ახლახან ოზურგეთში დასრულდა მასწავლებელთა კომპეტენციის დამადასტურებელი გამოცდები, როგორც საგნობრივ, ისე უნარ-ჩვევებში. აღნიშნულ გამოცდებს საკმაოდ ბევრმა სამრევლო სკოლის პედაგოგმა მიაშურა, რომელთა დიდი ნაწილი ამ ტიპის სკოლებიდან უკვე აქტიურად გაედინება და ცდილობენ, სახელმწიფო საჯარო სკოლებში იმუშაონ.
_ მიზეზი ამისა არის ის, რომ განათლების სამინისტრო სამრევლო სკოლებს საგანმანათლებლო სივრცეში ნაკლებად რთავს. ამასთანავე, გადასახედია ხელფასთან დამოკიდებულებაც. ამ მიზეზის გამო, უკვე, სამრევლო სკოლებში მომუშავეებს გული უცრუვდებათ და ამიტომ სურთ, ჩააბარონ გამოცდები და საჯარო სკოლებში დაიწყონ მუშაობა, _ გვეუბნება ერთ-ერთი სამრევლო სკოლის მასწავლებელი.
გარდა ამისა, მასწავლებლები სვამენ კითხვებს, სახელფასო დანამატის შესახებ, თუ რაოდენ უპირატესობით სარგებლობენ ის მასწავლებლები, რომლებმაც მოახერხეს და ორ ან სამ სკოლაში დაიწყეს მუშაობა. მათ ყველგან, ხელფასი გაეზრდებათ დანამატით, რომელიც მინიჭებული კატეგორიისთვის არსებობს: არის ეს სამართლიანი მიდგომა? _ აინტერესებთ მათ.
როგორც ცნობილია, მომავალი წლიდან, დიდი ალბათობით, ბევრი არაპენსიონერი და შესაძლოა, კარგი პედაგოგიც სკოლას დატოვებს იმის ამო, რომ გამოცდებზე საჭირო შეფასება ვერ მიიღო. პენსიონერი სახელფასო ჯილდოს მაინც მიიღებს. სწორედ ასეთი პედაგოგები გამოთქვამენ საყვედურს და ამბობენ, რომ სახელმწიფომ ცუდად დაგეგმა ეს ყველაფერი და ბევრს საერთოდ უმუშევარს და ყოველგვარი ჯილდოს გარეშე ტოვებს, ანუ აგდებს სკოლიდან. ბევრი კი, ერთდროულად რამდენიმე სკოლაში იმუშავებს და ყველგან დანამატს აიღებს.
_ ეს არის დისკრიმინაციული მიდგომა, _ ამბობს ჩვენთან არაერთი პედაგოგი.
ვრცლად ამ თემაზე სტატიას „გურია ნიუსი“ მალე შესთავაზებს მკითხველს.
