თხილის წარმოების ხელშეწყობის პროგრამის შესახებ სოფლის განვითარების სააგენტოს დირექტორის მოადგილემ ნატალია ხარატიშვილმა გადაცემა “მაესტრო რეგიონებში” ისაუბრა.
ხარატიშვილმა აღნიშნა, რომ წელს უამინდობისა და ფაროსანას გამო თხილის მოსავალი საგრძნობლად შემცირდა. განსაკუთრებით დასავლეთ საქართველოში დაზარალდნენ ის მეთხილეები, ვისაც 3 ჰა-მდე ფართობზე აქვს თხილი გაშენებული.
“მათ მოსავალი უნდა ჰქონოდათ 1 ჰექტრიდან საშუალოდ ტონა ნახევარი, მაგრამ შეუმცირდათ 600- 800 კილომდე. ეს არის მნიშვნელოვანი შემცირება. ფაქტორი იყო როგორც ამინდი, ასევე ფაროსანა. ჩვენ კი ვატარებთ შეწამვლით ღონისძიებებს, მაგრამ ფერმერმაც უნდა შეძლოს და შეწამლოს ნაკვეთი. სხვა პროდუქტებიც მნიშვნელოვნად გაძვირდა, ამიტომ ბევრმა ფერმერმა ვერ შეძლო მოვლა-მოყვანისთვის საჭირო საქონლის შეძენა. ამიტომ ვთავაზობთ ჩვენ ამ დახმარებას”,_ განაცხადა ხარატაშვილმა.
მან ასევე აღნიშნა, რომ ეს თანხა განკუთვნილია საგაზაფხულო და ზაფხულზე შესასრულებელი სამუშაოებისთვის.
“ჯერ უნდა შევქმნათ კადასტრის მონაცემები. იდენტიფიცირება უნდა მოვახდინოთ იმ ნაკვეთების რომელი ფერმერი, რომელ ნაკვეთს ფლობს და ამის შესაბამისად მივცეთ საშუალება, რომ გაზაფხულზე ჩასატარებელი სამუშაოები შეასრულოს. აღნიშნული ბარათების განაღდების ვადა იქნება 31 აგვისტო”,_ განაცხადა ხარატიშვილმა.
მისივე თქმით, რეგისტრაციის გრაფიკი წინასწარ იქნება შედგენილი.
“წინასწარ იქნება გათვლილი, გაწერილი გრაფიკი, თუ რომელ სოფელს შეუძლია მიმართონ. სამუშაო ჯგუფი იქნება შექმნილი, სადაც მივა ფერმერი, გააკეთებს განაცხადს, იქ მოხდება თხილის ბაღის იდენტიფიცირება, ამის შემდეგ მონაცემებს მივაწოდებთ “ლიბერთი ბანკს” და მათ ბარათებზე დაერიცხებათ ქულები. ქულების განაღდებას შეძლებენ მხოლოდ სურსათის ეროვნული სააგენტოს მიერ ვისაც აქვს მინიჭებული აღიარება იმ მაღაზიებში, იმიტომ რომ კონკრეტულად ბაღის მოვლისთვის, მოყვანისთვის საჭირო პრეპარატები შეიძინონ.
შეკითხვაზე, ხომ არ არის წინასწარ ცნობილი, რამდენმა მეთხილემ შეიძლება მოგმართოთ?- ხარატიშვილი პასუხობს, რომ პროგრამა დააახლოებით 100 000 ფერმერზეა გათვლილი.
_ რა თქმა უნდა. დაახლოებით გათვლილი გვაქვს, რომ 40 000 ჰექტრამდე დასჭირდებათ დაფინანსება და ეს სადღაც 100 000 ფერმერამდე იქნება.
