ჯანსაღი ცხოვრების წესი, სრულყოფილი და გავარჯიშებული იმუნიტეტი აუცილებელია,რათა ჩვენი ორგანიზმი მომზადებული შეხვდეს ცივ სეზონს და თავიდან ავიცილოთ ვირუსული და ბაქტერიული ინფექციების ზრდა,_ ამის შესახებ “გურია ნიუსთან” საუბრისას ოზურგეთის საზოგადოებირივი ჯანდაცვის ცენტრის ეპიდემიოლოგმა ელზა სიმონიშვილმა განაცხადა და აღნიშნა, რომ გადამდები ინფექციური დაავადებებისაგან თავის დაცვა, უპირველესად იმ პრევენციული ღონისძიებების დაცვითაა შესაძლებელი, რომლებსაც ეპიდემიოლოგები სისტემატიურად აწოდებენ მოსახლეობას.
“რადგანაც ზამთრის პერიოდი ვირუსების სეზონს უკავშირდება, ამ დროის დადგომისთვის შეგვიძლია წინასწარ მოვემზადოთ. უნდა გვახსოვდეს, რომ იმუნურ სისტემაზე ზრუნვა ჩვენი ყოველდღიური რეჟიმის ნაწილია.
მსოფლიო ჯანდაცვის ორგანიზაცია, პირველ რიგში, იმუნიტეტის გაჯანსაღების რეკომენდაციას იძლევა:
ეს არის ცხოვრების ჯანსაღი წესი, ბალანსირებული კვება, გარემოში (სახლში, სამსახურში, სააღმზრდელო დაწესებულებებში) ტემპერატურული რეჟიმის დაცვა, რაც გულისხმობს სამყოფ გარემოში 22-23 გრადუს, ხოლო საძინებელში 18-19 გრადუს ტემპერატურას.
ხშირი სეირნობა სუფთა ჰაერზე, ჰიგიენის ნორმების დაცვა, ზამთრის პერიოდში ვიტამინებით, მიკროელემენტებით მდიდარი საკვების მიღება.
თითოეული მათგანი მნიშვნელოვან როლს ასრულებს იმუნიტეტის გაძლიერებაში.
ფიზიკური აქტივობა გულისხმობს ფიზიკურ ვარჯიშსა და დღის განმავლობაში რაც შეიძლება დიდხანს სუფთა ჰაერზე ყოფნას.
ძილი და დასვენება – დღე-ღამეში 6-8 საათი ძილი ზრდასრული ადამიანისთვის აუცილებელია, რაც, თავის მხრივ, ძლიერი იმუნიტეტის ჩამოყალიბებასა და შენარჩუნებას უზრუნველყოფს. გარდა ამისა, დადგენილია, რომ დასვენება და ძილი ენერგიულობის, პროდუქტიულობის და კარგი განწყობის აუცილებელი კომპონენტია.
სასურველია სტრესის კონტროლი- სტრესი ნეგატიურ გავლენას ახდეს ჩვენს იმუნურ სისტემაზე. სტრესის შედეგად მცირდება ორგანიზმში ლიმფოციტების რაოდენობა, რომელთა მოვალეობა ინფექციებთან და ვირუსებთან ბრძოლა. სტრესთან გამკლავებაში დაგვეხმარება ფიზიკური აქტივობა, საკმარისი ძილი,საჭიროების შემთხვევაში, სპეციალისტთან დროული ვიზიტი”,_ ამბობს ელზა სიმონიშვილი.
ეპიდემიოლოგი აღნიშნავს, რომ სრულყოფილი იმუნიტეტისათვის საჭიროა ვიცოდეთ ძირითადი ვიტამინებისა და მიკროელემენტების როლი ჩვენი ორგანიზმისათვის.
“C ვიტამინი – ეხმარება ორგანიზმს გააქტიუროს ანტისხეულების მოქმედება, რომლებიც ორგანიზმს ვირუსებისგან იცავს. გარდა ამისა C ვიტამინი ძლიერი ანტიოქსიდანტია . C ვიტამინის მდიდარი წყაროა ციტრუსი, კენკრა, კივი, ტკბილი წიწაკა, ბროკოლი, მწვანილი.
D ვიტამინი – D ვიტამინი აუცილებელია, როგორც ძვლების სიმტკიცისთვის, ასევე იმუნური უჯრედების აქტივობისათვის, D ვიტამინის მთავარი წყარო მზეა. გვხვდება კვერცხში, სოკოსა და ცხიმიან თევზში.
თუთია – განსაკუთრებით დიდ როლს თამაშობს ქსოვილების აღდგენაში, იმუნური უჯრედების სტიმულაციასა და ანთებითი პროცესის შემცირებაში. მდიდარია საქონლის და ქათმის ხორცი, თხილეული, ოსპი.
რკინა – მონაწილეობს ჰემოგლობინის ტრანსპორტირებაში. რკინის ნაკლებობა იმუნური სისტემის რეაქციის უნარის დაქვეითებას უკავშირდება. ამიტომ რკინით მდიდარი საკვების ჩართვა რაციონში უმნიშვნელოვანესია. ესენია: საქონლის ხორცი, ღვიძლი, პარკოსნები”,_ ამბობს ეპიდემიოლოგი.
ელზა სიმონიშვილის თქმით, უნდა ვიცოდეთ, რომ თუ ადამიანი სრულფასოვნად და რაციონალურად იკვებება, თუ ყველა მიკროელემენტს, ცილებს, ნახშირწყლებს და ცხიმებს დაბალანსებულად იღებს, მას ფარმაცევტული კვებითი დანამატი არ სჭირდება.
ეპიდემილოგის თქმითვე, დიდი მნიშვნელობა აქვს პირადი ჰიგიენის დაცვასაც და განმარტავს:
“პირადი ჰიგიენა გულისხმობს: უპირველესად ხელების ჰიგიენას(რადგანაც დაავადების გამომწვევი შესაძლოა დაბინძურებული ხელებით გადაეცეს).
ხველის, ცემინების ეტიკეტის დაცვას, დისტანცირებას, სიმპტომების არსებობისას იზოლაციას,
საჭიროების შემთხვევაში პირადი დაცვის საშუალებების გამოყენებას(რესპირატორი, ნიღაბი)
სეზონური გრიპის გართულებების მაღალი რისკის გამო სასურველია მოსახლეობა, განსაკუთრებით კი რისკ ჯგუფში შემავალი ადამიანები იყვნენ აცრილნი.
ამასთანავე უნდა ვიცოდეთ, რომ გრიპის ვაქცინაცია, რომელიც ჩვენს ქვეყანაში უკვე მიმდინარეობს და ხელმისაწვდომია საქართველოს ყველა მოქალაქისათვის(6-თვის ასაკიდან), არ გვიცავს ყველა რესპირატორული ვირუსული ან ბაქტერიული ინფექციისაგან, იგი გვიცავს ვირუსული გრიპისმიერი გართულებებისაგან, რაც კოვიდ-პანდემიის პირობებში თავიდან აგვაცილებს მძიმე გართულებებს, მათ შორის ლეტალურ შედეგებსაც”,_ ამბობს ელზა სიმონიშვილი.
ავტორი
