არჩევნების დასრულების შემდეგ, ოზურგეთის მე-60 ოლქის, ჭანიეთის 53-ე უბანზე, გაირკვა, რომ 49 ბიულეტენი მეტად საეჭვო ნიშნით გამოცხადდა ბათილად. კერძოდ, ბიულეტენების უმეტესობას, დასმული არ ჰქონდა რეგისტრატორის ბეჭედი ან პირიქით, ჰქონდა ბეჭედი და არ ჰქონდა რეგისტრატორის ხელმოწერა.
რა იყო ეს, რეგისტრატორთა რევანში, რომლებიც ადგილობრივი მცხოვრებლები არიან და კარგად იცნობენ თუ ვინ ვის აძლევს ხმას თუ „უბრალო შეცდომა“? აუცილებელია, დაზუსტდეს, ვინ როგორ მოქმედებს მეტად საპასუხისმგებლო მოვალეობის შესრულებისას, რომ მომდევნო არჩევნებზე საოლქო კომისიამ კარგად გაითვალისწინოს, ვის ანდობს ამომრჩევლის ბედს.
ამ უბანზე, სადაც 810 ამომრჩეველია, 599 ამომრჩეველი გამოცხადდა არჩევნებზე. დამაჯერებელი გამარჯვება მოიპოვა პარტია „ქართულმა ოცნებამ“ და პარტიის მაჟორიტარმა კანდიდატმა ვასილ ჩიგოგიძემ, თუმცა, ხმების დათვლის შემდეგ, ბათილად ცნობილი 49 ბილეტენის ირგვლივ, იქვე გაჩნდა დიდი ეჭვი, რომ განზრახ ქმედებას ჰქონდა ადგილი _ ბიულეტენების უმეტესობას არ ჰქონდა დასმული რეგისტრატორის ბეჭედი ან პირიქით, ბეჭედი დასმული იყო, მაგრამ არ ჰქონდა ხელმოწერა. ამ გაბათილებული ბიულეტენების უმეტესობა პარტია „ქართული ოცნების“ მხარდამჭერების იყო.
პარტია „ქართული ოცნების“ წარმომადგენელმა, თეა კვირკველიამ, ადგილზე, ხმების დათვლის პროცესში, როცა ამგვარი ხელმოუწერელი ან უბეჭდო ბიულეტენების სიმრავლე შენიშნა, რომლებიც, ცხადია, ბათილად ითვლებოდა, გამოიძახა საოლქო კომისიის წარმომადგენელი, ნინო ნიკოლაიშვილი და საჩივარიც დაწერა საუბნო კომისიის სახელზე.
_როცა ადგილზე მივედი, დათვლის პროცესი მიმდინარეობდა. 49 ბათილი ბიულეტენიდან, უმეტესობაზე არ იყო დასმული რეგისტრატორის ბეჭედი ან პირიქით, დასმული იყო ბეჭედი და არ ჰქონა ხელმოწერა, რაც დიდ ეჭვს ნამდვილად იწვევს. 18 ბიულეტენი, რომელზეც ბეჭედი არ იყო, „ქართული ოცნების“ ამომრჩევლის გახლდათ. ბუნებრივია, გაჩნდა კითხვა, რა მოხდა. ვთქვათ, რეგისტრატორს დაავიწყდა ერთ, ორ ან სამ ბიულეტენზე ბეჭდის დასმა ან ხელმოწერა, მაგრამ ამდენზე!? თან უმეტესობა ერთი პარტიის ამომრჩევლის ბიულეტენები და არ იყო არც ერთი მათ შორის, ასე ვთქვათ, პატარა პარტიების ამომრჩეველთა ბიულეტენი. გაირკვა, რომ რეგისტრატორები, რომლებიც შესვენებაზე გავიდნენ, ჩაანაცვლეს სხვა რეგისტრატორებმა. ახლა ვეღარ მოხერხდება იმის დადგენა, რომელმა რეგისტრატორმა ჩაიდინა უპასუხისმგებლო ქმედება; გაჭირდება დადგენა, ეს მიზანმიმართული ქმედება იყო თუ გადაიღალნენ და გამორჩათ მხედველობიდან, რაც მიუტევებელია. ეჭვს იწვევს ის, რომ უმეტესად, „ქართული ოცნების“ ამომრჩევლის ბიულეტენები იყო გაბათილებული, _ ამბობს ნინო ნიკოლაიშვილი.
ამ უბანზე, ამ რაოდენობის ბათილი ბიულეტენები არ ახსოვთ. ჩვენ მიერ გმოკითხული რამდენიმე ამომრჩევლიდან, ვერც ერთი ვერ იხსენებს პროცედურის გავლისას, ჰქონდა თუ არა ბეჭედი და ხელმოწერა დასმული მათ ბიულეტენს.
„ქართული ოცნების“ წარმომადგენელი ჭანიეთის უბანზე თეა კვირკველია ამბობს, რომ მან საჩივარი უბანზე, საუბნო კომისიის და არა ოზურგეთის საოლქო კომისიის სახელზე დაწერა.
ოზურგეთის საარჩევნო ოლქის თავმჯდომარე ბერდია ლომიძე „გურია ნიუსთან“ ამბობს, რომ საოლქო კომისიაში ასეთი საჩივარი არ შემოსულა: _ ბათილად ცნობილი ხმების თაობაზე ვიცი, თუმცა ეს კონკრეტული ამბავი არ ვიცი, რადგან აქ საჩივარი ნამდვილად არ შემოსულა, _ თქვა ლომიძემ.
