| პროფესიის შერჩევის დროს, ხშირად ვდგავართ არჩევანის წინაშე, რამდენად მოგვცემს ჩვენი საყვარელი პროფესია დასაქმების შესაძლებლობას? როგორია კონკურენცია და როგორ შეიძლება ჩვენი საქმიანობით მივიღოთ სასიამოვნო და ხილვადი შედეგები?
არქიტექტურის მიმართულება კი სხვა მრავალ პროფესიას შორის გამოირჩევა მდგრადობითა და მუდმივი გამოწვევებით, ის არის აუცილებელი და მუდმივად არსებული პროფესია ყველა საზოგადოებაში, რომელიც გამოირჩევა მუდმივად მზარდი ინდუსტრიითა და ინოვაციურობით. საერთაშორისო გამოცდილების შეძენა, მრავალფეროვანი კულტურის შესწავლა და თანამედროვე პერსპექტივების გაცნობა ამ პროფესიის განუყოფელი ასპექტებია. უფრო მეტიც, მისი უნივერსალური ბუნება საშუალებას აძლევს არქიტექტორს თავისი კარიერა გააგრძელოს როგორც ქვეყნის შიგნით, ასევე საერთაშორისო ბაზარზე. ნინა ავდალიანი საქართველოს უნივერსიტეტის არქიტექტურის პროგრამის კურსდამთავრებული და არქიტექტურის საერთაშორისო კონკურს _ TerraViva Competitions-ის გამარჯვებულია. მას ვესაუბრეთ მის პროფესიულ არჩევანსა და არქიტექტურის მიმართულებით არსებულ გამოწვევებსა და შესაძლებლობებზე.
_ ნინა, რატომ გადაწყვიტეთ არქიტექტურის საბაკალავრო პროგრამაზე ჩაბარება? _ ჩემი ჩაბარება არქიტექტურაზე გარკვეულწილად მოულოდნელი იყო. თინეიჯერობისას ხელოვნებისადმი სიყვარულის გამო სპონტანურად ავირჩიე საბაკალავრო პროგრამა არქიტექტურაში საქართველოს უნივერსიტეტში. არ ვიცოდი, რომ ეს გადაწყვეტილება ერთ-ერთი საუკეთესო იქნებოდა, რაც კი აქამდე მიმიღია. როცა დავიწყე, ბოლომდე ვერ ვიაზრებდი არქიტექტურის არსს, თუმცა, საქართველოს უნივერსიტეტის საუკეთესო ლექტორებთან თანამედროვე და ინოვაციური სწავლების მეთოდებმა სრულიად ახალი შესაძლებლობების სამყარო გახსნა ჩემთვის. გლობალურად რომ შევისწავლე არქიტექტორები და მათი ნამუშევრები, ძალიან გამიტაცა მეტაბოლიზმის მოძრაობამ და უსაზღვრო არქიტექტურის კონცეფციამ, როგორიცაა, მაგალითად, ესპერანტოს სოფელი. _ როგორც ამბობთ, საქართველოს უნივერსიტეტში ჩაბარება თქვენი მხრიდან ერთ-ერთი საუკეთესო გადაწყვეტილება იყო, შეგიძლიათ უფრო ვრცლად მოგვიყვეთ თქვენი სტუდენტური გამოცდილების და იქ არსებული შესაძლებლობების შესახებ? _ მოსაყოლი ძალიან ბევრია, თუმცა გამოვყოფ ჩემთვის ძალიან მნიშვნელოვან გამოცდილებას, კერძოდ, როცა მესამე კურსზე ვიყავი, გაჩნდა ჩვენი უნივერსიტეტის ხელოვნებისა და ჰუმანიტარულ მეცნიერებათა სკოლის სართულის რედიზაინის შესაძლებლობა და ჩვენი სტუდენტებისგან შემდგარმა ექვსკაციანმა გუნდმა შექმნა დიზაინი სტუდენტური სამუშაო სივრცის ხელახალი წარმოსახვისა და ჩვენი რეალობის 2D ვერსიაში შესვლის თემატიკაზე. ორსახოვნება გამოიხატება არა მხოლოდ განზომილებების, ასევე არქიტექტურისა და არქეოლოგიის ფაკულტეტის ძირფესვიან კავშირს შორის. ხელით დახატული შავ-თეთრი ბილიკით ვხვდებით ხის პორტალების მეორე მხარეს მიმალული აუდიტორიების RGB ვერსიებს. _ გარდა შიდა საუნივერსიტეტო შესაძლებლობებისა, რა ხდის განსაკუთრებულს თქვენს საუნივერსიტეტო გამოცდილებას? _ ჩემი საუნივერსიტეტო გამოცდილება ნამდვილად განსაკუთრებულია, რაც დაკავშირებულია აქაურ თავისუფალ, სტუდენტების ინტერესებს მორგებულ სწავლებასთან და ზოგად გარემოსთან. აქ მე ჩამოვყალიბდი როგორც პროფესიონალი ჩემს საქმეში, ასევე გავიზარდე პიროვნულადაც. გულახდილად რომ გითხრათ, ჩემი წარსული გამოცდილებებიდან გამომდინარე გუნდური მუშაობა არასოდეს იყო ჩემი ძლიერი მხარე, მაგრამ საქართველოს უნივერსიტეტი დამეხმარა, რომ ეს უნარი გამომემუშავებინა, რადგან როგორც მოგეხსენებათ დღეს გუნდური მუშაობა წარმატებული საქმიანობისთვის ერთ-ერთი მთავარი უნარია. ალბათ, გაინტერესებთ რა შუაშია გუნდური მუშაობა ჩემს გამოცდილებასთან, მოგიყვებით, მოკლედ სამ თანაკურსელთან საერთაშორისო არქიტექტურულ კონკურსებზე მუშაობისთვის გაერთიანებამ ჩემი პერსპექტივა შეცვალა. ერთად მივაღწიეთ მნიშვნელოვან წარმატებებს და ეს ყველაფერი UG-ის ხელოვნებისა და ჰუმანიტარულ მეცნიერებათა სკოლის მხარდაჭერის დახმარებით. სკოლის დირექტორი, დეკანი და ლექტორები, რომლებიც მხარს გვიჭერდნენ მე და ჩემს კოლეგებს ყოველი ამოცანისა და გამოწვევის დროს, იყვნენ უფრო მეტი, ვიდრე უბრალოდ მენტორები და ვამაყობ იმით, რომ ახლა მათ კოლეგად ვითვლები. _ ნინა, ძალიან მნიშვნელოვან საკითხებს შეეხეთ და დიდი მადლობა გულახდილობისთვის. ახლა რას საქმიანობთ და რას გვეტყვით სამომავლო მიზნებზე? _ სულ ახლახან მე და ჩემმა მეგობარმა ივანე გვენცაძემ გავიმარჯვეთ საერთაშორისო არქიტექტურულ კონკურსში Hybrid Coworking, რომელიც ასევე ორგანიზებული იყო TerraViva Competitions-ის მიერ. ჩემი თავის მადლობელი ვარ, რომ სწორი არჩევანი გავაკეთე. აქ ჩემი ლექტორებისგან საინტერესო, ინოვაციული, თანამედროვე სწავლების მეთოდის წყალობით მე ძალიან გავიზარდე, ერთი მხრივ მივიღე საკმარისი ცოდნა არქიტექტურის შესახებ, მივიღე მონაწილეობა ისეთ საერთაშორისო კონკურსებში, როგორიცაა TerraViva Competitions, YAC, Buildner და ა.შ. და გავიზარდე პიროვნულადაც. ახლა კი ვმუშაობ ერთ-ერთ საუკეთესო არქიტექტურულ სტუდიოში, პროფესიით, რომელიც მიყვარს და ვერასდროს მომბეზრდება! |
