„საქართველოს მთავრობას, ოზურგეთის მაჟორიტარ დეპუტატს, ქალაქ ოზურგეთის მერს, ბიზნესმენებს, ყველას, ვისაც შეუძლია დამეხმაროს, მოგმართავთ თხოვნით, იქნებ ცოტა ხნით გამიხანგრძლივოთ სიცოცხლე”, _ ეს სიტყვები 36 წლის ირაკლი (რუსლან) გოგოლაძეს ეკუთვნის.
ქალაქ ოზურგეთში ლესელიძის ქუჩაზე #73-ში მცხოვრები ირაკლი (რუსლან) გოგოლაძე, 3 წელია, რაც საწოლსაა მიჯაჭვული. მას ხერხემლის მალა დაუზიანდა და რეაბილიტაცია ჯერ კიდევ არ ჩაუტარებია.
” 3ლის წინ, სახლის მეორე სართულიდან გადმოვვარდი, ბათუმში ხერხემალზე გამიკეთეს ოპერაცია, იმის მერე სახლში ვწევარ, რეაბილიტაციის კურსი მჭირდება, წელს ქვევით გრძნობა არ მაქვს საერთოდ, მოწყვეტილი ვარ, დღითიდღე ვხვდები, რომ სულ უკან–უკან მივდივარ, ხარჯებთან არის დაკავშირებული რეაბილიტაციის კურსის ჩატარება.
4 წელი კონტრაქტით ვმსახურობდი ჯარში. აგვისტოს ომში, ცხინვალში ვიბრძოდი, იქ გაანაწილეს ჩვენი ქვედანაყოფი, ძლივს გადავრჩი მაშინ. ნუთუ არ მეკუთვნის არანაირი დახმარება? მერე თურქეთშიც დავდიოდი სამუშაოდ და ბოლოს ეს დამემართა, ეკონომიკურად ძალიან გვიჭირს, სითბო გვინდა გამუდმებით. როგორც კი შემცივდება, ფეხები მეყინება, შეშას ზამთარში ძლივს ვყიდულობთ, პენსია კი მაქვს, რომელიც შეშაში და წამლებში არ მყოფნის“, _ ამბობს ირაკლი გოგოლაძე.
ირაკლი გოგოლაძის ტრაგიკულ ყოველდღიურობას ისიც დაემატა, რომ მას სოციალური დახმარება.
“წარმოგიდგენიათ, სოციალური დახმარება მომიხსნეს, დენის გადასახადი მოგივიდა 40 ლარიო. აბა, რა ვქნა, მითხარით, როცა გათბობა მჭირდება?! ეს რა ქვეყანაა? მოვიდნენ ხელმეორედ გადამოწმებაზე, რის შემდეგაც დიდი სარეიტინგო ქულა მოვიდა და მომიხსნეს. სად და როგორ ვცხოვრობთ, ამას თქვენც ხედავთ“, _ ამბობს გოგოლაძე.
მისივე თქმით, მან დახმარებისთვის მიმართა ქალაქ ოზურგეთის მერიას, გამოეყოთ მისი რეაბილიტაციისთვის თანხა, რაზედაც უარი მიიღო:
“კი დამეხმარნენ ერთჯერადი დახმარებებით, მაგრამ რეაბილიტაციაზე უარი მივიღე, ბიუჯეტს სამაგისოდ საკმარისი თანხა არ გააჩნიაო. გუბერნატორსაც ვთხოვე დახმარება, მაგრამ არავინ შემომხმიანებია“, _ ამბობს გოგოლაძე.
ქალაქ ოზურგეთის მუნიციპალიტეტის მერიაში აღნიშნავენ, რომ რუსლან გოგოლაძეს ფინანსური დახმარება მერიამ არაერთხელ გაუწია:
“2015 წელს აღნიშნულ მოქალაქეს სარეზერვო ფონდიდან 500 ლარი გადაეცა. ამავე წელს ხსენებული მოქალაქის დედამ იამზე გოგოლაძემ ერთ-ერთი პროგრამული დახმარებიდან 200 ლარი მიიღო.
2016 წელს რუსლან გოგოლაძეს სოციალური პროგრამებით გათვალისწინებული ფინანსური დახმარებები გაეწია. კერძოდ, შეჭირვებულ მოქალაქეთა სამედიცინო დახმარების პროგრამიდან -150 ლარი და შშმ პირთა ერთჯერადი დახმარების პროგრამიდან – 200 ლარი, ასევე სარეზერვო ფონდიდან – 500 ლარი. გარდა აღნიშნული პროგრამული დახმარებებისა, რუსლან გოგოლაძეს ქალაქის მერმა ბეგლარ სიორიძემ ეტლი გადასცა და ასევე ფინანსური დახმარება პირადად გაუწია.
2017 წელს გოგოლაძეს ქალაქ ოზურგეთის მუნიციპალიტეტის მერიისათვის განცხადებით არ მოუმართავს, მომართვის შემთხვევაში, მას შესაბამისი პროგრამული დახმარება აუცილებლად გაეწევა“, _ აღნიშნავენ მერიაში.
“გურია ნიუსმა“ კომენტარისთვის მიმართა სოციალური მომსახურების ცენტრს.
“რუსლან გოგოლაძის ოჯახი სოციალური მომსახურების სააგენტოს მიერ რამდენჯერმეა შესწავლილი. გოგოლაძე პერიოდულად იყო საარსებო შემწეობის მიმღები, პერიოდულად კი მაღალ სარეიტინგო ქულას იღებდა. მისი ოჯახი საარსებო შემწეობის მიმღები იყო 2007- 2008 წლებში და ასევე, 2014 წელს. 2015 წლის ივნისიდან ოჯახს ისევ მაღალი სარეიტინგო ქულა უფიქსირდება. ამასთან ერთად უნდა აღინიშნოს, რომ სახელმწიფო სხვადასხვა პროგრამით ეხმარება შშმ პირს. რუსლან გოგოლაძეს ვეტერანთა დეპარტამენტმა 12 000 ლარის ღირებულების სარეაბილიტაციო კურსი დაუფინანსა, შარშან სოციალური მომსახურების სააგენტომ მას ასევე გადასცა შშმპ-თა ეტლი. ასევე მას, როგორც ვეტერანს საყოველთაო ჯანმრთელობის დაცვის პროგრამით ყველა მომსახურება უფინანსდება 100%-ით”.
