ხდება ისე, რომ კარტოფილის ცუდად შენახვის ან სულაც იმის გამო, რომ ბევრის შეძენის საშუალება არ გვაქვს, ახლა, გაზაფხულზე არ გვყოფნის სათესლე მასალა. ასეთ დროს განსაკუთრებით დიდი მნიშვნელობა აქვს, როგორ მივიღოთ ერთი გორგლიდან რამდენიმე ბუჩქი.
როცა გორგლს ნიადაგში ჩავთესავთ, ჩვეულებრივ, ღივიდან წარმოიქმნება ღეროები და გაიზრდება კარტოფილის ბუჩქი, ბევრი ღივი კი არ ვითარდება ხოლმე. წარმოქმნილი ღეროები იტოტება და ქმნიან უფრო მძლავრ ბუჩქს. გორგლი თავდაპირველად საკვებ ნივთიერებათა მარაგს აწვდის ბუჩქს, მაგრამ მალე წარმოიქმნება ფესვები და ბუჩქი დამოუკიდებლად იკვებება ნიადაგიდან.
რამდენადმე უფრო მეტ მოსავალს იძლევა მსხვილი გორგლები. კარგად დავაკვირდეთ _ ჯერ დავჭრათ დიდი გორგლი პატარა ზომებად, მერე თითოეულს ამოვჭრათ ღივი და როცა ჩავთესავთ, თითოეულიდან კიდევ 7-10 ღივს მივიღებთ. მართალია, ცოტა უფრო შრომატევადია ეს საქმე, მაგრამ თუ მიწა ნაკელიანი და კარგად არის გაჯერებული ორგანული სასუქით, საუკეთესო მოსავალს მივიღებთ. ჩასათეს ღივს, დაახლოებით, კაკლისოდენა ნაწილს გავაყოლებთ.
განსაკუთრებით დიდი მნიშვნელობა აქვს ამ ხერხს ჯიშიანი კარტოფილის გასამრავლებლად. მით უფრო, თუ ასეთი სათესლე მასალა ცოტა გვაქვს.
არსებითად რომ ვთქვათ, გორგლებით კარტოფილის გამრავლება არის მცენარის დაკალმებით გამრავლება. გორგლები ხომ თესლი არ არის, არამედ გამსხვილებული ღეროა, რომელზეც განლაგებულია კვირტები _ ღივები. კალმით გამრავლების ამ ხერხს ის უპირატესობა აქვს, რომ ამ დროს სავსებით ვინარჩუნებთ ჯიშობრივ თავისებურებებს, რაც არ ხდება განაყოფიერების დროს.
კარტოფილი, ისევე, როგორც ყველა სხვა მცენარე, ნამდვილ თესლსაც გვაძლევს. ყველას უნახავს აყვავებული კარტოფილი. ბევრი ჯიშის კარტოფილის ყვავილისგან მომავალში წარმოიქმნება ნაყოფი _ მსხვილი მწვანე კენკრა, რომელშიც მომწიფების შემდეგ ბევრი წვრილი თესლი წარმოიქმნება. თავისთავად ცხადია, რომ ეს თესლი შეგვიძლია კარტოფილის მოსაყვანად გამოვიყენოთ. კარტოფილის ჯიშების უმრავლესობა თესლიდან არის მიღებული.
კარტოფილის მიღება გორგლების ნაცვლად თესლისგან, მრავალმხრივ ხელსაყრელია. თუმცა, ეს ბევრს საძნელო საქმედ ეჩვენება და მიწაში პირდაპირ გორგლების ჩაყრა ურჩევნია. ეს არის, რომ კარტოფილის თესლით დათესვისას, პირველ წელს მცენარე იძლევა წვრილ გორგლებს და ისინი, სამაგიეროდ, მომავალ წელს მოგვცემენ ნორმალური ზომის, ჯიშის შესატყვის გორგლებს და ამასთანავე, უხვ მოსავალს. თესლის გამრავლებას ეს ვერ დააბრკოლებს, ვინაიდან წვრილი გორგლები უკვე თავისთავად კარგი თესლია, მაგრამ მოსახმარებლად, პირველ წელს, ხელსაყრელი არ იქნება.
რამდენადაც კარტოფილის თესლით გამრავლება მოხმარების საჭიროებისთვის ძლიერ ხელსაყრელი იქნებოდა, ამან ადამიანი აიძულა, გამოეძებნა პირველ წელსვე თესლით დათესილი კარტოფილისგან ნორმალური გორგლების მიღების ხერხები და ასეთი ხერხები არის კიდეც შემუშავებული.
თუმცა, დავძენთ, რომ თუ საშუალება არ გვაქვს, რომ ვიყიდოთ საუკეთესო ჯიშის კარტოფილის თესლი სასურველი რაოდენობით, მაშინ რამდენიმე გორგლის დათესვით რომ მიიღოთ ბლომად სათესლე მასალა, იმოქმედეთ იმ წესის მიხედვით, როგორც ზემოთ გირჩიეთ.
