სახელწიფო აუდიტის დასკვნაში უარყოფით კონტექსტში მოხვდა ლანჩხუთში ბოლო წლებში გახორციელებული ინფრასტრუქტურული პროექტები. დასკვნის მიხედვით, ამ კუთხით გახორციელებული სამუშაოები რიგ შემთხვევებში არ აკმაყოფილებს ხელშეკრულებით განსაზღვრულ მოთხოვნებს და შესრულებულია პროექტის შეუსაბამოდ. დასკვნაში ისიცაა ნათქვამი, რომ მათი გარკვეული ნაწილი უკვე დაზიანებულია, თუმცა, მუნიციპალიტეტს ხარვეზების გამოსწორების მიზნით არ გაუტარებია შესაბამისი ღონისძიებები, რის გამოც მოსახლეობამ ვერ მიიღო პროექტით გათვალისწინებული შედეგი გრძელვადიან პერიოდში.
აუდიტის დასკვნის მიხედვით, 2016 წლის აპრილში, ლანჩხუთის მუნიციპალიტეტმა მილიონ 175 ათასი ლარის ღირებულების ხელშეკრულება გააფორმა შპს “სამკუთხედთან”, საიდანაც 393,6 ათასი ლარით ქალაქის რვა ქუჩაზე სანიაღვრე არხები უნდა მოეწყო.
ხელშეკრულების მიხედვით, ობიექტის საგარანტიო ვადა სამუშაოების მიღებიდან სამი წელი იყო და ამ ხნის განმავლობაში, შემსრულებელი ვალდებული იყო, საკუთარი ხარჯებით აღმოეფხვრა ექსპლუატაციის პროცესში წარმოქმნილი ხარვეზები.
დასკვნის მიხედვით, მართალია, ლანჩხუთის ხელმძღვანელობამ მიმწოდებელს მიმართა კიდეც დაზიანებების გამოსასწორებლად, თუმცა, “სამკუთხედს” შესაბამისი ღონისძიებები არ გაუტარებია. არც მუნიციპალიტეტის შესაბამის პასუხისმგებელ პირებს უზრუნიათ შემდგომი სამართლებრივი ღონისძიებებისთვის მიემართათ. შედეგად კი ისეთ სამუშაოებში, რომლის ნაწილიც ექსპლუატაციიდან მალევე დაზიანდა, ბიუჯეტმა რამდენიმე ათასი ლარი გაიღო.
“აუდიტის ჯგუფის მიერ საკითხით დაინტერესების შემდგომ, გამგეობამ მიმწოდებელს მოთხოვა, ნაწილობრივ გამოესწორებინა არსებული ხარვეზები. პასუხისმგებელი პირის განმარტებით კი დარჩენილი დაზიანებები წარმოიქმნა არა მიმწოდებლის მიზეზით, არამედ ავტოსაგზაო შემთხვევების ან ქუჩების თოვლისგან გაწმენდისას”, _ ვკითხულობთ აუდიტის დასკვნაში, სადაც, ასევე, წერია, რომ არსებულ შემთხვევაშიც ევალებოდა მუნიციპალიტეტს სათანადო ღონისძიებებისთვის მიემართა, რაც აუდიტის დასკვნის მიხედვით, ასე არ მომხდარა.
აღსანიშნავია, რომ ერთ-ერთი ქუჩა, სადაც სახელმწიფო აუდიტმა სანიაღვრე არხების მოწყობის სამუშაოების ხარისხი დაიწუნა, ბესიკის ქუჩაა, რომლის მოსახლეობამაც ამ მხრივ არაერთხელ დააფიქსირა საკუთარი პრეტენზიები და აქციაც კი გამართა. მაშინ მოსახლეობა ამბობდა, რომ სპეციალური ბეტონის ფილები, რომლითაც სანიაღვრე არხები და მილხიდები გაკეთდა, უხარისხო იყო:
“სამუშაოების ხელმძღვანელმა კალანდაძემ გვითხრა, რომ ორი დღის მოჭრილია ბეტონი და ზედ რაიმე სიმძიმე არ გაატაროთო. ერთი თვე ეზოში მანქანები ვერ შეგვყავდა. თუ ასე იყო და არ შეიძლებოდა, 25 დღის მერე დაეგოთ, რა ეჩქარებოდათ?! უხარისხო იყო და ამიტომაც, ქუჩის ბოლოში მალევე ჩაინგრა. რამდენიმე დღის წინ, კოკისპირულ წვიმაში გამოცვალეს. ეტყობა, გაიგეს, საჩივარს რომ ვწერდით და ხელმოწერებს ვაგროვებდით. აბა, მანამდე არავის მოუქცევია ყურადღება. თუმცა, ისე გააკეთეს, ახლა წყალი ვეღარ გადის, ქვებითაა ამოვსებული იქაურობა. ტყუილად ხარჯავს სახელმწიფო ამხელა ფულს. სამუშაოები რომ დასრულდა, ხომ უნდა მოსულიყვნენ და ადგილზე ენახათ, რა და როგორ გაკეთდა?! არავინ არ მოსულა, არავის შეუმოწმებია, რა გაკეთდა და როგორ. გამოკეტილები არიან კაბინეტებში და იმის იქით არ იხედებიან”, _ ამბობდნენ მაშინ ბესიკის ქუჩის მცხოვრებლები. თუმცა, მოსახლეობის მხრიდან გაჟღერებულ პრეტენზიებს არ იზიარებდა ადგილობრივი ხელისუფლება და ბესიკის ქუჩის მაცხოვრებლების საპასუხოდ ამტკიცებდა, რომ ყველაფერი პროექტთან შესაბამისობაში გაკეთდა და საამისო ექსპერტიზის დასკვნაც არსებობდა.
აუდიტმა გვერდი ვერც ჟორდანიას ქუჩაზე შიდა ეზოების მოასფალტების საკითხს აუარა, რომლის შესახებაც ადგილობრივი მოსახლეობის პრეტენზიები არაერთხელ გააშუქა “გურია ნიუსმა” და მაშინ გამგეობის პრესასთან ურთიერთობის განყოფილებამ ბრალიც დაგვდო ინფორმაციის არაზუსტ გაშუქებაში. აუდიტის დასკვნის მიხედვით თუ ვიმსჯელებთ, პრეტენზიები, რომელსაც მოსახლეობა აჟღერებდა, არგუმენტს მოკლებული სულაც არ ყოფილა.
საქმე ისაა, რომ ქალაქის კეთილმოწყობის სამუშაოების შესყიდვის მიზნით, მუნიციპალიტეტმა 2015 წლის მიწურულს მუნიციპალიტეტმა ხელშეკრულება გააფორმა შპს “სამკუთხედთან”. ამ ხელშეკრულების მიხედვით, შემსრულებელ კომპანიას 2 508 კვ.მ-ზე ევალებოდა ასფალტბეტონის გზის საფარის მოწყობა, რისთვისაც 104,8 ათასი ლარი იყო განკუთვნილი.
ობიექტი, რომელიც 2017 წლის მარტში ჩაიბარა მუნიციპალიტეტმა და რომლის საგარანტიო ვადად ორი წლით იყო განსაზღვრული, სახელმწიფო აუდიტმა ჩაბარებიდან რამდენიმე თვეში შეამოწმა, კერძოდ, 2017 წლის ივნისში და ხარვეზებიც გამოავლინა.
“გამოვლინდა, რომ სამუშაოები შესრულებულია უხარისხოდ. კერძოდ, ასფალტის საფარის ზედაპირი არასწორია, ზოგ ადგილას ჩავარდნილია, ხოლო რამდენიმე მონაკვეთი ჩაკერებულია ფრაგმენტულად.
აღსანიშნავია, რომ მუნიციპალიტეტს არ გაუტარებია სათანადო სამართლებრივი ღონისძიებები არსებული ხარვეზების აღმოფხვრის მიზნით. შედეგად მუნიციპალიტეტის მიერ 104,8 ათასი ლარი გადახდილია ისეთ პროექტში, რომლის ნაწილიც დაზიანებულია და საჭიროებს დამატებით სამუშაოებს”, _ წერია სახელმწიფო აუდიტის დასკვნაში.
გარდა ამისა, აუდიტმა უარყოფითი დასკვნა ქალაქში, დუმბაძისა და წმინდა ნინოს ქუჩებზე სანიაღვრე არხების მოწყობის სამუშაოებზეც დადო. კერძოდ, დასკვნის მიხედვით, მუნიციპალიტეტმა 200, 6 ათასი ლარი ისეთ სამუშაოებში გადაიხადა, რომლის ნაწილიც არ შეესაბამებოდა ხელშეკრულებით განსაზღვრულ მოთხოვნებს.
აუდიტმა დასკვნა აკეთში, მდინარე სუფსაზე ნაპირსამაგრის მოწყობის სამუშაოების შესახებაც გამოაქვეყნა, რომელზეც მუნიციპალიტეტმა 2 194, ათასი ლარის ღირებულების ხელშეკრულება კომპანია “ვლადნეფტპროდუქტს” გაუფორმა.
წესით, სატენდერო დოკუმენტაციის მიხედვით, მიმწოდებლის მიერ წარმოდგენილ ექსპერტიზის დასკვნაში ასახული უნდა ყოფილიყო შესრულებული სამუშაოების მოცულობისა და ხარისხის შესაბამისობა ტექნიკურ დოკუმენტაციასთან და საქართველოში მოქმედ ტექნიკურ რეგლამენტთან. რეალურად კი სამხარაულის ექსპერტიზის ბიუროს მიერ გაცემული დასკვნის მიხედვით, მდინარე სუფსაზე გახორციელებული სამუშაოების ხარისხის შემოწმება არ მომხდარა. მიუხედავად ამისა, მუნიციპალიტეტმა “ვლადნეფტპროდუქტს” სრულად აუნაზღაურა ხელშეკრულებით გათვალისწინებული თანხა.
“მიზანშეწონილია მუნიციპალიტეტმა მომავალში გაითვალისწინოს მსგავსი გარემოებები და სამუშაოების მიღება-ჩაბარება განახორციელოს ხელშეკრულების პირობების შესაბამისად”, _ სამომავლოდ რეკომენდაციას აძლევს აუდიტი ლანჩხუთის ხელმძღვანელობას.
