდული გაზეტის „21-ს ქვევით“ ორგანიზებით გაიმართა.
შეხვედრის მოდერატორები ოზურგეთის რაიონული პროკურატურის ხელმძღვანელის მოადგილე მახლაზ სირაძე, პროკურორი ნიკა მახარაძე; გურიის სამხარეო პოლიციის მთავარი სამმართველოს უფროსის მოადგილე სერგი ბზიშვილი და ჩოხატაურის პოლიციის სამმართველოს უფროსი ზურა მუჯირიშვილი იყვნენ.
ღონისძიებას, რომელიც 2 საათზე მეტ ხანს გაგრძელდა ჩოხატაურის საჯარო და კერძო სკოლების უფროსკლასელები, სკოლის დირექტორები და პედაგოგები დაესწრნენ.
სამართალდამცავი სტრუქტურების წარმომადგენლებმა შეხვედრის მონაწილეებს ძალადობის ფორმებზე, მოსალოდნელ შედეგებზე და მათი აღმოფხვრის გზებზე ვრცლად ესაუბრნენ.
ღონისძიების ძირითადი ნაწილი კითხვა-პასუხს დაეთმო.
ისინი მოდერატორების პირადი გამოცდილებით და სამომავლო გეგმებითაც დაინტერესდნენ.
ისაუბრეს ძალადობის კონკრეტულ შემთხვევებზეც:
_ ეს საკმაოდ მნიშვნელოვანი შეხვედრაა. გისმენთ და უკვე ვიცი, რომ ჩხუბს, ძალადობას გულგრილად არ უნდა ჩავუარო. ვიცი, რომ ხმა უნდა ამოვიღო. თუმცა, მხოლოდ ჩემი აქ ცოდნა საკმარისი არ არის. ვფიქრობ, ასეთი ტიპის საგანმანათლებო ტრენინგებს უფრო მეტი ინტენსივობით უნდა ტარდებოდეს და მხოლოდ ქალაქის სკოლებით არ უნდა შემოიფარგლოს, _ აღნიშნა ერთ-ერთმა მოსწავლემ, რომლებსაც სხვებიც დაეთანხმნენ და პროკურატურის და შინაგან საქმეთა სამინისტროს წარმომადგენლებს სთხოვეს, ასეთ თემებზე სასაუბროდ ყველა სკოლაში მივიდნენ.
ანალოგიური თხოვნა მოდერატორებს პედაგოგებმაც გადასცეს და აღნიშნეს, რომ მსგავს შეხვედრებს მოსწავლეებთან ერთად მშობლებიც უნდა ესწრებოდნენ:
_ ჩემი მოსწავლეობის, სტუდენტობის დროს არ ტარდებოდა ასეთი ტიპის შეხვედრები. ჩვენ სხვანაირად ვიზრდებოდით. ამიტომ, ვფიქრობ, რომ განათლება ჩვენგან _ მშობლებიდან უნდა დაიწყოთ, _ აღნიშნა შეხვედრაზე მყოფმა ერთ-ერთმა მშობელმა.
მოსწავლეების თქმით, აუცილებელია, რომ სკოლებში ფსიქოლოგები მუშაობდნენ:
_ ფსიქოლოგები ყველგან უნდა იყვნენ. ასევე, აუცილებელია მანდატურების მუშაობაც. ჩოხატაურში მხოლოდ ერთ სკოლაშია მანდატური. რატომღაც სოფლის სკოლებს ნაკლები ყურადღება ექცევა. არადა, იქაც სწავლობენ ბავშვები, იქაც არის პრობლემები, _ აღნიშნეს მოსწავლეებმა და შინაგან საქმეთა სამინისტროს და პროკურატურის თანამშრომლებს იმ სკოლების კონკრეტული სიაც გადასცეს, სადაც მათი თქმით მსგავსი ტრენინგების ჩატარება აუცილებელია.
ამავე შეხვედრაზე ითქვა ისიც, რომ სკოლის საპირფარეშოებში უფროსკლასელები მარიხუანას ეწევიან, რაც სხვებისთვის წახალისებაა.
შინაგან საქმეთა სამინისტროს თანამშრომლების თქმით, პოლიცია სკოლებში ვერ შევა და ასეთი ფაქტების არსებობის შესახებ მათ მანდატურმა ან სკოლის ადმინისტრაციამ აუცილებლად უნდა შეატყობინონ.
ამავე შეხვედრაზე ისიც ითქვა, რომ სკოლებში ჯანსაღი ცხოვრების წესის პოპულარიზაციას უფრო მეტი დრო უნდა დაეთმოს; უფრო ხშირად უნდა ესაუბრონ ერთმანეთს და კონფლიქტი არა ძალადობით, არამედ საუბრით გადაჭრან.
ითქვა ისიც, რომ ძალადობა ძალადობით არ აღმოიფხვრება და ამიტომ, პრობლემაზე ყველამ ხმამაღლა უნდა ისაუბროს.
აღსანიშნავია, რომ ეს პირველი შემთხვევაა, რომ მსგავსი ტიპის ტრენინგი შინაგან საქმეთა სამინისტროს და პროკურატურის წარმომადგენლებმა ერთად ჩაატარეს.
უნდა ითქვას ისიც, რომ ჩოხატაურელ მოსწავლეებს პირველად მიეცათ შანსი ძალოვანი უწყების თანამდებობის პირებისთვის პირადად დაესვათ ის შეკითხვები, რომლებიც მათ აქვთ.
შეხვედრის დასასრულს იმედი გამოითქვა, რომ ასეთი შეხვედრა კიდევ გაიმართება, რომელშიც მონაწილეობას ის მოსწავლეები მიიღებენ, რომლებმაც დღევანდელ შეხვედრაში მონაწილეობა ვერ მოახერხეს.
