ჩოხატაურის მუნიციპალიტეტმა ევროკავშირის გრანტი მოიპოვა.
ჩოხატაურის მერიამ, თანააპლიკანტ ორგანიზაციებთან (ინოვაციებისა და სამოქალაქო განვითარების ცენტრი – “პროგრესის სახლი” და “პოლონეთის სოლიდარობის ფონდი PL საქართველოში” (SFPL) ერთად, გაიმარჯვა “ადამიანის უფლებების, დემოკრატიისა და ინტეგრირებული ტერიტორიული განვითარების მხარდაჭერა საქართველოში” ეგიდით ევროკომისიის მიერ გამოცხადებულ საგრანტო კონკურსში პროექტით _ “ჩოხატაური მდგრადი ენერგეტიკული მომავლისკენ”.
რა არის პროექტის მიზანი და რის გაკეთებას ითვალისწინებს ჩოხატაურში _ ამის შესახებ ჩოხატაურის მუნიციპალიტეტის საკრებულოს თავმჯდომარის პირველ მოადგილეს, ზაალ მამალაძეს ვესაუბრეთ.
“ეს არის ჩოხატაურისთვის პირველი პროექტი. ვიყავით თანააპლიკანტი ოზურგეთთან ერთად წინა წლებში, მაგრამ, რაც ცალკე ჩოხატაურმა მოიგო, ეს პირველი შემთხვევაა.
ეს პროექტი მაქსიმალურად სამაგალითოდ უნდა გავახორციელოთ, რომ კიდევ შევძლოთ ჩოხატაურისთვის ბევრი სასიკეთო საქმეების გაკეთება, დამატებითი სახსრების მოძიებით. მით უმეტეს, საქართველოს ევროკავშირი ფინანსურად ეხმარება და კანდიდატის სტატუსს როცა მივიღებთ, კიდევ უფრო მეტად დაეხმარება. ის მუნიციპალიტეტები კი, რომლებიც მზად იქნებიან ევროკავშირის პროექტების დასაწერად და გასახორციელებლად, გაცილებით სწრაფად წავლენ წინ და განვითარდებიან.
პოლონეთის სოლიდარობის ფონდს გამოცხადებული ჰქონდა კონკურსი “ფონდების მოძიების აკადემია”, რომელშიც ჩვენც მივიღეთ მონაწილეობა. კონკურსის მთავარი ამოცანა იყო, რომ ჯგუფებს ესწავლათ თანხების მოძიება. ამ კონკურსის ფარგლებში დაიწერა ეს პროექტი და გავიმარჯვეთ”, _ ამბობს ზაალ მამალაძე.
მისი თქმით, პროექტის მიზანია ჩოხატაურის მუნიციპალიტეტის ადგილობრივი ინფრასტრუქტურის, საცხოვრებელი და საინვესტიციო გარემოს გაუმჯობესებისთვის ენერგოეფექტურობის ღონისძიებების გახორციელება და განახლებადი ენერგიის მოხმარების წამახალისებელი პოლიტიკის გატარება მთავრობის, ბიზნესის და არასამთავრობო სექტორთა ჩართულობით.
“პროექტი დავწერეთ, თანაპარტნიორებიც შევარჩიეთ, რომ უფრო მყარი და ამავდროულად, კოალიციური ყოფილიყო ჩვენი სამუშაო პროცესი. გრანტით გათვალისწინებული თანხაა 772 117 ევრო. ამას ემატება 7%-იანი თანადაფინანსება ჩვენი მუნიციპალიტეტიდან. პროექტი არის სამწლიანი და თითოეული ნაბიჯი გაწერილია. ყველა აპლიკანტს თავისი გეგმა-გრაფიკი და ვალდებულებები აქვს, თუ რა უნდა გააკეთოს, რა მიმართულებით. ჩართული გვყავს ექსპერტები ენერგოეფექტურობის მიმართულებით “კავკასიის ენერგოეფექტურობის სახლიდან”, _ ამბობს ზაალ მამალაძე.
მისი თქმით, პროექტის ფარგლებში საზოგადოების ცნობიერების ამაღლების მიზნით, ჩატარდება ტრენინგები სკოლის მოსწავლეებთან, ახალგაზრდებთან, ბიზნესსექტორის და მედიის წარმომადგენლებთან.
“პირველ რიგში, ამ პროექტში არის განათლების კომპონენტი. ჩვენ მოსწავლე-ახალგაზრდების ჯგუფებთან გვექნება ტრენინგები ენერგოეფექტურობის მიმართულებით. მნიშვნელოვანია, ვიცოდეთ, რას გვაძლევს ენერგოეფექტურობა, მით უმეტეს, დღევანდელი მსოფლიოს გადასახედიდან _ უკრაინაში მიმდინარე მოვლენების გამო საკმაოდ ბევრ ქვეყანას შეექმნა პრობლემა ენერგომიმართულებით. ამიტომ ძალიან მნიშვნელოვანია, რომ იმ რესურსით, რა რესურსიც დღეს გვაქვს, ადამიანებმა მოახერხონ და ენერგოეფექტური გახადონ თავისი სამუშაო ადგილი და ა. შ.
ამ მიმართულებით გვექნება ტრენინგების კურსი სკოლის მოსწავლეებისთვის, მედიის წარმომადგენლებისთვის, ბიზნესსეტქორისთვის. ტრენინგების შემდეგ გამოვაცხადებთ 28-მდე საგრანტო კონკურსს. ეს არის, დაახლოებით, 3 000- 5000 ევრომდე საგრანტო ჯილდო. რის შედეგადაც, ახალგაზრდები შეძლებენ, ტრენინგებზე მიღებული ცოდნა უკვე პროექტებში ასახონ. ამ კონკურსის დროს კომისიის მიერ შერჩეული 10 მონაწილე შეგვიძლია წავიყვანოთ პოლონეთში, სადაც ადგილზე გაეცნობიან მსგავს მაგალითებს”, _ ამბობს მამალაძე.
რაც შეეხება პროექტით გათვალისწინებულ სამუშაოებს, ის 7 საბავშვო ბაღის ენერგოეფექტურ აღჭურვას ითვალისწინებს, თუმცა, კონკრეტულად რომელი ბაღებში დამონტაჟდება სისტემა, ზაალ მამალაძე ჩვენთან საუბრისას, ჯერჯერობით, არ ასახელებს.
აქვე შეგახსენებთ, რომ ჩოხატაურში ზოტის და ნომერ პირველი საბავშვო ბაღები ენერგოეფექტური სისტემით უკვე აღჭურვილია.
“ამ პროექტში, ასევე, მნიშვნელოვანია 7 საბავშვო ბაღის ენერგოეფექტურად აღჭურვა. ეს საკითხი უკვე გავიარეთ ექსპერტებთან. ერთი არის კომპლექსური პაკეტი, მეორე _ ოპტიმალური პაკეტი: ეს არის ჭერის თბოიზოლაცია, მზის ფოტოელექტრო სისტემის მონტაჟი, ნათურების შეცვლა. თუ კი რომელიმე ბაღში თბებიან შეშის ღუმელზე, იქ აუცილებლად შევიტანთ ენერგოეფექტურ ღუმელებს. ამავე დროს, შემოწმდება ფანჯრების თბოიზოლაცია შემოწმებული. თუ გათბობის სისტემა გაზზე მუშაობს, შემოწმდება, როგორ არის ის დამონტაჟებული და მოეწყობა ცენტრალური გათბობის სისტემა.
დაახლოებით, ვიცით, რას დავხარჯავთ თითო ბაღზე _ დაახლოებით, 40-იდან 45 ათას ევრომდე”, _ ამბობს ზაალ მამალაძე და აღნიშნავს, რომ მნიშვნელოვანია რეინვესტიციის მექანიზმის შემუშავება.
_ რამდენად ეფექტურად მუშაობს სისტემა ბაღებში, სადაც უკვე დამონტაჟდა?
_ ორივე ბაღში, წლის განმავლობაში 4 000 ლარამდე შეღავათი გაეწია ბიუჯეტს, რადგან თბილი წყალია, გათბობის სისტემაც მოწყობილია. ვარვარა ნათურები ლედნათურებით შეიცვალა.
ექსპერტებთან ერთად უნდა შევიმუშავოთ რეინვესტიციის მექანიზმი. ეს ნიშნავს, რომ თუ ახლა იხარჯება, ვთქვათ, თვეში 1 000 ლარი და ამ ღონისძიების შედეგად შემცირდება ხარჯი 800 ლარამდე, უნდა დავგეგმოთ, თუ რანაირად შეიძლება დარჩენილი 200 ლარით რეინვესტირების გაკეთება, რომ სხვა ბაღებიც მოვიცვათ. საუბარია არა მხოლოდ ბაღებზე, არამედ შენობებზე, სადაც ხარჯი დიდია.
გარდა ამისა, ევროკავშირის გრანტის ფარგლებში, როგორც ზაალ მამალაძე ამბობს, ენერგოეფექტური ნათურები უდაბნოს მონასტრის გზაზეც დამონტაჟდება.
“ამ პროექტით არის გათვლილი უდაბნოს მიმართულებით ენერგოეფექტური გარე განათების მოწყობა. შეგახსენებთ, რომ გზა გაკეთდა, მაგრამ ის პროექტი არ ითვალისწინებდა გარე განათების მოწყობას”, _ გვითხრა მამალაძემ.
კიდევ ერთი მნიშვნელოვანი საკითხი, ზაალ მამალაძის თქმით, ისაა, რომ გრანტით ფარგლებში, გარკვეული თანხა ჩოხატაურში არსებული კინოს სახლის ახალგაზრდულ ცენტრად გადაკეთებას მოხმარდება. კერძოდ, ინოვაციების სივრცის მოსაწყობად კომპიუტერულ ტექნიკას და სხვა საჭირო ინვენტარს შეიძენენ:
“შემდეგი აქტივობა არის კინოს სახლის ახალგაზრდულ ცენტრად გადაკეთება. აქ უნდა იყოს ინოვაციების სივრცე. საუბარია არსებული სივრცის ისეთი ტექნიკით აღჭურვაზე, როგორიცაა კომპიუტერები _ 10 ცალი 4 500-ლარიანი, ხოლო 2 შედარებით მძლავრი _ 6 500 ლარის ღირებულების. ასევე, ხეზე ჭრის ლაზერული კომპიუტერი. ულტრაიისფერი პრინტერი სამრეწველო პრინტისთვის, იგეგმება ლოგორობოტის შეძენა, ლაზერული პროექტორი თავისი ეკრანით.
გარდა ამისა, ჭკვიანი სკამების შეძენაც გვაქვს გადაწყვეტილი და ამ პანელის მიერ დაგროვებული ენერგიით შეძლებენ ადამიანები ტელეფონების დამუხტვას, მაგალითად, პარკში.
გარდა ამისა, გვინდა, რომ ელექტრომობილების დამტენიც შევიძინოთ. ჩოხატაურში რამდენიმე ადამიანს უკვე ჰყავს ელექტრომობილი. რაც შეეხება დამტენს, ის განთავსდება დაბის ცენტრში, სადაც შეიძლება ტურისტებმაც ისარგებლონ და დატენონ ავტომობილი”, _ ამბობს ზაალ მამალაძე.
კითხვაზე, არის თუ არა ჩოხატაურის საგზაო ინფრასტრუქტურა მოწყობილი ისე, რომ ელექტრომობილებმა თავისუფლად იარონ, მამალაძე ამბობს, რომ გზები ბევრი მიმართულებით კეთდება.
რაც შეეხება კონკრეტულ მიმართულებას, რომელიც ჩოხატაურს ოზურგეთთან ბუკნარის გავლით აკავშირებს და ადგილობრივი მოსახლეობა თუ მძღოლები, გზის მოუწესრიგებლობის გამო ხშირად საყვედურს გამოთქვამენ, ამ საკითხზე ზაალ მამალაძე ამბობს:
“ელექტრომობილებიც ჩვეულებრივი მანქანების მსგავსად გადაადგილდებიან. გზის მოწესრიგება უკვე მუნიციპალიტეტის ცალკე საზრუნავია. გზა ბევრი მიმართულებით კეთდება. იყო მზა პროექტი, რომელიც ბუკნარი-ოზურგეთის დამაკავშირებელი გზის მოწყობას ისახავდა მიზნად, თუმცა, შემდეგ მოხდა ფასთა ცვლილება. ამ გზას 2023 წელს რამენაირად უნდა ეშველოს. ეს არის ჩვენი აღმასრულებელი ხელისუფლების მთავარი დაპირება”, _ გვითხრა მამალაძემ.
ავტორი
