როგორ აფასებენ პრეზიდენტის იმპიჩმენტის საკითხს გურიაში

მმართველი გუნდი საქართველოს პრეზიდენტის იმპიჩმენტს ითხოვს. მთავრობა სალომე ზურაბიშვილს კანონმდებლობის დარღვევაში ადანაშაულებს.

“გურია ნიუსმა” სცადა გაერკვია, როგორ აფასებენ გურიაში პოლიტიკოსები პრეზიდენტის შესაძლო იმპიჩმენტს და რას ფიქრობენ ისინი,  როგორ შეიძლება აისახოს ეს ქვეყნის პოლიტიკურ ინტერესებზე.

“ქართულო ოცნების” მხრიდან ეს არის ქართველი ხალხის კიდევ ერთი დაცინვა”, _ ამის შესახებ ჩვენთან საუბრისას ფრაქცია “ერთიანი ნაციონალური მოძრაობის” თავმჯდომარემ ჩოხატაურის საკრებულოში დიმიტრი კორიფაძემ განაცხადა.

“ქართული ოცნების” მხრიდან ეს არის კიდევ ერთი ნაბიჯი, რომ არ მივიღოთ ის, რისთვისაც იბრძვის ქართველი ხალხი ამდენი ხანია და რომ ევროკავშირში შესასვლელი გზა კიდევ ერთხელ რამენაირად გადაგვიკეტონ. სასაცილოც აღარაა ეს ყველაფერი. პრეზიდენტს აუკრძალეს ევროპაში წასვლა და კოლეგებთან შეხვედრა”, _ თქვა კორიფაძემ.

ჩოხატაურის საკრებულოს წევრი სოციალურ, განათლების, კულტურისა და სპორტის საკითხთა კომისიის თავმჯდომარე ზვიად მამალაძე მიიჩნევს, რომ პრეზიდენტის მიერ კონსტიტუციის დარღვევა არანაირ ჩარჩოში არ ჯდება და რეაგირება უნდა მოჰყვეს. თუმცა, ამბობს, რომ იმპიჩმენტისთვის მხოლოდ საპარლამენტო უმრავლესობის ხმები საკმარისი არაა და საკითხს მხარი ოპოზიციურმა პარტიებმაც უნდა დაუჭირონ:

“ვფიქრობ, რომ საქართველოს კონსტიტუციის დარღვევა ნებისმიერი ადამიანის მიერ, მით უმეტეს, ისეთი პირის მიერ, როგორიც პრეზიდენტია, არ ჯდება არც ერთ ჩარჩოში. ამას რაღაც რეაგირება უნდა მოჰყვეს. იმისთვის, რომ მოხდეს პრეზიდენტის იმპიჩმენტი, საჭიროა ოპოზიციის ხმებიც. მაგრამ მმართველი გუნდი, ხელისუფლება გააკეთებს ამაზე რეაგირებას.

რამდენადაც პრეზიდენტი დიდი ხანია, მთავრობისგან დამოუკიდებელ ნაბიჯებს დგამს, ეს პროცესი კარგად აჩვენებს, ის ქვეყნის და ხელისუფლების ინტერესებიდან გამომდინარე მოქმედებს თუ რომელიმე ვიწრო ოპოზიციური პარტიის ინტერესებით”, _ გვითხრა ზვიად მამალაძემ.

მსგავსი მოსაზრება აქვს ჩოხატაურის საკრებულოს დეპუტატ მაია გიორგაძესაც: “საქართველოს კონსტიტუციის დარღვევის უფლება არ აქვს თვით პრეზიდენტსაც კი და აქედან გამომდინარე, ვინც დაარღვევს, მის ქმედებას შესაბამისი რეაგირებაც უნდა მოჰყვეს”.

ფრაქცია “ნაციონალური მოძრაობის” თავმჯდომარე ლანჩხუთში კახა ასკურავა ამბობს, რომ “ოცნებამ” ქვეყანა შაპიტოს ცირკს დაამსგავსა და ის, რაც პრეზიდენტთან მიმართებაში ხდება, საქართველოს ევროპული ინტერესების დაზიანებას ემსახურება”:

“ნაციონალური მოძრაობის” დამოკიდებულება სალომე ზურაბიშვილთან მიმართებაში საზოგადოებისთვის ცნობილია. რა აზრიც იყო 2018 წელს, იგივე აზრი გვაქვს პარტიაში დღესაც, თუმცა, “ქართული ოცნების” მხრიდან პრეზიდენტის ინსტიტუტთან ბრძოლა პირად ანგარიშსწორებას დამსგავსება, პირველ რიგში, ქართულ სახელმწიფოს, ჩვენს ევროპულ ინტერესებს აზიანებს. იმ ფონზე, როცა სალომე ზურაბიშვილი ევროპელ ლიდერებს ესაუბრება _ გერმანიის კანცლერს, ევროპული საბჭოს პრეზიდენტს მიშელს და ამ დროს სახლში, თბილისში, იმპიჩმენტის პროცედურას იწყებენ, ეს არის პირდაპირ მიზანმიმართული პოლიტიკა. მათ იციან, რომ 100 ხმას ვერ მოაგროვებენ და პრეზიდენტს იმპიჩმენტს ვერ მოუწყობენ, მაგრამ ამით აზიანებენ სახელმწიფოს ინტერესებს, რომ ვერ მივიღოთ ჯერ, პირველ რიგში, კანდიდატი წევრის სტატუსი და შემდეგ ვერ გავხდეთ ევროკავშირის წევრი. რაც ხდება სალომე ზურაბიშვილთან მიმართებაში აქვს მხოლოდ ის მიზანი, რომ მაქსიმალურად დაგვაშორონ ჩვენს ისტორიულ ადგილს, რომელიც არის ევროპაში და ევროკავშირში.

შაპიტოს ცირკი იყო ჩემს ბავშვობაში და ეს ქვეყანა “ქართულ ოცნებას” გადაქცეული აქვს შაპიტოს ცირკად. თვითონ არიან ბედნიერად, კარგს ჭამენ, სვამენ და ხალხი კი გაუბედურებულია. გურიაში წელს ისეთი დაბალი ფასი აქვს თხილს, როგორც ისტორიაში არ ჰქონია. თვითონ ქართული ოცნების მომხრეც კი ალბათ დაფიქრებულია თუ რამხელა დანაშაული ჩაიდინა მათი არჩევით”, _ გვითხრა ასკურავამ.

“ლელოს” ლანჩხუთის ორგანიზაციის ხელმძღვანელის, გოჩა ჯანაშიას თქმით კი ეს გადაწყვეტილება კიდევ უფრო აკნინებს ისედაც დაკნინებულ პრეზიდენტის ინსტიტუტს და საქართველოს ევროკავშირში გაწევრიანების პერსპექტივებზე უარყოფითად აისახება:

“პრეზიდენტის ინსტიტუტი ძალიან დაკნინებულია. სამომავლოდ, პრეზიდენტი პირდაპირი არჩევნებით აღარ ირჩევა და სანამ ეს მოხდება, მანამდე კიდევ უფრო დაკნინება ამ ინსტიტუტის სამარცხვინოა. მით უმეტეს, რომ პრეზიდენტად სალომე ზურაბიშვილის კანდიდატურა თავის დროზე “ქართულმა ოცნებამ” წამოაყენა. ძალიან სამწუხაროა, რომ უფლებამოსილების გასაკონტროლებლად მიდის ამხელა შიდა ბრძოლა, რაც, რა თქმა უნდა, უარყოფითად აისახება ქვეყნის ევროპერსპექტივაზე. რომელ ევროპაზეა საუბარი, როცა ასეთი მოვლენები ვითარდება და ვინმეს ჰგონია, რომ “ქართულ ოცნებას” უნდა ევროკავშირში გაწევრიანებისკენ სვლა? ვნახოთ, როგორ განვითარდება მოვლენები. მე მგონია, რომ პარლამენტში არსებული ოპოზიცია პრეზიდენტს დაუჭერს მხარს და იმპიჩმენტისთვის საჭირო პროცედურებისთვის საჭირო ხმების რაოდენობა “ქართულ ოცნებას” ვერ მოუგროვდება”, _ თქვა ჯანაშიამ.

პრეზიდენტის იმპიჩმენტის საკითხის შეფასება ლანჩხუთის მერს, ალექსანდრე სარიშვილსაც ვთხოვეთ, თუმცა, მან გვითხრა, რომ აღნიშნულ საკითხზე კომენტარს არ გააკეთებდა.

ჩოხატაურის საკრებულოს წევრი “ქართული ოცნებიდან” გოჩა ჯიქია ამბობს, რომ თუ პრეზიდენტმა კონსტიტუცია დაარღვია, სათანადო ღონისძიებებიც უნდა გატარდეს:

“პირველ რიგში, კონსტიტუცია და კანონი უნდა დაიცვას პრეზიდენტმა. როგორც მე ვიცი, მან დაარღვია კონსტიტუციაც და კანონიც, აქედან გამომდინარე, უნდა ვიმოქმედოთ ისე, როგორც წესი და რიგია. დანარჩენს უფრო კომპეტენტური ადამიანები მიხედავენ _ დაირღვა კონსტიტუცია თუ არ დაირღვა. ღია პასუხს გაგცემთ _ როდესაც გუნდმა შემოგვთავაზა სალომე ზურაბიშვილი პრეზიდენტად, მე წინააღმდეგი ვიყავი”, _ ამბობს ჯიქია და კითხვაზე, პრეზიდენტის იმპიჩმენტი როგორ შეიძლება აისახოს ქვეყნის მომავალზე, გვპასუხობს:  “იმპიჩმენტი შეიძლება ვერ მოხდეს, რადგან უმრავლესობას არ აქვს საჭირო ხმების რესურსი. კიდევ ერთხელ ვამბობ, ძალიან ცუდად აისახა სალომე ზურაბიშვილის პრეზიდენტობა უკვე თავისი გადაწყვეტილებებით, მიდგომით, თავისი ქართული მენტალობით, სიყვარულით. მართალია, ხმა მივეცი, გამომდინარე მდგომარეობიდან, მაგრამ ძალიან შევცდი. იმპიჩმენტი ქვეყანაზე უარყოფითად არ აისახება _ ჩვენი გადასაწყვეტია, რომ ჩვენ ვიყოთ ისე, როგორც უკეთესი იქნება ჩვენი სამშობლოსთვის”.

პარტიაში “გახარია-საქართველოსთვის” ამბობენ, რომ პრეზიდენტის იმპიჩმენტს მხარს არ დაუჭერენ, ხოლო მიღებული გადაწყვეტილება სახელმწიფოს სტაბილურობას საფრთხეს უქმნის. მსგავსი მოსაზრებები ჩვენთან საუბრისას ოზურგეთის საკრებულოს წევრმა ალეკო ბურჭულაძემ და ჩოხატაურში ფრაქციის თავმჯდომარემ გოგი ბოლქვაძემ გამოთქვეს.

“ოცნების” ეს გადაწყვეტილება საქართველოს პრეზიდენტის იმპიჩმენტის პროცედურის დაწყებაზე, პირველ რიგში, ხელს შეუწყობს მხოლოდ პოლარიზაციას, დაპირისპირებას, რაც სახელმწიფოს უქმნის სტაბილურობის პრობლემას. და მეორე, საფრთხეს უქმნის ქვეყნის მომავალს, ჩვენი ქვეყნის ევროინტეგრაციის პროცესს.

პარტია საქართველოსთვის იმპიჩმენტის პროცედურას მხარს არ დაუჭერს”, _ გვითხრა ალეკო ბურჭულაძემ.

ინფორმაციისთვის, “ქართული ოცნების” თავმჯდომარემ ირაკლი კობახიძემ განაცხადა, რომ პრეზიდენტის იმპიჩმენტის პროცედურისთვის საკონსტიტუციო სასამართლოს მიმართავენ. მმართველი გუნდი პრეზიდენტ ზურაბიშვილს კანონმდებლობის დარღვევაში სდებს ბრალს.

ცნობისთვის, პრეზიდენტი საზღვარგარეთ ევროკავშირის ლიდერებთან შეხვედრებს მართავს, თუმცა, როგორც პრეზიდენტის გამგზავრების შემდეგ ცნობილი გახდა, მთავრობამ მას გერმანიაში ვიზიტის ნება არ მისცა.

“იმპიჩმენტთან დაკავშირებით არც ერთ პარტიასთან კონსულტაციები არ გვქონია და ეს საკითხი დღის წესრიგში არ დგას, რომ ვინმესთან კონსულტაციები გავმართოთ”, _ ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა განაცხადა, რითაც უპასუხა კითხვას, გეგმავს თუ არა მმართველი გუნდი ოპოზიციის რომელიმე ნაწილთან კონსულტაციებს, რომ იმპიჩმენტისთვის საჭირო 100 ხმა ჰქონდეს.

მისივე თქმით, იმპიჩმენტის პროცედურის დაწყების გარდა, გუნდს, რომელიც “სამართლებრივი სახელმწიფოს პრინციპებით ხელმძღვანელობს, სხვა სივრცე არ დარჩა”.

ოხანაშვილი, ასევე, გამოეხმაურა გერმანიის ბუნდესტაგის საგარეო საქმეთა კომიტეტის თავმჯდომარისა და ევროპარლამენტარ მარკეტა გრეგოროვას კრიტიკულ განცხადებებს და ევროპელ კოლეგებს ურჩევს, “ჯერ გაერკვნენ, რას ითვალისწინებს საქართველოს კონსტიტუცია”.

ინფორმაციისთვის _ როგორც საქართველოს კანონმდებლობაში ვკითხულობთ :

“იმპიჩმენტი არის საქართველოს კონსტიტუციის დარღვევის, სახელმწიფოს ღალატისა და სისხლის სამართლის სხვა დანაშაულის ჩადენისთვის საქართველოს პრეზიდენტის, საქართველოს უზენაესი სასამართლოს თავმჯდომარის, საქართველოს მთავრობის წევრის, გენერალური აუდიტორისა და საქართველოს ეროვნული ბანკის საბჭოს წევრის თანამდებობიდან გადაყენების წესი.

კანონმდებლობის მიხედვით, იმპიჩმენტის წესით თანამდებობის პირის გადაყენების საკითხის აღძვრის უფლება აქვს პარლამენტის სრული შემადგენლობის არანაკლებ ერთ მესამედს.

 იმპიჩმენტის წესით თანამდებობის პირის თანამდებობიდან გადაყენების საკითხი აღძრულად ჩაითვლება, თუ მისი გადაყენების საკითხის აღძვრის წერილობით მოთხოვნას ხელს მოაწერს პარლამენტის სრული შემადგენლობის არანაკლებ ერთი მესამედი. პარლამენტის წევრის ხელმოწერა უნდა დამოწმდეს სანოტარო ან პარლამენტის რეგლამენტით დადგენილი წესით”.