აგვისტოსა და სექტემბერში მთავრდება ფუტკრის ღალიანობა. ამ დროს განსაკუთრებით უნდა მივმართოთ მცირე ღალიანობის მქონე ადგილებს, რომ ბუდის დანაკლისი თაფლის მხრივ შეივსოს. ახალგაზრდა ფუტკრით უნდა გავამდიდროთ ოჯახი, რომ მან უკეთ გამოიზამთროს. თუ მთაბარობა არ ეწყობა, მაშინ უნდა მოვახდინოთ ბინაზე დაბრუნება, ვინაიდან ამ დროს ოჯახი სავსეა თაფლით.
უნდა შევამოწმოთ ოჯახების მდგომარეობა: თუ ოჯახები ისე ძლიერია, რომ თითო ან ორ-ორი ჩარჩოს ამოღება მათზე ცუდად არ იმოქმედებს, მივმართოთ ადრე შედგენილი ნამატის დახმარებას. მაგრამ თუ ოჯახებს ნაკლები საკვები აქვთ, მაშინ უნდა ვაწარმოოთ ოჯახების ნორმამდე შეერთება იმ მიზნით, რომ საკმაო რაოდენობის თაფლი ექნათ საზამთროდ შეერთებულ ოჯახებს.
არის შემთხვევები, როცა ოჯახი საკვებით უზრუნველყოფილია, მაგრამ ფუტკარი ცოტაა შიგ. ასეთ შემთხვევაში, ფუტკრის გამრავლების მიზნით, უნდა მოვახდინოთ საკვების მიცემა, საკუჭნაოების მოხსნა და თანდათანობით ზედმეტი, უვარგისი, უთაფლო ჩარჩოები ბუდიდან ამოვაცალოთ. მშრალი ფიჭები უნდა შევინახოთ სუფთა და მშრალ საწყობში _ ჩრჩილმა და თაგვმა რომ არ გააფუჭოს.
ასე, თანდათანობით უნდა მოვამზადოთ ფუტკარი ზამთრისთვის. მას ჯერ კიდევ ვაძლევთ წყალს, დედების გამოყვანა და ხელოვნური ფიჭის მიცემა კი უნდა შევწყვიტოთ.
გიზო გობრონიძე, მოყვარული მეფუტკრე
