წელიწადზე მეტია რაც საქართველოს მოქალაქეები რომლებიც ფლობენ ბიომეტრულ პასპორტს, შენგენის ზონაში მოკლევადიანი ვიზიტით უვიზოდ ახერხებენ გამგზავრებას.
თუმცა, ევროპის ქვეყნებში დარჩენის მსურველი საკმაოდ ბევრია, რის გამოც, უვიზო რეჟიმის ამოქმედებიდან დღემდე სამშობლოში არაერთი ქართველი იძულებით დააბრუნეს.
რა შემთხვევაში შეიძლება შეუჩერდეს საქართველოს მოქალაქეებს ევროკავშირის წევრ ქვეყნებთან უვიზოდ მიმოსვლა, რა ხდება შენგენის ზონიდან მოქალაქეების სამშობლოში იძულებით დაბრუნების მიზეზი_ ამ საკითხებზე “გურია ნიუსს” ევროკავშირისა და ნატოს შესახებ საინფორმაციო ცენტრის დირექტორი, ნინო ბოლქვაძე ესაუბრა.
„საქართველოს მოქალაქეებს აქვთ საშუალება, რომ იმოგზაურონ ევროკავშირის ქვეყნებში უვიზოდ, მოკლე ვადიანი ვიზიტით. ეს ვიზიტი გულისხმობს 180 დღიდან 90 დღეს. ევროკავშირს, რა თქმა უნდა, შეჩერების მექანიზმის ამოქმედება შეუძლია, თუმცა, ეს საფრთხე საქართველოს დღესდღეობით არ ემუქრება. ევროკავშირის მიერ შეჩერების მექანიზმის ამოქმედების შესახებ საკითხი იმ შემთხვევაში დადგება, თუ საქართველოს მხრიდან იქნება მზარდი დარღვევების სტატისტიკა, არალეგალური თავშესაფრის თხოვნა და კრიმინალი მოიმატებს”,_ამბობს ბოლქვაძე.
მისი თქმით, ეკონომიკური მდგომარეობის გაუმჯობესების სურვილი მოქალაქეებს ხშირად უბიძგებს თავშესაფარი ევროპის ქვეყნებში ითხოვონ, რის გამოც, ევროკავშირში წუხილს გამოთქვამენ.
ის ასევე აღნიშნავს, რომ ქართველების მოთხოვნას, რომელიც უმეტეს შემთხვევაში სიცრუეზეა დამყარებული, არ აკმაყოფილებენ.
“რამდენიმე თვის წინ, სხვადასხვა ევროპულმა ქვეყნებმა გამოთქვეს წუხილი, რომ საქართველოდან იმატა მათ ქვეყნებში თავშესაფართა მაძიებელთა რიცხვმა. ეს არის შემაწუხებელი და საყურადღებო ევროპელებისთვის და რა თქმა უნდა ჩვენთვისაც. მიზეზი არსებობს სხვადასხვა. ადამიანები ეძებენ უკეთეს ეკონომიკურ პირობებს, მატერიალური მდგომარეობის გაუმჯობესებას ცდილობენ თავშესაფრის მიღებით ევროპის სხვადახვა ქვეყნებში. რა თქმა უნდა, ეს არ არის გამოსავალი მათი მატერიალური სიდუხჭირიდან, რომ გადავხედოთ სტატისტიკას, საქართველოდან თავშესაფრის მთხოვნელთა მხოლოდ 3%-მა მიიღო თავშესაფარი, 97%-ს კი უარს ეუბნებიან,”_ამბობს ბოლქვაძე.
ევროკავშირისა და ნატოს შესახებ საინფორმაციო ცენტრის დირექტორი “გურია ნიუსთან” საუბრისას, აღნიშნავს, რომ თავშესაფრის მიღება ადვილი იყო 90-იან წლებში, ახლა კი სხვა რეალობაა, რაც ევროკავშირშიც იციან.
“როცა ადამიანი თავშესაფარს ითხოვს, მოთხოვნას ასაბუთებს იმით, რომ თავის ქვეყანაში სხვადასხვა ნიშნით დევნიან და ხდება მისი უფლებების შელახვა. მაგალითად, შეიძლება დევნიდნენ, რომ აქვს განსხვავებული ეთნიკური წარმომავლობა, განსხვავებული რელიგია, სექსუალური ორიენტაცია. ჩვენმა ევროპელმა პარტნიორებმა კარგად იციან საქართველოს ვითარება. პრაქტიკულად ძალიან მარტივი არის ევროპელებისთვის იმის განსაზღვრა, რომ ეს ადამიანი ცრუობს. მნიშვნელოვანია, ვიცოდეთ და გვახსოვდეს რომ თავშესაფრის მიღება ადვილად ხდებოდა 90-იან წლებში, მაგრამ დღეს სხვა რეალობაა. საქართველო არის დემოკრატიული ქვეყანა, სადაც ადამიანის ძირითადი უფლებები არის დაცული. გვაქვს ყველანაირი საკანონმდებლო მექანიზმები იმისთვის, რომ უზრუნველყოფილი იყოს ადამიანის უფლებების დაცვა. ის არის განმაპირობებელი ფაქტორი, რის გამოც ევროპელები უარს ეუბნებიან“,_ამბობს ბოლქვაძე.
მისი თქმით, ადამიანები, რომლებიც ეკონომიკური მდგომარეობის გაუმჯობესების მიზნით თავშესაფარს ევროპის ქვეყნებში ითხოვენ და უარის მიღების შემთხვევაში, 90 დღიანი პერიოდის გასვლის შემდეგ შენგენის ზონის ტერიტორიაზე მაინც რჩებიან, თავს უფრო მეტ პრობლემებს უქმნიან, ვიდრე მდგომარეობას იუმჯობესებენ.
“ევროკავშირის მხრიდან არსებობს სანქციები. როცა ადამიანი დაარღვევს წესებს, ის ექვემდებარება იძულებით დაბრუნებას სამშობლოში. საქართველოს ხელისუფლება საკმაოდ კარგად თანამშრომლობს ევროპის ქვეყნების მთავრობებთან რედმისიას ეფექტურად გახორციელებისთვის. მოკლე დროში და ეფექტურად ხდება ამ ადამიანების დაბრუნება საქართველოში. გარდა ამისა, წესის დამრღვევებისთვის შესაძლებელია, რომ ევროკავშირის წევრმა ქვეყნებმა დააწესონ სანქციები 3 000 ევრომდე და ასევე 5 წლით აუკრძალონ ევროკავშირის ზონაში შესვლა. რეალურად ის ადამიანები, ვინც ეკონომიკური მდგომარეობის გაუმჯობესებისთვის ცდილობენ ევროპაში თავშესაფრის მიღებას, უფრო უარეს მდგომარეობაში იგდებენ თავს. არსებობს გამონაკლისი შემთხვევებიც, როცა 90 დღის გადაცილება საპატიო მიზეზად ითვლება. ეს ის შემთხვევაა, თუ ადამიანს გამგზავრებაში ჯანმრთელობა არ უწყობს ხელს, ან იყო აეროპორტში მისული და ფრენა გადაიდო“,_ამბობს ბოლქვაძე.
