_ ივნისსა და ივლისში, როცა აგრარულ კულტურებს სრული სავეგეტაციო პერიოდი უდგათ და შედარებით ბევრ შრომას არ საჭიროებს, აქტიურდებიან მავნებლები. მათი სხვადასხვა სახეობიდან გამომდინარე, ბრძოლის ღონისძიებებიც ზოგჯერ განსხვავებულია.
სხვადასხვა ბოსტნეულ მცენარეზე (კიტრი, პომიდორი, ბადრიჯანი, წიწაკა) ხშირად ჩანს სხვადასხვა ბუგრები. ისინი ძირითადად ფოთლებს აზიანებენ, რის შემდეგაც ღერო ხმობას იწყებს. ამ ბუგრების წინააღმდეგ გამოვიყენოთ კარბოფოსის 0, 2 %-იანი ხსნარი. შევასხუროთ მშრალ ამინდში, ნაშუადღევს.
ბოსტანში ამ დროს ხშირად არის მავთულა ჭია, რომელიც ერთნაირად აზიანებს ნებისმიერი ბოსტნეულის აღმონაცენს. ყველაზე მეტად პომიდორს ემტერება _ ღეროში მიძვრება და სირბილეს მთლიანად გამოჭამს, რასაც ხმობა მოჰყვება. მავთულას წინააღმდეგ გამოვიყენოთ ზემოთ აღნიშნული ხსნარი, ოღონდ სამი გრამი ექვს ლიტრ წყალში და პომიდორს ძირებთან დავუსხათ.
_ ახლა, როცა ახალი კარტოფილია შემოსული, ზოგჯერ ხდება ისე, რომ ზედმეტს გაფცქვნით და აღარ გჭირდებათ. უცებ რომ არ გაფუჭდეს (რაც ახასიათებს ახალ კარტოფილს), დაფარეთ წყლით, დაუმატეთ ცოტა ძმარი და ასე შედგით მაცივარში. სულ ცოტა, სამი დღე არ გაფუჭდება და ჩვეულებრივად შეწვავთ ან მოხარშავთ.
_ ზაფხულში ხშირად ხდება ისე, რომ მწერის ნაკბენი კანს აღიზიანებს ან ალერგიულ ქავილს იწვევს. დაიყარეთ კანზე ბრინჯის ფქვილი, რაც უებარი საშუალებაა.
_ ეცადეთ, მთელი ზაფხულის განმავლობაში კიტრი მიირთვათ ხილის მსგავსად, წიწაკის და ძმრის გარეშე. იგი ასე გაცილებით უკეთ კლავს წყურვილს, წმენდს ორგანიზმს, კანს აშორებს ფერისმჭამელებს.
_ ზაფხულში ერიდეთ მაგარ ღვინოებს _ სასურველია, ისინი სრულად ამოიღოთ რაციონიდან და მიირთვათ ტკბილი ღვინოები ხილის არომატით.
_ ზაფხულის დღეებში უხვად მიირთვით ალუბალი. ძალიან შველის დაღლილობით გამოწვეულ თავის ტკივილს. ალუბლის სამკურნალო თვისების საიდუმლო წითელ ნივთიერებაშია, რომლითაც ნაყოფია შეფერილი.
_ სიცხეში ჩაის დალევა, ყველამ იცის, რომ წყურვილს კლავს, თუმცა ხალხური მედიცინა ამბობს, რომ სიცხეში დალეული ჩაი უფრო ეფექტურია სიმსივნური დაავადებების წინააღმდეგ.
კარგი ხარისხის ჩაის კიდევ უფრო გამოხატული არომატი ექნება, თუ მდუღარის დასხმამდე, ცოტა შაქარს დავაყრით. ჩაის ძველი ნაყენი საუკეთესოა ოთახის ყვავილებისთვის, აჩქარებს ზრდას. ამიტომ როცა გამოცვლით, არასდროს გადაასხათ, გამოიყენეთ ყვავილებისთვის. არა მარტო სითხე, დაქუცმაცებული მასაც მიაყოლეთ და ჩაუშვით ქოთანში.
ჩაის ძველი ნაყენი ასევე მაშინვე აქრობს ხახვის, ნივრის, თევზის უსიამოვნო სუნს საოჯახო ჭურჭელზე.
