მიუსაფარი ძაღლების შესახებ “გურია ნიუსის” ვებგვერდზე გამოქვეყნებულმა სტატიამ ცხოველთა მოყვარულების და მათი უფლებადამცველების უკმაყოფილება გამოიწვია _ მათ არაერთი კომენტარი დატოვეს პოსტის ქვეშ.
სამოქალაქო აქტივისტი და ცხოველთა უფლებადამცველი ქრისტინა ორაგველიძე წერდა:
_ რატომ არ დაგიწერიათ სტატია სტერილიზაცია-კასტრაციის მნიშვნელობაზე?! მოვლა-პატრონობის წესებზე?! რატომ?! ჩოხატაურმა ტენდერი რომ საერთოდ არ გამოაცხადა, ეს იცით? შიმშილით იხოცებიან ჩოხატაურში საცოდავი ძაღლები და აგრესია გიკვირთ? მე არ მიკვირს!!!
აღნიშნულთან დაკავშირებით კომენტარის ავტორს დავუკავშირდით.
_ ქრისტინა, რას გვეტყვით ამ თემასთან დაკავშირებით? როგორ ფიქრობთ, რა უნდა გაკეთდეს, რომ ეს პრობლემა აღმოიფხვრას?
_ მორალურად ძალიან მძიმეა ქუჩაში ხედავდე ამდენ გაუბედურებულ და დაუძლურებულ ცუგას, რომლებზეც ადამიანები სისტემატურად ძალადობენ. პრობლემა არის ისიც, რომ ჩვენ ვართ აქტივისტები, რომლებსაც არ გვაქვს დაფინანსებები და ჩვენი ხარჯებით, შეგროვებული თანხებით გვიწევს ადამიანის მიერ დასახიჩრებული ცუგას განკურნება, რაც ზოგჯერ ფატალურად სრულდება.
სანამ ადამიანები არ გაიაზრებენ, რომ თუ მათ არ შეუძლიათ პასუხისმგებლობის აღება სულიერ არსებებზე, რომლებიც ყველაფერს ისე გრძნობენ, როგორც ჩვენ, მანამ ეს პრობლემა არ მოგვარდება.
არაერთხელ მქონდა შეხვედრა მერის წარმომადგენლებთან, მაგრამ ჯერ ქმედითი ნაბიჯები არ გადადგმულა. ჩემი აზრით, პირველ რიგში, უნდა გაკეთდეს მიუსაფარი და პატრონიანი ცხოველების აღწერა, შეიქმნას ერთიანი ბაზა, რომ გავიგოთ რამდენად დიდ პრობლემასთან გვაქვს საქმე; მასობრივად გასტერილდეს, როგორც მიუსაფარი, ასევე, პატრონიანი ძაღლები.
მაქვს ინფორმაცია, რომ ჩოხატაურმა მიუსაფარი ძაღლების სტერილიზაცია-კასტრაციისთვის ტენდერი არ გამოაცხადა _ ჩვენ, ცხოველთა მოყვარულებს, ხშირად გვაქვს შეხება ბაილეთში არსებულ პოპულაციის მართვის ცენტრთან. როცა მოვთხოვეთ წარმომადგენელს ჩოხატაურში ცუგების გასტერილება, გვითხრეს, რომ აღნიშნულთან დაკავშირებით ჩოხატაურს ტენდერი არ გამოუცხადებია.
ჩვენ ამ საკითხზე კომენტარი “გურია ნიუსმა” ჩოხატაურის მუნიციპალიტეტის მერს დავით შარაშიძეს სთხოვა:
_ ბატონო დავით, როგორც ჩვენთვის გახდა ცნობილი, მიუსაფარი ძაღლების კასტრაცია-სტერილიზაციის დაფინანსებასთან დაკავშირებით, ჩოხატაურს ტენდერი არ გამოუცხადებია. როცა მუნიციპალიტეტში მძაფრად დგას მიუსაფარი ძაღლების საკითხი _ ისე მომრავლებულები არიან ისინი, რომ ღამით კი არა, უკვე დღისით გავლაც საშიში ხდება,
ასეთ პირობებში, რატომ არ გამოცხადდა ტენდერი?
გარდა ამისა, თქვენ “გურია ნიუსთან” საუბრისას გააჟღერეთ, რომ იგეგმება თავშესაფრის აშენება. ჩვენს მკითხველს აინტერესებს, როდის დაიწყება მშენებლობა…
_ ცხოველების კასტრაცია და სტერილიზაცია არაფერ შუაშია ცხოველების აგრესიულობასთან. მე ვფიქრობ, რომ წყალში გადაყრილი ფულია სტერილიზაცია/კასტრაციისთვის საჭირო თანხები. აუცილებელია, ავაშენოთ ძაღლების თავშესაფარი.
სტერილიზაციით და კასტრაციით ძაღლების რაოდენობას ჩვენ ვერ ვამცირებთ _ რომ მცირდებოდეს ეს რაოდენობა და თავშესაფარში მიჰყავდეთ, კი, ბატონო, მაგრამ გაუკეთებენ სტერილიზაცია-კასტრაციას და აბრუნებენ ისევ ძველ ადგილას. ამდენად, რა აზრი აქვს ამ ყველაფერს?
დიახ, საუბარია ინტერმუნიციპალური თავშესაფრის აშენებაზე, მაგრამ ეს დიდ თანხებთანაა დაკავშირებული და ყველა მხრიდან ვცდილობთ გრანტების მოპოვებას, რომ ჩანაფიქრი სისრულეში მოვიყვანოთ, _ გვითხრა შარაშიძემ.
ავტორი
