ქვეყნის უმაღლეს საკანონმდებლო ორგანოში ხშირია შემთხვევა, როცა პარლამენტარები სესიებსა და პლენარულ სხდომებს არ ესწრებიან და კანონ-პროექტზე ხმის მისაცემად ერთმანეთის პულტებით სარგებლობენ. მმართველ გუნდში თანხმდებიან, რომ საქართველოს პარლამენტის რეგლამენტი გასამკაცრებელია.
,,გურია ნიუსი“ ამ საკითხთან დაკავშირებით, მმართველი გუნდის წარმომადგენელს ესაუბრა.
როგორც საპარლამენტო უმრავლესობის წევრი გიორგი გაჩეჩილაძე ,,გურია ნიუსთან“ საუბრისას აღნიშნავს, რეგლამენტი, რომელიც პარლამენტარების უფლება-მოსილებებს განსაზღვრავს, უნდა გამკაცრდეს, რადგან, მისი თქმით, დეპუტატების არადისციპლინური მოსწრების გამო, პარლამენტის სხდომები არაგეგმიურად მიმდინარეობს.
,,რა თქმა უნდა, უნდა გამკაცრდეს რეგლამენტი, რომელიც პარლამენტარების უფლება-მოსილებებს განსაზღვრავს. ხშირად, დეპუტატები სხდომას გვიან ვიწყებთ, რადგან პარლამენტის სხვა წევრები იგვიანებენ. ამ მხრივ, გარკვეული პრობლემები არსებობს და, ბუნებრივია, კანონი შედარებით მკაცრი უნდა იყოს თითოეული დეპუტატის მიმართ. მინდა გითხრათ, რომ ,,ქართული ოცნება _ მწვანეებში“, რომლის თავმჯდომარე მე ვარ, საპარლამენტო მოსწრებასთან დაკავშირებული პრობლემები არასდროს გვქონია. ჩვენ ყოველთვის ადგილზე ვართ, რადგან პასუხისმგებლობით ვეკიდებით საპარლამენტო სხდომებს“ , _ განაცხადა გიორგი გაჩეჩილაძემ.
„გურია ნიუსი“ დაინტერესდა თუ რა განწყობა არსებობს ამ საკითხთან დაკავშირებით საზოგადოებაში. ამიტომ კითხვით _ თუ რა პრობლემის წინაშე დგას დღევანდელი საკონონმდებლო ორგანო, პოლიტოლოგ ვახტანგ ძაბირაძეს მივმართეთ.
,,რა თქმა უნდა, ძალიან ცუდია, როდესაც პარლამენტარები სხდომას აცდენენ და კიდევ უფრო ცუდი ის არის, როდესაც კანონმდებები ერთმანეთის პულტებით სარგებლობენ. საზოგადოებას ხელისუფლების მიმართ ნდობა ქრონიკულად არა აქვს, გარკვეული კულმინაციის შემდეგ, ნდობა ქრება და ახალი კანდიდატის მიმართ ჩნდება და იმისთვის, რომ საზოგადოებას ჯერ კიდევ ჰქონდეს ნდობა პარლამენტისადმი, ასეთი შემთხვევები არ უნდა ფიქსირდებოდეს. პარლამენტის რეგლამენტი ისე უნდა შეიცვალოს, რომ მსგავს სიტუაციებში დეპუტატებს არ ჰქონდეთ სხვის მაგივრად ხმის მიცემის უფლება. კანონის დარღვევის შემთხვევაში კი უფლებამოსილება უნდა შეუჩერდეს. საჭიროა, რეგლამენტში უფრო მკაფიოდ იყოს გაწერილი, რომ დეპუტატის მიერ უფლება-მოსილების გადამეტება გარკვეულ სამართლებრივ პასუხისმგებლობას იწვევს. ბატონებო, თუ ადამიანს არ უნდა პარლამენტში ყოფნა და მუშაობა, მაშინ გავათავისუფოთ ამ მძიმე ტვირთისაგან“, _ განაცხადა ვახტანგ ძაბირაძემ.
დეპუტატების მიერ 2017 წლის საგაზაფხულო სესიის პლენარული და რიგგარეშე სხდომების საპატიო და არასაპატიო მიზეზით გაცდენების სტატისტიკა ასეთია: 2017 წლის საგაზაფხულო სესიის პლენარული სხდომა საპატიო მიზეზით ყველაზე ხშირად გააცდინეს შემდეგმა დეპუტატებმა:
,,ქართული ოცნება“ – დავით ჭიჭინაძე – 11; გიორგი ბეგაძე – 12; ნინო წილოსანი – 12; ნინო გოგუაძე – 12; ზვიად კვაჭანტირაძე – 13; სოფიო ქაცარავა – 14; ზაზა გაბუნია- 14; ირინა ფრუიძე – 14; ირაკლი ბერაია – 15; გოჩა ენუქიძე – 15; ალექსანდრე ქანთარია – 15; თამარ ჩუგოშვილი -18; გია ჟორჟოლიანი – 25.
,,ევროპული საქართველო’’ – სერგი კაპანაძე – 11; აკაკი ბობოხიძე – 11; ხათუნა გოგორიშვილი – 12; გიორგი კანდელაკი – 13; ოთარ კახიძე – 14; ირმა ნადირაშვილი – 16, გიორგი ღვინიაშვილი – 18; გიორგი ტუღუში – 20; ელენე ხოშტარია – 21; გიგა ბოკერია – 21; დავით ბაქრაძე – 21; ზაზა კედელაშვილი – 25.
,, ერთინი ნაციონალური მოძრაობა“ – თინათინ ბოკუჩავა -13; სალომე სამადაშვილი – 15; აზერ სულეიმანოვი – 22; ნიკანორ მელია – 25; კობა ნაყოფია – 26.
,,პარტიოტთა ალიანსი“ – ირმა ინაშვილი -13; გელა მიქაძე – 15.
სხვა დეპუტატების საპატიო გაცდენები მიმდინარე წლის საგაზაფხულო სესიის პერიოდში 10-ს არ აღემატება. რაც შეეხება საქართველოს პარლამენტის წევრების 2017 წლის საგაზაფხულო სესიის პლენარული და რიგგარეშე სხდომების არასაპატიო მიზეზით გაცდენებს, სტატისტიკა შემდეგნაირია:
ვანო ზარდიაშვილი – 6; გრიგოლ მიქელაძე – 3; ენზელ მკოიანი – 3; ირაკლი მეზურნიშვილი – 3; სამველ მანუკიანი – 3; ედიშერ თოლორაია – 4; სალომე ზურაბიშვილი – 3; რომან მუჩიაშვილი – 3; გია ჟორჟოლიანი – 3; ოთარ ჩრდილელი – 3; დავით ჭიჭინაძე -4; ლერი ხაბელოვი – 3.
აღსანიშნავია, რომ კობა ნაყოფიამ, რამაზ ნიკოლაიშვილმა და აზერ სულეიმანოვმა საქართველოს პარლამენტის პლენარული სხდომები საპატიო მიზეზით ყველაზე ხშირად გააცდინეს. 2017 წლის საშემოდგომო სესიის მიმდინარეობისას თითოეულ მათგან 10-10 გაცდენა აქვს.
რაც შეეხება საშემოდგომო სესიის პლენარული სხდომების არასაპატიო მიზეზით გაცდენების სტატისტიკას, ის შემდეგნაირად გამოიყურება: რუსლან გაჯიევი -2; სამველ მანუკიანი – 2; რამაზ ნიკოლაშივილი – 2; კახა ოქრიაშვილი – 2; სალომე სამადაშვილი – 2; გედევან ფოფხაძე – 2.
საქართველოს პარლამენტის რეგლამენტში პუნქტობრივად არის გაწრილი, რა სახის რეაგირება უნდა მოჰყვეს პარლამენტარების მიერ უფლება-მოსილების გადამეტების ფაქტებს. როგორც რეგლამენტიდან ირკვევა, იმ შემთხევაში თუ პარლამეტის წევრი არ იმყოფება სხდომათა დარბაზში და მისი სახელით მიღებულია მონაწილეობა კენჭისყრაში ან რეგისტრაციაში, მას ხელფასის 20% ექვითება.
მუხლი 286
6. თუ 1 დღის განმავლობაში კენჭისყრისა და რეგისტრაციის შედეგების შემოწმებისას გამოვლინდა, რომ პარლამენტის წევრი არ იმყოფება სხდომათა დარბაზში და მისი სახელით მიღებულია მონაწილეობა კენჭისყრაში ან რეგისტრაციაში, მას დაუკავდება ხელფასის 20%. იმავე სესიის განმავლობაში იმავე ქმედების მეორე და ყოველი შემდგომი განმეორების შემთხვევაში ამ პარლამენტის წევრს დაუკავდება ხელფასის 25%. აღნიშნული ფაქტი ფორმდება საოქმო ჩანაწერით, რომელიც ეგზავნება პარლამენტის აპარატის საფინანსო დეპარტამენტს შესაბამისი თვის ხელფასიდან თანხის დასაკავებლად.
7. თუ პარლამენტის წევრი, რომელსაც ევალება პლენარულ სხდომაზე კანონპროექტის წარდგენა (მომხსენებელია ან თანამომხსენებელია), კანონპროექტის წარდგენის დროს არასაპატიო მიზეზით არ იმყოფება სხდომათა დარბაზში, მას დაუკავდება იმ დღის ხელფასი. პარლამენტის წევრის მიერ სხდომათა დარბაზში კანონპროექტის წარუდგენლობის ფაქტი, სხდომის თავმჯდომარის განცხადების საფუძველზე, ფორმდება საოქმო ჩანაწერით, რომელსაც მანდატურთუხუცესი 24 საათის განმავლობაში უგზავნის პარლამენტის აპარატის საფინანსო უზრუნველყოფის დეპარტამენტს ამ პუნქტის შესაბამისად ხელფასიდან თანხის დასაკავებლად.
8. თუ 2 კომიტეტში გაწევრებული პარლამენტის წევრი კალენდარული თვის განმავლობაში არასაპატიო მიზეზით სამჯერ არ დაესწრება კომიტეტების სხდომებს, ხოლო 1 კომიტეტში გაწევრებული პარლამენტის წევრი კალენდარული თვის განმავლობაში არასაპატიო მიზეზით ორჯერ არ დაესწრება კომიტეტის სხდომას, მას დაუკავდება ხელფასის 10%. პარლამენტის წევრს სხდომა არასაპატიო მიზეზით გაცდენილად არ ეთვლება, თუ მან წინასწარ შეატყობინა კომიტეტის თავმჯდომარეს სხდომის შესაძლო გაცდენის საპატიო მიზეზის შესახებ ან კომიტეტის სხდომა მოწვეულ იქნა ამ რეგლამენტის 49-ე მუხლის მე-5 და მე-8 პუნქტების მოთხოვნათა დარღვევით. პარლამენტის წევრის კომიტეტის სხდომაზე დაუსწრებლობის ფაქტი ფორმდება საოქმო ჩანაწერით და აღირიცხება კომიტეტის თავმჯდომარის მიერ, რის შემდეგაც საოქმო ჩანაწერი ეგზავნება პარლამენტის აპარატის საფინანსო დეპარტამენტს შესაბამისი თვის ხელფასის დასაკავებლად.
