სოციალური მომსახურების სააგენტო სამუშაოს მაძიებელთა პროფესიული მომზადება-გადამზადებისა და კვალიფიკაციის ამაღლების სახელმწიფო პროგრამის განხორციელების ახალ ეტაპს იწყებს.
სამუშაოს მაძიებელთა პროგრამაში ჩართვის მსურველთა რეგისტრაცია დღეს დაიწყო და 4 მაისის ჩათვლით გაგრძელდება.
რეგისტრაციის გავლა შესაძლებელია საქართველოს მასშტაბით სოციალური მომსახურების სააგენტოს სერვის-ცენტრებში.
დარეგისტრირებულ პირებს შესაძლებლობა ექნებათ სახელმწიფოს დაფინანსებით შრომის ბაზარზე არსებულ მოთხოვნად 51 პროფესიას დაეუფლონ ან გადამზადდნენ.
პროგრამა ითვალისწინებს, შრომის ბაზარზე მოთხოვნად პროფესიებში სამუშაოს მაძიებელთა პროფესიულ მომზადება-გადამზადებას და სტაჟირებას მათი კონკურენტუნარიანობის ამაღლების და შემდგომში დასაქმების ხელშეწყობის მიზნით.
მოკლევადიანი მომზადება-გადამზადების პროგრამები შემუშავდა წინასწარ ჩატარებული შრომის ბაზრის თვისობრივი კვლევის საფუძველზე, რომელმაც 51 მოთხოვნადი პროფესია გამოავლინა. პროფესიების მოკლე ჩამონათვალი ასე გამოიყურება: ბაგა-ბაღის აღმზრდელი, ექთნის თანაშემწე, ვებ-პროგრამისტი, მოლარე, სარეკლამო აგენტი, სტილისტი, მდივან-რეფერენდი, შემდუღებელი, ბუღალტერი. პროფესიების ჩამონათვალი უფრო ვრცლად აღნიშნულ ლინკზეა მითითებულიhttp://ssa.gov.ge/files/01_GEO/Dasaqmeba/Samush-Madziebl/18.04.2018.pdf.
როგორც „გურია ნიუსს“ სოციალური მომსახურების სააგენტოში განუცხადეს, მოკლევადიანი მომზადება-გადამზადების კურსების ხანგრძლივობა 2-დან 4 თვემდე მერყეობს, პროფესიების მოდულის შესაბამისად (სწავლის საფასურის დასაფარად მსურველზე გაიცემა ერთი ვაუჩერი, რომლის მაქსიმალური ღირებულება შეზღუდული შესაძლებლობების და სპეციალური საგანმანათლებლო საჭიროებების მქონე მოქალაქეებისთვის შეადგენს 1500 ლარს (ამ თანხიდან 500 ლარი ხმარდება მათ ტრანსპორტირებას, სპეციალურ პედაგოგს და იმ საჭიროებებს, რომლის საშუალებითაც შეძლებენ განათლების მიღებას), ხოლო ნებისმიერ სხვა პირზე – 1000 ლარს.
პროფესიულ კურსებს საქართველოს განათლებისა და მეცნიერების სამინისტროს მიერ შერჩეული 44 (27 კერძო და 17 სახელმწიფო) აკრედიტირებული პროფესიული საგანმანათლებლო დაწესებულება ჩაატარებს, რომლებიც პროფესიულ საგანმანათლებლო პროგრამებს ახორციელებენ. სასწავლებლები აღჭურვილია განახლებული ინფრასტრუქტურითა და თანამედროვე მატერიალურ-ტექნიკური ბაზით, დაკომპლექტებულია კვალიფიციური და გადამზადებული პედაგოგებით, რაც პროგრამაში ჩართულ სამუშაოს მაძიებელს მისცემს საშუალებას ჩამოყალიბდნენ კონკრეტული დარგის პროფესიონალებად, კონკურენტუნარიანდ შრომის ღია ბაზარზე და დასაქმდნენ შესაბამისი კვალიფიკაციის მიხედვით.
პროფესიული საგანმანათლებლო დაწესებულებები წარმოდგენილნი არიან თბილისსა და საქართველოს 17 მუნიციპალიტეტში: მცხეთაში, თელავში, საგარეჯოში, გურჯაანში, მარნეულში, გორში, ახალციხეში, ქუთაისში, ზესტაფონში, წალენჯიხაში, ფოთში, ოზურგეთში, მესტიაში, ზუგდიდში, რუსთავში, ქობულეთსა და ბათუმში.
გარდა მოკლევადიანი კურსების, სოციალური მომსახურების სააგენტო დაინტერესებულ პირებს კერძო დაწესებულებებში სტაჟირების გავლაში დაეხმარება. იმ შემთხვევაში, თუ სტაჟირების გავლის მსურველი დააკმაყოფილებს კერძო ორგანიზაციის მოთხოვნებს, ვაკანტურ ადგილზე სტაჟირების გასავლელად სახელმწიფო სტაჟიორს ყოველ თვე, მაქსიმუმ 3 თვის განმავლობაში, სტიპენდიის სახით – 200 ლარს გადაუხდის (სტიპენდია არ იბეგრება). პროფესიული მომზადება-გადამზადების პროგრამის ერთ-ერთი კომპონენტია სამუშაო ადგილებზე სწავლება – სტაჟირება, რომელიც უკვე წარმატებით ხორციელდება ქვეყნის მასშტაბით. ამავდროულად, დაწყებულია სუბსიდირების პროგრამა დასაქმების ხელშეწყობის მიზნით. გასული წლების შედეგებით გამოიკვეთა პროგრამების ეფექტურობა არსებული დასაქმების სტატისტიკის შესაბამისად.
პროგრამაში ჩართვა შეუძლიათ საქართველოს მოქალაქეებს 16 წლის ზემოთ, რომლებიც რეგისტრირებული არიან შრომის ბაზრის მართვის საინფორმაციო სისტემა – www.worknet.gov.ge-ზე და თანახმა არიან გაიარონ მომზადება-გადამზადების მოკლევადიანი სასწავლო კურსი. პროგრამით სარგებლობისთვის აუცილებელია სამუშაოს მაძიებლის მიერ ზოგადი განათლების საბაზისო საფეხურის დაძლევის დამადასტურებელი დოკუმენტის ქონა (მინიმუმ 9 კლასის განათლების დოკუმენტი) და პირადობის დამადასტურებელი მოწმობა. მოწყვლადი ჯგუფის წარმომადგენლებმა კი საჭიროა წარმოადგინონ თავიანთი სტატუსის დამამტკიცებელი დოკუმენტი და პირადობის დამადასტურებელი მოწმობა.
პროგრამით სარგებლობის უპირატესი უფლება ენიჭებათ: შშმ პირებს; სსსმ პირებს; იძულებით გადაადგილებულ პირებს; სოციალურად დაუცველებს; დაბრუნებულ მიგრანტებს; ყოფილ პატიმრებს; პრობაციონერებს; სახელმწიფო ზრუნვის ქვეშ მყოფ 16-18 წლის ახალგაზრდებს, ასევე სახელმწიფო მზრუნველობიდან გასულ პირებს; 16 წლის ასაკიდან გოგონებს, რომლებიც ნაადრევ ქორწინებაში იმყოფებიან, ოჯახში ძალადობისა და ტრეფიკინგის მსხვერპლ ადამიანებს.
სოციალური მომსახურების სააგენტოში განმარტავენ, რომ ამით სახელმწიფო დაბალკონკურენტუნარიანი ჯგუფების წარმომადგენლებს უქმნის დამატებით საშუალებას, მოკლე დროში მიიღონ შრომის ბაზრის მოთხოვნების შესაფერისი უნარ-ჩვევები ამა თუ იმ პროფესიაში იმისათვის, უზრუნველყოთ მათი კვალიფიციური დასაქმების შესაძლებლობები.
პროგრამაში ჩასართავად სამუშაოს მაძიებელთა რეგისტრაცია 30 აპრილიდან 4 მაისის ჩათვლით განხორციელდება. მოკლევადიანი კურსების პირველი ეტაპი 7 მაისს დაიწყება. მომზადება-გადამზადების პროგრამებში ჩართვის მსურველებმა უნდა მიაკითხონ სოციალური მომსახურების სააგენტოს ფილიალებს საცხოვრებელი ადგილის მიხედვით, სადაც შეარჩევენ სასურველ პროფესიას და დარეგისტრირდებიან შრომის ბაზრის მართვის საინფორმაციო სისტემაში worknet.gov.ge-ზე პროგრამაში ჩართვის მსურველად. პროგრამის შესახებ დამატებითი ინფორმაციის მისაღებად დაინტერესებულმა პირებმა უნდა დარეკონ საქართველოს შრომის, ჯანმრთელობისა და სოციალური დაცვის სამინისტროს ცხელი ხაზის ნომერზე: 1505, ან ესტუმრონ სოციალური მომსახურების სააგენტოს ვებ-გვერდს www.ssa.gov.ge.
როგორც ცნობილია, გასულ კვირას, სოციალური მომსახურების სააგენტოს დასაქმების პროგრამების დეპარტამენტში მოეწყო შეკრება ყველა რეესტრში ჩართულ პროფესიული საგანმანათლებლო დაწესებულებათა ხელმძღვანელებთან, სადაც მათ გაეცნოთ დამატებით მათი ვალდებულებები პროგრამის ხარისხიანად განხორციელების მიზნით და ასევე, მათი მხრიდან გამოითქვა მზადყოფნა მაქსიმალურად ეფექტურად სახელმწიფო პროგრამის განხორციელებისა.
