ადმინისტრაციული ხარჯების ათი პროცენტით შემცირება საქართველოს პრემიერ-მინისტრმა გიორგი კვირიკაშვილმა გასული წლის ნოემბერში დაანონსა:
“ჩვენი სტრატეგიის მიხედვით, 2020 წლამდე ტურისტების რაოდენობამ 8 მილიონს უნდა მიაღწიოს, რაც გააორმაგებს ტურიზმიდან მიღებულ შემოსავლებს. ამ პროექტების გასახორციელებლად ჩვენ დონორებისგან მოვიზიდავთ 8 მილიარდ ლარზე მეტს, თუმცა, ამისთვის საჭიროა გარკვეული თანხის მობილიზება ჩვენს ბიუჯეტშიც. დამატებითი შემოსავლების მიღების მიზნით, დაგეგმილი რეფორმების გარდა, ვაპირებთ საბიუჯეტო ხარჯების შემცირებას. აქტიურად ვიმუშავეთ და ბიუჯეტის დაფინანსებაზე მყოფი ორგანიზაციების უმრავლესობაში 10%-ით შევამცირეთ შრომის ანაზღაურების ფონდი. ასევე, 10%-ით შევამცირეთ ადმინისტრაციული ხარჯები”, _ განაცხადა პრემიერ-მინისტრმა 2016 წლის 29 ნოემბერს გამართულ მთავრობის სხდომაზე.
ამ განცხადებას მთავრობის ადმინიტრაციის შესაბამისი გზავნილიც მოჰყვა ადგილობრივ თვითმმართველობებში და შემცირებებიც დაიწყო, რომელსაც პირველმა პირებმა ოპტიმიზაცია დაარქვეს.
ამ „ოპტიმიზაციის“ ფარგლებში კი ოზურგეთის და ლანჩხუთის მუნიციპალიტეტების ა(ა)იპ-ებში დასაქმებული რამდენიმე ადამიანი უმუშევარი დარჩა (შემცირებების პროცესი ქალაქ ოზურგეთში, ოზურგეთისა და ლანჩხუთის მუნიციპალიტეტებში ჯერ არ დასრულებულა). ჩოხატაურში პრემიერის მოთხოვნა განსხვავებული მეთოდით შეასრულეს _ არასამეწარმეო არაკომერციული იურიდიული პირების თანამშრომლების ხელფასები 10%-ით შეამცირეს.
_ არ ვიცით, ამას რა ვუწოდოთ. ისედაც მიზერული ხელფასები გქვონდა და ისიც შეგვიმცირეს. მათი ხელფასები და ხარჯები არ შემცირებულა. ჩვენზე გადატეხეს ჯოხი, _ აღნიშნავენ ა(ა)იპ-ებში.
ჩოხატაურის მუნიციპალიტეტის გამგებელი ირაკლი კუჭავა ამბობს, რომ შემცირება კანონის შესაბამისად მოხდა.
_ სახელმწიფო ბიუჯეტის შესახებ კანონის მარეგულირებელი ნორმების 23-ე მუხლის ზ) ქვეპუნქტის შესაბამისად: „დაევალოთ მუნიციპალიტეტებს, გაატარონ სათანადო ღონისძიებები, რათა 2017 წლის ბიუჯეტის დაფინანსებაზე მყოფ საბიუჯეტო ორგანიზაციებში (გარდა სკოლამდელი აღზრდის დაწესებულებებისა) ადმინისტრაციულ/საოპერაციო ხარჯები (ძირითადად, ხარჯების ეკონომიკური კლასიფიკაციის „შრომის ანაზღაურების“, „საქონელი და მომსახურების“ და „სუბსიდიების“ მუხლებში) შეადგენდეს არაუმეტეს მიმდინარე წლის (მოსალოდნელი) საკასო შესრულების მაჩვენებლის 90%-ს”.
ვიმოქმედეთ აღნიშნული ნორმების შესაბამისად, ყველა ა(ა)იპ-თან შეთანხმებითა და კონსულტაციით, _ გვითხრა კუჭავამ.
_ ბატონო ირაკლი, თუ შემცირება იყო საჭირო, რატომ არ შემცირდა გამგეობის და საკრებულოს თანამდებობის პირთა და მოხელეთა ხელფასები, მით უმეტეს, რომ თქვენი ხელფასები, მინიმუმ, ორჯერ აღემატება ა(ა)იპ-ებში დასაქმებულთა ხელფასებს?
_ შრომის ანაზღაურების მუხლში გამგეობასა და საკრებულოში ხელფასების შემცირებას ვერ გავახორციელებდით, რადგან თანამშრომლები კონკურსის წესითაა აყვანილი. სანაცვლოდ „საქონელი და მომსახურების“ კლასიფიკაციაში გავახორციელეთ ხარჯების უპრეცედენტო შემცირება.
თქვენმა მკითხველმა რომ სწორად გაიგოს, დავამატებ, ეს ნიშნავს მმართველობის ხარჯების შემცირებას და სანაცვლოდ ინფრასტრუქტურული პროექტების დაფინანსების გაზრდას. სწორედ ამაზე, არაერთგზის, მიუთითებდნენ არასამთავრობო ორგანიზაციები და მასმედიაც, _ გვითხრა კუჭავამ.
